Matayo 8

Yesu Akonia Muiya Bibali.

Mk. 1:40; Lk. 5:12-14.

1Nu gagelile muiduko, misanganano minene zamuyangile. 2Nu muiya bibali amuvuilide, nu amukumbamine, amubuide bune, Mukota, ndi watunda, unavuama kunengia. 3Yesu alambizie kuboko kuage, etubizie kueli, amubuide bune, Nkutunda, wenge. Nu kazanga kongo bibali biage bionine. 4Yesu amubuide bune, Ntubule muntu kitondo kikino; tondo enda, widolesie ku sankoga, ukasane lukaso anga buakakizizie Mose, lube bulongeki ku beli.

Yesu Onizie Mukiti wa Mukota Bakoloboyo Lukama.

Lk. 7:1-10.

5Geingide mu muino wa Kapenuma, mukota wa bakoloboyo avule kuage, nu amusegile bune, 6Mukota, mukambi wane eiyamikibua mu numba na lusambo lua kumia maboko, akubabalua nunse. 7Yesu amubuide bune, Nkuvua kumonia. 8Mukota wa bakoloboyo amuakuide bune, Mukota, nne tabunatananina uwe kuingila mu numba zane; tondo tenda neiyuki tugu nu mukambi wane nti onibua. 9Kubuno aba nunne nangatua, nu nangata bakoloboyo; nu ndi nabula umozi bune, Enda nti enda; nu ungo buno, Vua, nti avua; nu ku mukambi wane buno, Kita bubo, nti abukita. 10Gongule Yesu kububo, angamine, nu abuide babo bamuyangaga bune, Lebelebe nkumubula buno nsimonaga lingo ku ungo uli na magala mu bukatizio anga wono mu bikanga bia Isalele. 11Nu nkumubula buno, beingi bakatuka kukubasaga kisongo kia busi nu ku kutukaga kisongo kia busi, nu bekeikala na Abalahama, nu Isaka, nu Yakobo, mu bukota bua meigulu: 12tondo bana ba bukota bakeisua mu kapilo ka kumbuga; kukaba kulila nu kubuga meinyo. 13Yesu abuide mukota wa bakoloboyo bune, Enda, anga buwakatizagia bube. Mukambi wage onizibue nkungu zezo.

Yesu Onizie Ninabiala wa Petelo Isusila.

Mk. 1:29-34; Lk. 4:38-41.

14Nu gabasile Yesu ku numba za Petelo, amonine ku ninabiala wa Petelo eli neisusila. 15Yesu eitubizie kuikoko liage, nu isusila liasilile; nuwe azanzukile nu amukitide. 16Gabuabede buse muigolo, bamulusizizie beli na basumbu beingi; nu embizie babo basumbu neiyuki liage, nu onizie bansania babezaga basambi: 17bu bo lizindilile liatendagua na mulengania Yesaya bune, We wenyene atolile busosu bueitu, nu ekile nsambo zeitu.#Yesaya 53:4.

Yesu Alindikile Beigisibua Bage.

Lk. 9:57-62.

18Nu Yesu gamonine ku musanganano munene wamutimbikania, akakizizie bune, Tusokazi lisilia. 19Musanzi umozi amuvuilide, amubuide bune, Musozi, nakuyange kunsania kuwendage. 20Yesu amubuide bune, Mikala zili na matengu, nu tuzoni tua mpelela tuli na bizumba; tondo Muana wa muntu nteli na kiziki kia kukukika itoe liage. 21Ungo muigisibua abuide Yesu bune, Mukota, nkase buangato nende kuisa kitumba kia tatane. 22Tondo Yesu amubuide bune, Nyange; siga bakuzi beisane buabo buabo.

Yesu Ekubotia Bimpumi Bia Mazi.

Mk. 4:36-41; Lk. 8:22-25.

23Nu gakimine mu buato, beigisibua bage bamuyangile. 24Nu kisoa kinene kiabede mu kitatenge, bimpumi binene bia mazi bieidibuide ku buato: tondo Yesu abezaga eiyombeka ku tulo. 25Beigisibua bage bamuvuilide, nu bamuyukizie, bamubuide bune, Mukota, tonie; tuakua. 26Ababuide bune, Inyue basosu mu bukatizio bueinyu, kikizi kimukukua boba? Su ayukile, nu azugide kisoa nu mazi ma kitatenge nu kuolile nunse. 27Bantu bangamine nu batendile bune, Wono eli muntu mukizi? aba kisoa nu kitatenge nti bikumuanza?

Ku Gadala Yesu Ekutikia Basumbu Babi.

Mk. 5:1-21; Lk. 8:26-40.

28Nu gabasile lisilia ku kilongo kia Galasa, bantu babili babezaga na basumbu, bakulumanine nage batukaga ku kiziki kia nsinda, babezaga bakali nunse, nu takuli muntu watingaga mu zezo nzila. 29Nu balalukile neiyuki inene batendile bune, Buni butuli nobe Uwe, Yesu Muana wa Kalaga, Ndi wavule gano buno ulinge kutusungia nu lusungio lueitu taluika? 30Nu muimba muingi wa ngulube wabezaga kulazi waliaga. 31Nu basumbu bamusegile, bamutendile bune, Ndi watutikia, nti watuingizia mu muimba wa ngulube. 32Nu ababuide bune, Endazi. Nu batukile, nu bengide mu ngulube: nu muimba unsania wa ngulube wakumbile mu mpembue, nu wizisile mu kitatenge, nu wakule mu mazi. 33Balangi bazo batinine, bendile ku muino, basambeide bunsania, nu bitondo bia basumbu. 34Bantu bansania ba mu muino bendile kukulumania Yesu: nu gabamumueneko, bamubuide bune, Tuka mu miaga zeitu.

Currently Selected:

Matayo 8: NTKI57

Highlight

Copy