Luka 5
5
Yesu Ekuita Biena Bingi.
Yoana 21:6-8.
1Gabeide musanganano wamutimbikania nu bonguililaga idagi lia Kalaga, nuwe abezaga emana buigi na kiziba kia Genesaleta, 2nu amonine ku mato mabili, mabezaga ku mutili wa kiziba: tondo bazubi bakimine, nu basugulaga tukila tuabo. 3Nu eingide mu buato bumozi buabezaga bua Simona, nu amutendile buno, ende buigi na ku mutili. Nu eikeide mu buato nu eigisizie misanganano. 4Nu gasilile kutenda, atendile Simona bune, Enda geiziba nu muise tukila tueinyu nu muzube biena. 5Nu Simona amuakuide bune, Mukota tuakitile mulimo munene mu kindi kinsania, tondo tatuitile kena: tondo kuiyuki liobe nkuenda kuzuba lingo. 6Nu gabakitile bubo, beitile biena bingi, nu tukila tuabo tuatikile; 7nu balambizizie banyabo maboko babezaga mu bungo buato, buno bavue kubakasia. Nu bavule nu beizazizie mato mabili, nu mabezaga buigi na kukoka. 8Nu gamonine Simona Petelo ku bubo, akomeine Yesu mazu, nu amubuide bune, Mukota, tuka kundi; nne nili muagi. 9Kubuno bangamine nage, nu babo babezaga gamozi nage, ku kitondo kia biena bingi bibeitile; 10nu Yakobo nu Yoana bana ba Zebedayo babezaga banyage na Simona, Nu Yesu atendile Simona bune, Ntunakua boba; kutukila kano kaluma wazube bantu. 11Nu gababulutile mato mabo ku mutili, basigile binsania nu bamuyangile.
Yesu Ekonia Muntu Wabezaga na Bibali.
Mat. 8:2-4; Mk. 1:40-44.
12Nu beikeide mu muino umozi, bamueine ku muntu umozi muiya bibali: nu gamueine ku Yesu, aguide bukukumania, nu amusegile, nu atendile bune, Mukota, ndi watunda, unavuama kunengia, 13Nu Yesu alambizie kuboko kuage, nu itubizie kueli, nu amubuide bune, Natunda; wenge. Nu kazanga kongo bibali biage biatukile. 14Nu amukakizizie buno ntasambalile ungo muntu: tondo enda, nu widolesie ku sankoga, nu ukasane ku kuengibua kuobe, anga buakakizizie Mose, kuba bulongeki kubeli. 15Tondo musagu wage wakukile ku biziki binsania; nu misanganano mingi zavule kumunguilila, nu konibua nsambo zabo. 16Tondo endile kusega mu kalula.
Yesu Ekonia Muntu Wabezaga Wakaka Biganza.
Mat. 9:2-8; Mk. 2:1-12.
17Nu busi bumozi Yesu eigisizie baFalese nu ngatu za mulembe nu babo batukile ku mino za Galela, nu za Yudaya, nu wa Yelusalema; nu magala ma Mukota mabezaga nage buno, onie. 18Nu bavule beka muntu umozi ga mugu wabezaga na lusambo lua kugilimina: nu balondile gabamuingizizia buno bamubike lisa nage. 19Nu tabamenyine gabamubika, kubuno bantu babezaga beingi, babakamine gantata ga mutondo, nu bamubasizie geitengu na mugu wage munkatini muabo lisa na Yesu. 20Nu gamenyine bukatizio buabo, amubuide bune, Wamulume, misako za buagi buobe zasigililua. 21Nu basanzi nu baFalese bakengede buno, Nazi wozo ukulinga Kalaga? Nazi unavuama kusigilila misako za buagi uteli Kalaga wenyene? 22Tondo Yesu amenyine makengelo mabo, atendile bune, Kubuni mukukengela bubo mu mitima zeinyu? 23Buni buatinga busoga, kutenda buno, Misako za buagi buobe zasigililua, aba kutenda buno, Zanzuka nu wende? 24Tondo inyue mumenye buno, Muana wa muntu eli na buangato mu kisi kusigilila misako za buagi (abuide musambi wagiliminaga), nkukubula bune, Emanuka, nu weke mugu wobe, nu wende kuobe ku numba. 25Nu kazanga kongo emanukile gabasamba, nu azanzuide wozo mugu wiyombekaga gago, nu endile kuage ku numba, aganuine Kalaga. 26Nu bansania bangamine, nu baganuine Kalaga; nu bakule boba, nu batendile bune, Tuamona lelo ku butemonekaga kubo lingo.
Kumanua kua Matayo.
Mat. 9:9; Mk. 2:13-14.
27Nu kusila kua bubo endile, nu amonine ku mundelelombe wamanagua Lewi, abezaga eikile ku mulimo wa kuligia idigo, nu amubuide bune, Nyange. 28Nu asigile binsania, nu azanzukile nu amuyangile.
Yesu Ekutenda na baFalese.
Mat. 9:10-17; Mk. 2:16-22.
29Nu Lewi akitile kisagulo kinene muage mu numba: nu bandelelombe beingi nu bango bantu balile nabo. 30Nu baFalese nu basanzi babo babezaga na miango na beigisibua bage, batendile bune, Kubuni mukulia nu kunua na bandelelombe nu bagi? 31N u Yesu abatendile bune, Utakusamba ntaneiyanina musakizi; tondo babo bakusamba. 32Nsiavule kumana beisanana tondo bagi buno beiyanie.
33Nu bamubuide bune, Kubuni beigisibua ba Yoana nu beigisibua ba baFalese bakugila nu kusega; tondo bobe bekulia nu bekunua. 34Nu Yesu ababuide bune, Ndi munavuama kugizia beida ba musongi, nkungu zibeli na musongi? 35Tondo bindi biavue gatikibue musongi ku babo, nu bagile mu bindi bibio.
Musumo wa Nsulu nu wa Tutembe.
Mat. 9:16, 17; Mk. 2:21, 22.
36Nu abeisile ungo musumo: Takuli muntu umozi unalanda kibe kia nsulu za mubalabala ku nsulu za mukungio; nu ndi kikio kibe kia nsulu za mubalabala kiatika, nu kibe kia mubalabala takinalingimana na zezo za mukungio. 37Nu takuli muntu ukongolaga maku meituba mu tutembe tukulu; bubo maku meituba nti mabugia tuto tutembe, nu mamo maku nti makubuka, nu tutembe tuto nti tuabiga. 38Tondo buatunganana kubika maku meituba mu tutembe tuto. 39Nu takuli muntu unanua maku ma masongo nu kutunda lingo maku meituba; kubuno anatenda buno, ma masongo meli masoga.
Currently Selected:
Luka 5: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
