Malako 15

Yesu Alusibua ku Pilato.

Mat. 27:1, 2, 11-15; Lk. 23:1-7, 13-18; Yoana 18:28-40; 19:1-16.

1Nu kazanga kongo mu nindunindu nunse basankoga banene nu bakulu nu basanzi, nu bakazi ba luango bakitile luango, nu bakandile Yesu nu bendile nage ku Pilato. 2Nu Pilato amubuzizie bune, Ndi uwe U Mukota wa baYuda? Nu amuakuide bune, Bubo buwatenda. 3Nu basankoga banene bamubingile mu bitondo bingi. 4Nu Pilato amubuzizie lingo bune, Ntuakule? unguilila, bitondo bingi bibakukubinga. 5Tondo Yesu ntakuide lingo; nu bubo Pilato angamine.

Yesu aba Balaba.

Mat. 27:16-26; Lk. 23:16-25; Yoana 18:40.

6Na busi na busi buakitaga kisagulo abakandulilaga mukandua umozi, ubatunda. 7Nu kuabezaga mukandua umozi wamanagua buno, Balaba, akandilue na bantu babezaga na misona, nu beitanaga mu misona. 8Nu musanganano, balingile kumusega buno abakitile anga buabakitilaga. 9Nu Pilato abakuide bune, Buni bumukutunda, Ndi nimukandulile Mukota wa baYuda? 10Kubuno amenyinine buno basankoga banene bamugabuide ku lugi. 11Tondo basankoga banene balubikanizie musanganano, balumbe bakandula Balaba. 12Pilato akuide lingo bune, Mukutunda nikite wono buni umukumana Mukota wa baYuda? 13Nu balalukile lingo bune, Atakue. 14Nu Pilato abatendile bune, Bubi bukizi buakitile? Nu balalukile lingo bubibu bune, Atakue. 15Nu Pilato, atundile kubogiabogia musanganano, abakandulile Balaba; nu gasilile kususula Yesu, amugabuide buno atakue.

Yesu Ekuvualikibua Nhumbu za Mikele Kuitoe Besenda Kumutaka.

Mat. 27:27-31; Lk. 23:26-32; Yoana 19:16, 17.

16Nu bakoloboyo bendile nage ga mulungu ku Palatoria;#15:16 Buisulilua bua bubo, Numba za Bukota. nu kibombo kinsania kiamukonganine. 17Nu bamuvualikizie nsulu zakisimana, nu balukile nkumbu za bukota za mikele, bamuvuaIikiziezo; 18nu balingile kumusambizia, Samba, Mukota wa baYuda! 19Nu bamususuide kuitoe na tususula, nu bamusuilide matazi, nu bamukomene mazu, nu bamukumbamine. 20Nu gabasilile kumuililika, bamutikizie nsulu zakisimana, nu bamuvualikizie nsulu zage. Nu bendile nage buno bamutake.

21Nu bekizie muntu umozi watingaga, atukaga ku masoa, izina iiage, Simona wa mu Kulene, isi wa Alesandelo nu Lufu, buno eke muti wage wa magu.

22Nu bendile nage ku kiziki kiamanagua Gologota, buisulilua buakio buno, Kiziki kia lukungu. 23Nu bamunusizie maku masambikua na kansembia buno anue: tondo ntamanune.

Bekutaka Yesu ku Muti wa Magu.

Mat. 27:33-56; Lk. 23:33-49; Yoana 19:17-37.

24Nu bamutakile ku muti wa magu, nu babeganizie nsulu zage, bazesile mbale, buno na muntu na muntu notola kikizi, 25Nu gabeide buse nkungu isatu, nu bamutakile ku muti wa magu. 26Nu kuabezaga masanzo masanzilue buno, MUKOTA WA BAYUDA.

27Nu bamutakile na beibi babili; umozi ku kuboko kuage kua seidume, nu ungo ku kuboko kuage kua seikazi. 28Buno masanzo mazindilile buno, aganzilue na bagi. 29Nu bansania batingaga bamulingaga, batengezietengezie matoe mabo, nu batendile bune, E! wasambulaga numba za kukumbamina, nu ku bindi bisatu nti wazobaka, 30iyonie lino, nu igezie ku muti wa magu. 31Nu bubo basankoga banene bamuililikile buabo buabo nu basanzi, nu batendile bune, Onezie bango; tondo ntanavuama kuiyonia wenyene. 32Klisto, Mukota wa baIsalele; kasi eigezie ku muti wa magu, buno tumone nu tukatizie. Nu babo batakilue nage nubo bamulingile.

33Nu gabeide nkungu mutuba zakuka kuabezaga kapilo ku kisi kinsania aba nu ku nkungu mubula. 34Nu ku nkungu mubula Yesu alalukile neiyuki inene, Eloi, Eloi, lama sabachthani? buisulilua bua bubo, Kalaga wane, Kalaga wane, kubuni kuwandekelela? 35Nu bango babezaga bemana buigi, gabongule ku bubo, batendile bune, Akumana Eliya. 36Nu umozi eitumine lubilo, akatile luata, aluiyazizie na maku mabezaga makali, nu abikilemo ku musumbo, nu amunusiziemo, nu atendile bune, Musigazi tanga; tulole ndi Eliya avue kumukumbia. 37Nu Yesu alilile neiyuki inene, nu eidekanizie. 38Nu nsulu za numba za kukumbamina zatikile bibe bibili, kutukila kuigulu nu gansi. 39Nu wozo mukota wa bakoloboyo, wabezaga wemana buigi nage, gamonine eidekania, atendile bune, Lebelebe muntu wono abezaga Muana wa Kalaga. 40Nu kuabezaga bakikulu balolaga bulazi; kubeli kuabezaga Malia Magadala, nu Malia, nina wa Yakobo muto wa Yose, nu Salome; 41ubabo, bamuyangile nu kumukambila ku Galela, nu bango beingi bendile gamozi nabo ku Yelusalema.

Bese Babika Yesu ku Nsinda.

Mat. 27:57-61; Lk. 23:50-56; Yoana 19:38-42.

42Nu gabuabeide buse muigolo, bubuno buabezaga busi bua kulongeka, kuabezaga kuse kuasigala kindi kimozi na ku busi bua sabato. 43Yosefu wa Alimataya muntu munene wa lusu lua nango, wono walindilaga bukota bua Kalaga avule; nu endile na ngini ku Pilato; nu asegile kitumba kia Yesu. 44Nu Pilato angamine kubuno esakua; amanine wozo mukota wa bakoloboyo nu amubuzizie bune, Ndi akua kalazi. 45Nu gasambalidue na wozo mukota wa bakoloboyo, akasile Yosefu kikio kitumba. 46Nu akunzile nsulu zezo zabota, akibikile mu nsinda zabezaga muikozi; nu akukide ikozi inene ku muingilo wa nsinda. 47Nu Malia Magadala, nu Malia, nina wa Yose balolile kuko kubamubika.

Currently Selected:

Malako 15: NTKI57

Highlight

Copy