Matayo 10

Yesu Ekukakizia Beigisibua Bage, nu Kubasinga.

Mk. 6:7-13; Lk. 9:1-6.

1Nu amanine beigisibua bage ikumi na babili, abakasile buangato kutikia basumbu ba nsese, nu konia nsambo insania za nkita na nkita, nu bagongole ba nkita na nkita.

2Meina ma basingua ikumi na babili umamano: Wakulinga, Simona, bamuinikile buno, Petelo, nu muto wage Andele; nu Yakobo muana wa Zebedayo, nu Yoana muto wage; 3Filipo, nu Batolomayo; Toma, nu Matayo wabezaga mundelelombe; nu Yakobo muana wa Alufayo, nu Tadayo; 4nu Simona mu Kananayo; nu Yudasa Isakaliote, wozo wamugabuide. 5Babano ikumi na babili Yesu abasingile nu abakakizizie bune, Tamuende ku baBilongo, tamuingile mu muino wa kilongo kia baSamalia: 6tondo endazi ku mikoko zazimine za numba za Isalele. 7Nu gamukuenda sambalazi buno, Bukota bua meigulu buse buigi. 8Oniazi basambi, yukiazi bakuzi, engiazi beli na bibali, tikiazi basumbu: muakasilue buliabulia nuinyue kasanazi buliabulia. 9Tamueke olo aba feza, aba nsubi mu nsago zeinyu; 10aba kangonze ka lugendo, aba makoti mabili; aba bisalapata, aba musumbo: kubuno mukambi atananina neidia liage. 11Ndi muabasa mu muino munene nu muino mukeke, londazi bantu batananina; beli mumo, ikalazi mumo aba gamukatukamo. 12Tondo ndi museingila mu numba, nti sambiziazi beiya zezo numba. 13Tondo ndi beiya numba batananina, bubobelelo bueinyu bube ku beli: tondo ndi beiya numba tabatananina, bubobelelo bueinyu busubie kumuli. 14Tondo ndi muntu ntamusambizia, aba ndi ntakungua ku bumukutenda, nti muabasa mu zezo numba aba mu wozo muino, nu nti muatitula mukungu wa mu masindi meinyu. 15Lebelebe nkumubula bune, Lusungio lua wozo muino lukatinga lua Sodomo nu Gomola mu busi bua lusungio.

16Unguililazi, nkumusinga anga mikoko zili munkatini mua mboa za mu lubanda: umpanga mube na menge anga ma nzoka, nu anga tuzoni tua nkulimba tutekuitanaga. 17Tondo idangazi na bantu: bakamugabula ku nusu za milondo, nu bakamususula ku numba zabo za musanganano; 18nuinyue mukeikibua ku ngatu nu ku bakota banene ku kabamba kane, kuba balongeki kubeli nu ku baBilongo. 19Tondo gabakamugabula, tamulemanine buno, buni butuatende? kubuno mu nkungu zezo muabulue bumutenda. 20Kubuno ta inyue ubakatenda, tondo Muuza wa Soinyue ukatenda mu muli. 21Mubuto wa muntu akagabula mubuto wage buno akue, nu isi wa muana akagabula muana wage buno akue, nu bana bakabinga bababuta, nu bakabagabula buno bakue. 22Nu mukasombua na bantu bansania ku kambaba keizina liane: tondo wozo widindika aba nu kuzinda, nti ukonibua. 23Aba gabakasungibua mu muino wono, tininazi mu ungo: lebelebe, nkumubula bune, Tamukazindilizia nunse mino insania za balsalele aba gakavuila Muana wa muntu.

24Muigisibua ntegezie na musozi wage, aba mukambi ntegezie na mukota wage. 25Buasuagia muigisibua abe anga musozi wage, nu mukambi anga mukota wage. Ndi bamanine nyene numba bune, Mukota wa basumbu babi, tondo buni bukamanua bantu ba mu numba zage? 26Umpanga tamubakue boba; kubuno takuli kiabisilue, kitakabisulua; nu takuli kiakukidue, kitakokulua. 271 Impanga bunkumubula mu kapilo, bubulazi mu kiengi; nu bumukungua mu kutuzi, busambalazi gantata mutondo wa numba. 28Tamukue babo bekuita mubili boba, tondo tabanamenya kuita muntu wenyene; tondo kuazi wozo boba uli na magala kuzimizia muntu wenyene nu mubili mu kiziba kia keiya. 29Ndi tuzoni tubili tukeke tatunakunzua ku sengi? Nu kamozi takanakoloka gansi ndi Soinyue ntamenya: 30tondo nzuili insania za ku matoe meinyu zaganzilue. 31Tamukue boba: bukunza bueinyu buli bubibu kutinga tuzoni tuingi. 32Umpanga muntu unsania ukanitabizagia ku bantu, nunne nkamuitabizia ku Tatane uli muigulu. 33Tondo muntu unsania ukantunaga ku bantu, nunne nkamutuna lingo ku Tatane uli muigulu.

34Tamukengele buno navule kulusia bubobelelo ku kisi: nsiavule kulusia bubobelelo, tondo bupanga. 35Kubuno navule kuanzukania muntu neisi, nu mukinga na nina, nu mukamuana na ninabiala: 36nu babo ba numba za muntu ubakaba beiti bage. 37Wozo welama isi nu nina kuntinga ntantananina, wozo welama muana wage wa wamulume aba muana wage wa mukazi kuntinga ntantananina. 38Nuwe uteka muti wage wa magu, nu kunyanga, ntantananina. 39Muntu ukulanga kalamo kage nti akazimizia; nu wazimizia kalamo kage ku kabamba kane nti ukakamona.

40Nu wozo wamusekela nti ansekela, wozo wansekela nti asekela wozo wansingile. 41Wozo wasekela mulengania, buno eli mulengania; akakasua lukalilo lusoga ku kabamba ka mulengania: nuwe wasekela wisanana buno eisanana, akakasua lukalilo lusoga ku kabamba ka wisanana. 42Nuwe unsania ukakasaga umozi wa ku babano bakeke kituma kia mazi makuasa tugu buno eli muigisibua, lebelebe nkumubula bune, Ntakaziminua na lukalilo luage lusoga nunse.

Currently Selected:

Matayo 10: NTKI57

Highlight

Copy