Luka 21
21
Sengi za Mukikulu Musigala.
Mk. 12:41-44.
1Nu alambuide meiso, nu amonine ku kuisa bagumi nkaso zabo muisuku. 2Nu amonine ku musigala umozi muzambi isaga sengi ibili. 3Nu atendile bune, Lebelebe nkumubula buno, Wono musigala muzambi eisa kutinga bango bansania: 4kubuno babano bansania batikia nkaso ku bikulo biabo bingi; tondo wono isa binsania biage.
Yesu Ekubula Kulebibua kua Numba za Kalaga ku Muiduko.
Mat. 24:1, 2; Mk. 13:1, 2.
5Nu bamozi batendaga musagu wa numba za kukumbamina, buzabezaga zalebibua na makozi masoga nu nkaso, nu atendile bune, 6Bibio bimukumonako, mu bindi bikavua, takukasigala ikozi gantata geikozi, litakabungulua.
Yesu Ekutenda na Beigisibua Bage ga Muiduko wa Oleve.
Mat. 24:3-14; Mk. 13:3-13.
7Nu bamubuzizie bune, Musozi, buni bukaba bitondo bibino? nu ku kalolesio kakizi kabakamenyinina buno, bitondo bibino bise buigi? 8Nu atendile bune, Idangazi, buno muntu ntamuengelele: kubuno beingi bakavua muizina liane, nu kutenda buno, Nnowe, nu nkungu zise buigi; tamubayange. 9Nu mukongua ku misagu za bita, nu misona, tamukue boba: kubuno buatungana na tanga bitondo bibino bilinge kuvua: tondo kuzinda takuika.
10Nu abatendile bune, Kilongo kikaluana na kingo kilongo, nu bukota bukaluana na bungo bukota; 11nu kukaba tulingini tunene tua kisi, nu kukaba munganda nu maganogano mu lulenge na lulenge; nu tulolesio tua boba nu tulolesio tunene tukatuka kuigulu. 12Tondo gakaba bunsania tabuba, bakalinga kumukata, nu kumusungia, nu bakamugabula ku numba za musanganano nu kumubika mu bikando, nu bakamubasia ku bakota banene nu bangati ku kabamba keizina liane. 13Nu bubo bukamugalukila bulongeki. 14Kengelazi tanga buno tamulemanine bumuakule: 15kubuno nkamukasa buakuakula nu menge, butanavuama kuakania babo bansania bamusomba. 16Tondo mukagabulua na bamubuta, nu mibuto zeinyu, nu baneinyu, nu beida beinyu; nu bamozi kumuli bakagabulua buno bakue. 17Nu mukasombua na bantu bansania ku kabamba keizina liane. 18Nu luzuili lumozi lueitoe lienyu talukazimina. 19Ku komanizia keinyu mukonia tulamo tueinyu.
Yesu Ekutenda na Beigisibua Bage ku Muiduko wa Oleve: Bukatimba Yelusalema.
Mat. 24:15; Mk. 13:14.
20Tondo gamukamona Yelusalema unsania atimbua na mazombo, bubo mumenyinine buno kubiga kuage kuse buigi. 21Nu babo beli mu Yudaya batine ku miduko; nu babo beli mu Yelusalema batukemo; nu babo beli mu masoa tababase mu muino lingo. 22Kubuno, bindi bibio bili bia musubo, ku bubo ukuzindilila kua binsania biasanzilue. 23Kabebe ku beimisu nu bakumomia mu bindi bibino! kubuno kukaba kabebe kanene mu kisi, nu bongoa ku bantu babano. 24Nu baketua na bupanga, nu bakekua nu kukandua ku bilongo binsania; nu Yelusalema akangatua na baBilongo, aba nu nkungu za kuzindilila kua baBilongo.
Yesu Ekutenda na Beigisibua Bage ku Muiduko wa Oleve ku Kusubia Kuage kua Mabili.
Mat. 24:29-31; Mk. 13:24, 25.
25Kukaba tukengelezio ku kisongo kia busi nu ku muezi nu nkeninkeni; nu ku kisi kukaba kabebe ka bilongo, ku kabamba ka kubila kua kitatenge nu bimpumi biakio: 26bantu bakatika mitima na boba. Nu kulemanina kua bitondo biabase ku kisi; kubuno magala ma meigulu makatengatenga. 27Nu bakamona Muana wa muntu ekuvua mu kimpa na magala nu lutanuno luage lunene. 28Nu gakalinga kuba bunsania, langamanazi nu sakikazi matoe meinyu; kubuno bukuluzi bueinyu buse buigi.
Yesu Ekutenda na Beigisibua Bage ku Muiduko wa Oleve bua Muti wa Mizigi za Biguma.
Mat. 24:32, 33; Mk. 13:28, 29.
29Nu abeisile musumo bune, Lolazi muti wa figi, nu miti insania: 30kungua zise zatempula nti muamenye buno nkungu za nzogo zise buigi. 31Nu gamukamona ku bubuno, menyazi buno bukota bua Kalaga buse buigi. 32Lebelebe nkumbula bune, Kibuti kikino takikatinga, aba nu gakazindilila binsania. 33Igulu nu kisi bikatinga: tondo malagi mane tamakatinga nunse.
Yesu Ekutenda Beigisibua Bage ku Muiduko wa Oleve. Buno Bamulange Busi na Busi.
Mat. 24:34-51; Mk. 13:30-37.
34Idangazi, tamutambie mitima zeinyu ku buliagundu nu kukatua na maku, nu kuikutia ku kalamo keinyu, nu kindi kikio kinamuvuila kitangala besi anga bukonagia itega: 35kubuno bubo ubukabasila bansania beli ga kisi. 36Tondo kesiazi ntende nu segazi nkungu insania buno monibue mu binsania biavue, nu kuemana ku Muana wa muntu.
37Na busi na busi eigisagia mu numba za kukumbamina, nu mu kindi na kindi endaga kuiyombeka ku muiduko wamanagua Oleve. 38Nu mu nindunindu bantu bansania bendaga ku numba za kukumbamina kunguilila buatendaga.
Currently Selected:
Luka 21: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
