Matayo 20

Musumo wa Bakambi.

1Bukota bua meigulu bualingimana na nyene isoa wendile nindunindu kulonda bakambi bakumukambila muisoa liage lia biguma. 2Nu gagomezie nabo buno abalige falanga mutuba kamo ku muntu na muntu ku busi bumozi, abasingile muisoa liage. 3Nu gatingile nkungu isatu, endile, nu amonine ku bango bemana tugu geisoko; 4nu ababuide bune, Endazi muisoa liane namukase anga buakulungana. Nu bendile. 5Gatingile nkungu mutuba, nu nkungu mubula, endile lingo akitile bubo. 6Nu gatingile nkungu ikumi neimozi, endile, nu amonine ku bango bemana; ababuzizie bune, Kubuni inyue muemana tugu nkungu insania? 7Bamubuide bune, Takuli muntu ukutukasa mukambo. Nu ababuide bune, Endazi muisoa liane. 8Nu gabuabede buse muigolo, nyene isoa abuide mulangi wa biage bune, Mana bakambi, ubakase lukalilo luabo, nti walingila ku bazinda nu kusila ku batangi. 9Nu gavule babo ba ku nkungu ikumi neimozi bakasilue falanga mutuba kamo. 10Nu gavule babo batangi, bakengede buno, Isue tukutalikilua ingo falanga; tondo nubo bakasilue falanga mutuba kamo. 11Nu gabakasilue lukalilo luabo, babulilide nyene isoa bune, 12Babano bazinda bakitile mukambo nkungu imozi tugu, nu walingimania neisue, nuisue tuakitile mukambo busi bunsania, nu tuababazibua na musi. 13Tondo akuide umozi wa kubabo bune, Kilemba kiane, nsiakuagila; kubuno tuagomezie nobe ku falanga mutuba kamo tugu. 14Kata zozobe, nu wiyendele; nkutunda kukasa wozo ungo muzinda anga uwe. 15Ndi nsinamenya kukita na biane anga bunkutunda? Ndi liso liobe lili ibi kubuno nne nili musoga? 16Bubo bazinda bakaba batangi, nu batangi bakaba bazinda.

Yesu Ekubula Beigisibua Bage Kukua Kuage nu Kuyuka Kuage.

Mk. 10:32-34; Lk. 18:31-34; Mat. 12:38-40; 16:21; 17:22, 23.

17Nu Yesu gendaga ku Yelusalema na beigisibua bage ikumi nu babili bobenyene, nu gababede bese mu nzila, nu ababuide bune, 18Unguililazi, tukuenda ku Yelusalema; nu Muana wa muntu agabulue ku basankoga banene nu basanzi; nubo bamusungie buno akue, 19nu bamugabule ku baBilongo buno bamuililike, nu bamulibule, nu bamutake; nu ayukibue kusila kua bindi bisatu.

Yakobo nu Yoana Ninabo Ekubasegela ku Yesu.

Mk. 10:35-45.

20Nu nina wa bana ba Zebedayo avule na bana bage ku Yesu, amukumbamine, amusegile lusego lumozi. 21Nu amubuide bune, Ukutunda kikizi? Amutendile bune, Laga bana bane babili beikale mu bukota bobe, umozi kuseidume nungo kuseikazi. 22Tondo akuide bune, Tamukumenya kimukusega. Ndi munavuama kunua ku kituma kinkunua kukio? Bamutendile bune, Tunavuama. 23Ababuide bune, Lebelebe, Muanue ku kituma kinanue kukio: tondo kuikala ku kuboko kuane kua seidume, nu kuboko kuane kua seikazi, nsinavuama kumukasa; tondo kuikala kuko kuli ku bantu balongekedue na Tatane. 24Nu gongule beigisibua ikumi ku bubo, bongedue zezo mibuto zabo ibili. 25Tondo Yesu abamanine, ababuide bune, Muizi buno bakota ba baBilongo bekubangata, nu bakota babo bakubakitia. 26Tondo bubo tabube kumuli; tondo wozo ukutunda kuba munene kumuli abe mukambi wa banyage, 27nuwe ukutunda kuba mutangi kumuli abe mukambi wa banyage: 28kubuno Muana wa muntu ntavule kukambilua, nu kukasana kalamo kage ku bukuluzi bua beingi.

Yesu Ekuzibula Meiso ma Biuku Bibili.

Mk. 10:46-52; Lk. 18:35-43.

29Nu gabatukile ku Yeliko, musanganano munene wamuyangile. 30Nu bamulume babili biuku babezaga mu ntungo za nzila, gabongule buno, Yesu ukutinga, balalukile bune, Mukota, muana wa Davidi, tukuile kiombo. 31Nu bantu babazugide bune, Ikalazi kibibi; nu balalukile bune, Mukota muana wa Davidi tukuile kiombo. 32Nu Yesu emanine, nu abamanine, nu ababuzizie bune, Mukutunda nimukitile kikizi P 33Bamubuide bune, Mukota, tukutunda meiso meitu mazibulue. 34Nu Yesu abakuilide kiombo, nu etubizie ku meiso mabo; nu kazanga kongo, bamonine nu bamuyangile.

Currently Selected:

Matayo 20: NTKI57

Highlight

Copy