Luka 19

Zakayo Ekugalukia Misako Zage.

1Nu gabasile Yesu mu Yeliko, atingile mu muino. 2Nu kuabezaga muntu umozi mugumi, wamanagua Zakayo; mukota wa bandelelombe, 3nu alondaga kumona ku Yesu buno eli muntu wa lukita lukizi; nu ntamumonineko kubuno kuabezaga musanganano munene wa bantu, nu wozo abezaga muntu muigi. 4Nu eitumine lubilo luabusio, nu abakamine ku muti wa kinsembe, buno embe anamumonako; kubuno atingaga gago. 5Nu gabasile Yesu gago, agalamine kuigulu nu amutendile bune, Zakayo, sasia kugela, kubuno nkuikala mu numba zobe lelo, 6Nu Zakayo asasizie kugela, nu amusekeide na mbogimbogi. 7Nu gabamonine ku bubo, bakitile manungunungu, nu batendile bune, Enda kuikala kua muntu wa buagi. 8Nu Zakayo emeine, atendile ku Mukota bune, Unguilila, Mukota, kindi kia bikulo biane nakasa bazambi; nu ndi neibile kia muntu umozi, nti namusubizie kio mambizi manazi. 9Nu Yesu amutendile bune, Lelo lonio luabasa mu numba zeno, kubuno wono nuwe eli muana wa Abalahama. 10Kubuno Muana wa muntu avule kulonda nu konia wozo wazimina.

Musumo wa Falanga Ikumi.

Lk. 17:21; Mat. 25:14-30; Misako 1:6-8.

11Nu gabongule ku bubo, abeisile ungo musumo, kubuno abezaga ese buigi na Yelusalema, nu bo bakengeide buno bukota bua Kalaga buasasia kumoneka. 12Nu atendile bune, Muntu munene umozi endile ku kingo kisi kia bulazi, kukasua bukota buage nu kusubia lingo. 13Nu amanine bakambi bage ikumi, nu abakasile bibombo ikumi, nu abatendile bune, Kunziazi aba nu ganavua. 14Nu banyage bamusombile, nu basingile mugenzi kumbusa kuage, kumutenda buno, tatukuziga muntu wono kutuangata. 15Nu gasubizie lingo eseli na bukota buage, nu akakizizie babo bantu bamanue kueli, babo bakambi bakasaga bikulo, nu amenye mutali wamonine mukambi na mukambi. 16Nu mutangi atendile bune, Mukota, bikulo biobe biamona mutali lingo ikumi. 17Nu amutendile bune, Wakita busoga, mukambi musoga: kubuno wabeide mukatizia ku bitebingi, ukuba muangati wa mino ikumi. 18Nu wa babili avule, atendile bune, Mukota, bikulo biobe biamona mutali wa bingo bitano. 19Nu amutendile bune, Angata nu uwe mino itano. 20Nu ungo avule, nu atendile bune, Mukota, bikulo biobe bibino, nabilangile mu nsulu: 21kubuno nakukuaga boba, kubuno uli muntu mukali: ukutolaga bitabikile, nu ukutubulaga biutayikile. 22Nu amutendile bune, Nkukusungia ku kako kanua kobe, uwe mukambi mubi. Uwe wamenyaga buno nili mukali, nkutolaga bintabika, nu nkutubulaga bintayikile; 23kubuni kutabikile bikulo biane ku babo beli neisuku lia kulanga bikulo nu gakusubia kuane nabisangile na mutali? 24Nu atendile babo babezaga beimine buigi bune, Munyagazi kikio kibombo, nu mukase wozo uli na bibombo ikumi. 25Nu bamutendile bune, Mukota, eli na bibombo ikumi. 26Nkumubula bune, Wozo uli na kena akakasua; tondo uteli na kena, akanyagua aba kako keli nako. 27Tondo babo beiti bane, batakutunda nibangate, vuazi nabo gano, beitazi nti nkumona.

28Nu gasilile kutenda bubuno, abakamine kuenda ku Yelusalema.

Yesu Ekubasa ku Yelusalema na Lutanuno.

Mat. 21:1-9; Mk. 11:1-10.

29Nu gabeide ese buigi na Betapage nu Betania, ku muiduko wamanagua Oleve, asingile babili ku babo beigisibua, 30atendile bune, Endazi aba nu ku muino uli luabusio lueinyu; nu gamuabase mumo muamone ku muana wa mpunda asuikua, utetetelagua geli: nti muazisula, nu kuvua nazo. 31Nu ndi muntu amubuzia bune, Kubuni muazisula? tendazi bune, Mukota akuiyaninazo. 32Nu babo basingilue bendile, nu bamonine ku bubo buababuide. 33Nu gababezaga besasula muana wa mpunda batendile bune, Kubuni mukusula muana wa mpunda? 34Nu babatendile bune, Mukota akuiyaninazo. 35Nu bavule nazo ku Yesu: nu babikile nsulu zabo gantata ga muana wa mpunda, nu Yesu eikede gantata gazo. 36Nu gabezaga esenda, banzile nsulu zabo mu nzila. 37Nu gabeide ese buigi na kugela muiduko wa Oleve, musanganano wa beigisibua bage babogilebogile nu kuganuna Kalaga neiyuki inene ku kabamba ka migeleko mingi zibamonine kuzo; 38nu batendile bune, Mbogimbogi ku Mukota munene ukuvua muizina lia Mukota; bubobelelo muigulu, nu lutanuno kuigulu. 39Nu baFalese bamozi babezaga mu musanganano bamubuide bune, Musozi, zugila beigisibua bobe. 40Nu abatendile bune, Nkumubula buno, ndi beikala kibibi makozi nti malaluka.

Yesu Ekulilila Yelusalema.

Lk. 13:34, 35.

41Nu gabezaga buigi amonine ku muino, nu agulilide, 42atendile bune, Songo wamenyaga buno busi buenyu, nu bitondo biabezaga bia bubobelelo buenyu! tondo kano kaluma biabisua kumuli. 43Kukavua bindi bia beiti beinyu bakamobakila bitutu, bakutimba nabio, nu bakukulumania nabio ku ndenge insania; 44nu bakamugusia gansi, uwe nu bana beli munda mueinyu; nu tabakasiga ikozi gantata geikozi; kubuno tamuizi nkungu zimualolilue.

Yesu Ekuyanga Bantu Bakunzagia mu Numba za Kukumbamina.

Mat. 21:12-16; Mk. 11:15-18; Yoana 2:13-17.

45Nu eingide mu numba za kukumbamina Kalaga, #Yesaya 56:7. nu alingile kuimbia babo bakunzaga, 46nu abatendile bune, Buasanzilue bune, Numba zane zabe numba za masego: tondo inyue muazigalukia anga numba za banyagi. #Yelemia 7:11.

47Nu eigisizie busi na busi mu numba za kukumbamina Kalaga. Tondo basankoga banene nu basanzi nu bakulu ba bantu balondile bubemuita; 48nu tabamonine bubekita; kubuno bantu bansania bamuyangaga nu bamunguililaga.

Currently Selected:

Luka 19: NTKI57

Highlight

Copy