Matayo 27

Ngatu Bekugabula Yesu mu Maboko ma Pilato.

Mk. 15:1; Lk. 23:1; Yoana 18:28.

1Gabuabede buse nindunindu basankoga banene nu bakulu ba bantu bamukalide luango buno, beite Yesu. 2Nu bamukandile, nu bendile nage, nu bamugabuide ku Pilato wozo wabezaga mukota.

Yudasa Abezaga na Mpipi Nene.

Misako 1:16-19.

3Nu Yudasa wamugabuide gamonine esasungibua, eibezizie nu asubizizie basankoga nu bakulu bibio bindi makumi masatu bia feza. 4Atendile bune, Nagile kubuno nagabuide mikila zeisanana na buagi. Batendile buno, takitondo kietu! kili kitondo kiobe uwenyene. 5Esile bibio bindi bia feza gansi mu kiziki kiasuagibua, nu endile kuikama. 6Nu basankoga banene bakatile bindi bia feza, batendile bune, Tabuakulungana ku mulembe kubika feza zino mu kikagi, kubuno zili bukunza bua mikila. 7Nu bakalile luango luabo, nu bakunzile kiziki kiabezaga ga mubumbi wa nyungu, buno kibe kiziki kia nsinda za bageni. 8Kububo bekumana kiziki kikio bune, Kiziki kia mikila, aba nu kano kaluma. 9Buno lizindilile liatendagua na mulengania Yehemia bune, Bakitile bindi makumi masatu bia feza, bubo buli bukunza bua wozo wakunzilue, anga bubakitile bukunza bua bana ba Isalele; 10nu bazikasene ku kiziki kia mubumbi wa nyungu, anga buankakizizie Mukota.#Zakalia 11:12, 13.

Pilato Ekubuzia Yesu.

Mk. 15:2-5; Lk. 23:2-3; Yoana 18:29-38.

11Yesu emanine ku mukota Pilato: nu wozo mukota amubuzizie bune, Ndi uwe U Mukota wa baYuda? Yesu amuakuide bune, Bubo buwatenda. 12Nu gasongedue na basankoga banene nu bakulu, ntatendile buampa. 13Ububo Pilato amubuzizie bune, Ndi ntukungua ku bitondo bingi bibakukulongekela? 14Nu ntamuakuide buampa; kububo mukota angamine.

Yesu aba Balaba.

Mk. 15:6-15; Lk. 23:17-25; Yoana 18:38-40.

15Na busi na busi buakitaga kisagulo mukota abakandulilaga mukandua umozi, ubatunda. 16Nu babezaga na mukandua umozi munene, amanagua buno, Balaba. 17Nu gabakundamene, Pilato ababuzizie bune, Mukutunda namukandulila nazi? Balaba, aba Yesu ukumanua buno, Klisto? 18Kubuno amenyine buno, babo bakumugabula tugu ku kabamba ka lugi. 19Nu gabezaga eikala ga kisumbi kia lusungio, mukikulu wage amusingide mugenzi bune, Ntuingile mu kitondo kia muntu wono wisanana; lelo nabezaga nababazibua mu ndozi ku kabamba kage. 20Basankoga banene nu bakulu babulile misanganano buno, basege Balaba, nu kuita Yesu. 21Tondo mukota ababuzizie bune, Beli babili, mukutunda namukandulila nazi? Nubo bakuide bune, Balaba. 22Pilato ababuzizie bune, Nkite Yesu ukumanua Klisto buni? Bansania beitabizizie bune, Atakue. 23Ababuzizie bune, Bubi bukizi buakitile? Balalukile bubibu bune, Atakue. 24Gamenyine Pilato buno, bubo buatendaga tabuabasuagila, tondo kazege keitide, atolile mazi, nu ogile ku maboko nu musanganano wamonaga, atendile bune, Nsili na katati ka mikila zeno za muntu wono wisanana, mukite anga bumukutunda. 25Nu bantu bansania bamuakuide bune, Mikila zage zikabezaga gantata geitu nu gantata ga bana beitu. 26Kububo, bakanduide Balaba; tondo alibuide Yesu, amugabuide buno atakue.

Bekubika Yesu Nkumbu za Mikele. Bekuenda Kumutaka ku Muti wa Magu.

Mk. 15:16-23; Lk. 23:26-32; Yoana 19:16, 17.

27Nu bakoloboyo ba mukota bendile na Yesu ku Palabolia#27:27 Luimbo 22:17, 18. nu kibombo kinsania kiamukonganine. 28Nu bamutikizie nsulu, nu bamuvualikizie nsulu zakisimana. 29Nu bakitile nkumbu za bukota za mikele nu bamubikilezo kuitoe, nu babikile musumbo mu kuboko kuage kua seidume; nu bamukomene mazu nu bamuililikile bune, Samba Mukota wa baYuda. 30Nu bamusuilile matazi, nu bakatile musumbo nu bamulibulaga nago kuitoe. 31Nu gabasilile kumuililika, bamutikizie nsulu zakisimana, nu bamuvualikizie nsulu zage, nu bendile nage buno bamutake.

32Nu gabatukile, basangile muntu wa kisi kia Kulene, izina liage Simona: bamuekezie muti wa magu wa Yesu, ku magala mabo.

Bekutaka Yesu ku Muti wa Magu.

Mk. 15:22-32; Lk. 23:33-43; Yoana 19:17-24.

33Nu gababasile ku kiziki izina liakio Gologota, buisulilua buno, nkungu miliba. 34Nu bamukasile maku masambikua na bili lubaba anga nsangu buno amanue: gasondile, asombile kumanua. 35Nu gabasilile kumutaka, babeganizie nsulu zage, bazesile ku mbale; 36nu beikalile kumulanga.#Luimbo 22:17, 18. 37Nu babikile geitoe liage masongelo mage masanzilue buno, WONO YESU MUKOTA MUNENE WA BAYUDA. 38Nu kuabezaga beibi babili batakilue nage, umozi ku kuboko kuage kua seidume, nu ungo ku kuboko kuage kua seikazi. 39Batingaga mu nzila bamulingile nu batengezietengezie matoe mabo, 40nu batendile bune, Uwe musambuzi wa numba za kukumbamina, nu kuzobaka mu bindi bisatu, iyonie lino uwenyene! ndi uwe u Muana wa Kalaga, kasi igezie ku muti wa magu. 41Basankoga banene nu basanzi nu bakulu bamuililikile lingo, batendile bune, 42Onezie bango, tondo ntanavuama kuiyonia wenyene. We eli Mukota wa Isalele; kasi igezie ku muti wa magu, nuisue tuamukatizie. 43Akatizizie Kalaga; kasi Kalaga amonie kano kaluma, ndi ekumutunda; kubuno atendile bune, Nili Muana wa Kalaga. 44Nu babo beibi batakilue nage bamutendile nubo bubo lingo.

Kukua kua Yesu Klisto.

Mk. 15:33-41; Lk. 23:44-49; Yoana 19:30-37.

45Kutukila nkungu mutuba kuabede kapilo ga kisi kinsania nu kuika ku nkungu mubula. 46Nu mu nkungu mubula, Yesu alalukile neiyuki inene atendile, Eli, Eli, lama sabachthani? buisulilua, Kalaga wane, Kalaga wane, buni buwamenkela?#Luimbo 22:1. 47Bango babezaga bemana, gabongule ku bubo, batendile bune, Wono ekumana Eliya. 48Nu kazanga kongo ungo eitumine lubilo, akatile luata, nu aluiyazizie na maku mabezaga makali, nu abikilemo ku musumbo nu amunusizie. 49Bango batendile bune, Siga tanga, tumone ndi Eliya ekuvua kumonia. 50Yesu alalukile neiyuki inene lingo, nu eidekanizie. 51Nu nsulu zabezaga zakingua mu numba nene za kukumbamina zatikile bibe bibili kutukila kuigulu nu gansi, nu kisi kiatengiletengile nu makozi matikile; 52nu nsinda zalimbukile; nu bitumba bingi bia basuagibua, babezaga bakua bayukile; 53nubo gabatukile mu nsinda, kusila kua kuyuka kuage, beingide mu muino wasuagibua nu beingi babamonineko. 54Mukota wa bakoloboyo lukama, nu babezaga nage kulanga Yesu, gabamonine kisi kise kiatengatenga nu binsania biakitilue, bakule boba nunse, batendile bune, Lebelebe, wono abezaga Muana wa Kalaga. 55Nu bakikulu beingi babezaga gago balolelaga kulazikulazi, nubo babezaga ba ku Galela, ubabo bayangaga Yesu, nu kumukitila: 56mu babo muabezaga Malia Magadala, nu Malia nina wa Yakobo nu Yose, nu nina wa bana ba Zebedayo.

Bekubika Yesu mu Nsinda.

Mk. 15:43-47; Lk. 23:50-56; Yoana 19:38-42.

57Nu gabuabede buse muigolo, muntu umozi mugumi wa ku Alimataya avule, izina liage Yosefu, wozo wabezaga muigisibua wa Yesu: 58nu muntu wono endile ku Pilato, asegile kitumba kia Yesu. Kububo Pilato akakizizie buno, bamukasekio. 59Yosefu akatile kitumba, akivualikizie nsulu zenga zabota, 60nu akibikile mu nsinda zage nto, zabezaga muikozi: nu akumbizie ikozi inene, alibikile ku muingilo wa nsinda, nu endile. 61Nu Malia Magadala abezaga kuko nu ungo Malia, beikalaga buigi na nsinda.

62Gatingile busi bua kulongeka, babo basankoga banene nu baFalese bakundamene ku Pilato, 63batendile bune, Mukota, tukituakengela iyuki lia wozo muengelezi gabezaga ekili na kalamo, atendile bune, Nayuke lingo kusila kua bindi bisatu. 64Kakizia buno, nsinda zilangue aba nu kusila kua bindi bisatu, kubuno beigisibua bage banavua kuiba kitumba kiage, nu kubula bantu buno ayuka ku bakuzi; ndi bakita bubo, buengelezi bubo buzinda bunatinga butangi. 65Pilato ababuide bune, Inyue muli na balangi, endazi muzilange anga bumuizi. 66Beiyendede balangile nsinda busoga, babikile kamenyikilo ku lilio ikozi, balangi babezaga nabo.

Currently Selected:

Matayo 27: NTKI57

Highlight

Copy