Matayo 22

Musumo wa Kisagulo kia Muana wa Mukota.

Lk. 14:16-24.

1Nu Yesu abakuide nu abeisile lingo misumo, atendile bune, 2Bukota bua meigulu bualingimana na mukota umozi wakitile idia lia kisagulo kia muana wage, 3nu asingile bakambi bage kumana balagene nabo ku kisagulo: nu basombile kuvua. 4Asingile lingo bango bakambi ababuide bune, Bulazi bantu banalaganaga nabo bune, Idia liagoa, ngombe zane nu biana biane bia ngombe bianona biasesilue, binsania bise kayikayika: vuazi ku kisagulo. 5Tondo nubo babengile buatendaga, beiyendede, umozi kuisoa liage, nungo kukunzia biage; 6nu bango bakatile bakambi ba mukota, babakitile musumbia, nu babetile. 7Mukota abongedue; nu asingile bakoloboyo bage, buno bete babo beitani, nu bagisie muino wabo. 8Bubo, abuide bakambi bage bune, Idia lia kisagulo liagoa, tondo bantu banalaganaga nabo tabatananina. 9Endazi ku makano ma nzila, manazi bamuamonageko ku kisagulo. 10Nu bakambi bage bendile mu nzila, nu bakundamanizie bantu bansania babamonine kubo, babi nu basoga: mu numba za kisagulo muabezaga muiyala na bageni. 11Tondo gengide mukota ku kulola bageni, amonine ku wamulume uteli na nsulu zasuaga ku kisagulo: 12nu Mukota amubuzizie bune, Kilemba kiane, kubuni wengide, nu ntuli na nsulu zasuaga ku kisagulo? Wozo muntu eikede kibibi. 13Nu Mukota abuide bakambi bage bune, Mukandazi ku maboko nu ku magulu, nu nti muamuisa mu kapilo kumbuga; ukukaba kulila nu kubuga meinyo. 14Kubuno bantu beingi bekumanua tondo bakeke ubekusombolua.

Yesu Ekubula Bantu ba Helode Kitondo kia Idigo.

Mk. 12:13-17; Lk. 20:20-26.

15Ububo baFalese bendile kukala luango luabo buno bubanamukandika bitondo. 16Bamusingide beigisibua babo, nu bantu ba Helode, bamubuide bune, Musozi tuizi buno, uli bulili, nu ukuigisia bantu meigisia ma Kalaga mu bulili, nu ntukulonda bunene bua muntu wampa: kubuno ntukulola ku kilungi kia bantu. 17Buni bukukengela? Tubule tugu. Ndi buakulungana ku mulembe kuliga Kaisa idigo, aba kutaliga? 18Tondo Yesu amenyine makengelo mabo mabi, nu ababuzizie bune, Inyue bengelezi, buni bumukundindika? 19Ndololesiazi falanga zeidigo? Nu bavule na falanga zeidigo. #Mat. 18:28. 20Nu ababuide bune, Kikino kisusania nu mamano masanzo bili bia nazi? 21Bamubuide bune, Bia Kaisa. Nu ababuide bune, Kasazi Kaisa bili bia Kaisa; nu kasazi Kalaga bili bia Kalaga. 22Nu gabongule ku bubo, bangamine, nu bamusigile.

Yesu Ekubula Basadoke K uyuka kua Bantu ku Bakuzi.

Mk. 12:18-27; Lk. 20:27-40.

23Mu busi bubo Basadoke babo bekutendaga buno, takuli iyukilo, bamuvuilide, nu bamubuzizie bune, 24Musozi, Mose atendile bune, Ndi wamulume akua, nu ntasiga bana nti muto wage ayana mukazi, nti abutila iselenzi bana. 25Mutuli muabezaga mibuto mutuba kamo bandemozi; nu mutangi asongile mukikulu nu akule, nu ntabutile bana, nu asigide muto wage mukikulu wage; 26nu wababili abezaga nuwe bubo, nu wabasatu lingo, aba nu ku wa mutuba kamo. 27Nu gakule babo bansania, mukikulu nuwe akule. 28Muiyukilo nti akaba mukikulu wanazi mu babo mutuba kamo? Kubuno nawe nawamusongile. 29Tondo Yesu abakuide bune, Mukuibaga, kubuno tamukumenyininaga masanzo, aba magala ma Kalaga. 30Kubuno muiyukilo takukasongua aba nu takukasonganua, tondo babe anga migenzi za muigulu. 31Kubuno kuyuka kua bakuzi ku lukuo, ndi tamuasomine buamubulaga Kalaga bune, 32Nne nili Kalaga wa Abalahama, nu Kalaga wa Isaka, nu Kalaga wa Yakobo? Kalaga nteli Kalaga wa bakuzi, tondo wa balami. 33Nu gongule musanganano ku bubo bangamine na meigisia mage.

Yesu Ekubula baFalese Kitondo kia Mulembe wa Kalaga.

Mk. 12:28-31; Lk. 10:25-28.

34Tondo gongule baFalese buno, baSadoke tabamenyine bungo bubakula Yesu, bakundamene. 35Nu umozi wa ku beli abezaga ngatu za mulembe, amubuzizie buno amulindike. 36Musozi, kukakizia kukizi kuatinga kunene mu mulembe? 37Yesu amubuide bune, Tunda Mukota Kalaga wobe mu mutima wobe unsania, nu mu kalamo kobe kansania, nu mu menge mobe mansania. 38Kubuno kukuno ukukakizia kutangi nu kunene. 39Nu kuebili kuli bubo, utunde munyobe anga buwitunda uwenyene. 40Kubuno mu mamano makakizio mabili umuli mulembe unsania, nu bulengania.

Yesu Ekubuzia baFalese Bubakukengela ku Klisto.

Mk. 12:35-37; Lk. 20:41-44.

41Gabezaga baFalese bakundamana, Yesu ababuzizie ibuzio bune, 42Buni bumukukengela ku Klisto? eli muana wa nazi? Bamubuide bune, Eli muana wa Davidi. 43Kubuno Davidi wenyene atendile mu magala ma Muuza Wasililila, amumanine Mukota, atendile bune, 44Mukota atendile ku Mukota wane, Ikala ku kuboko kuane kua seidume, aba nu ganangate beiti bobe.#22:44 Labi lili izina lia Basozi banene ba Isalele. 45Ndi Davidi amumanaga bune, Mukota, kubuni eli muana wage? 46Nu takuli wamuakuide, aba kutukila busi bubo takuli wamubuzizie ingo mbuzio.

Currently Selected:

Matayo 22: NTKI57

Highlight

Copy