Luka 1
1
Musagu Musoga Wasanzilue na Luka. Iyuki Itangi.
1Kubuno bantu beingi babikile maboko mabo kukulumizia bitondo bia wozo musagu biazindilila munkatini mueitu 2anga bubatuekeidego babo bamonaga nu bakiti beidagi, 3nunne namonine buno buli busoga, kubuno nayangile wozo musagu nunse kutukila ku kulinga kuago, kukusanzila mukota Teofilo; 4buno umenyinine nunsania malagi mawigisizibue.
Kubutua kua Yoana Mubatizi Kuatendilue nti Ntebutua.
5Wakalazi mu indi bia Helode, mukota wa Yudaya; kuabezaga sankoga umozi, izina liage Zakalia, mu kibombo kia Abiya; nu mukazi wage abezaga umozi wa ku bana bamukazi ba Alona, izina liage. Elizabeta. 6Nubo babili babezaga beisanana ku Kalaga, banzile makakizio mansania ma Mukota kuteli neitondoki. 7Nu tababezaga na muana, kubuno Elizabeta abezaga mugumba, nubo babili babezaga bese bakungu.
8Nu gakitaga mulimo wa busankoga ku Kalaga, mu kikanga kiage, 9anga buabezaga lukita lua busankoga, abasile buno eingile mu numba za kukumbamina za Mukota nu agulumizie aliga. 10Nu musanganano unsania wasegaga kumbuga ku nkungu zakugulumizia aliga. 11Nu mugenzi wa Mukota wamubaside, nu emanine kibe kia kuidume kia kayulo ka kugulumizia aliga. 12Nu Zakalia gamumueineko azangilezangile, nu akule boba. 13Tondo wozo mugenzi wamubuide bune, Zakalia, ntunakua boba: kubuno masego mobe mongubua, nu mukikulu wobe Elizabeta abute muana wamulume, nu wamuinike izina buno, Yoana. 14Nu wabe na mbogimbogi nu klelele; nu beingi bakabogaboga mu kubutua kuage. 15Kubuno akaba munene kua Mukota, nu ntakanua maku aba bingo bilubaba; nuwe elyale na Muuza Wasililila, kutukila munda za nina. 16Nu akagalukia bengi mu baIsalele ku Mukota Kalaga wabo. 17Nuwe akalinga kuenda luabusio luage mu muuza nu mu magala ma Eliya, kugalukia mitima za beisibo ku bana babo, nu kugalukia banani ku menge ma beisanana; nu kubika bantu kayikayika ku Mukota. 18Nu Zakalia abuide mugenzi bune, Buni bunamenye bubuno? kubuno nise mukungu, nu mukikulu wane nuwe ese mukungu nunse. 19Nu mugenzi amutendile bune, Nne u Gabulie ukuemanaga ku Kalaga; nunne nasingilue buno nitende nobe, nu kukusambalila misagu zeno misoga. 20Unguilila, ukuba kaluma, ntuavuame kutenda aba nu busi bukaba bubuno, kubuno ntuakatizia malagi mane, nu makazindilila ku nkungu zamo. 21Nu bantu balindilaga Zakalia, nu bangamine na buizizizie mu numba za kukumbamina. 22Nu gatukile, ntavuamine kutenda nabo: nu bamenyine buno amona ku kalolesio mu numba za kukumbamina; atendaga nabo na maboko tugu, bubo bamenyine buno eseli kaluma. 23Nu gasilile bindi bia kukita kuage, endile ku numba zage.
24Nu kusila kua bibio bindi mukikulu wage, Elizabeta, eikile iyimi; eibisile miezi itano, nu atendile bune, 25Bubuno buankitila Mukota andola, buno antikie nsoni zane ku bantu.
26Nu ku muezi wa mutuba mugenzi Gabulie asingilue na Kalaga kuenda ku muino ku Galela, izina liago Nazaleta, 27ku mukinga umozi wabezaga ntemenya wamulume, wandagua na Yosefu wa numba za Davidi, nu izina lia wozo mukinga liabezaga Malia. 28Nu mugenzi wamuvuilide, wamutendile bune, Samba uwe wakitua mponga, Mukota eli nobe, wakitua mponga kutinga bango bakikulu banyobe. 29Tondo angamine kuidagi lilio, nu akengeide buno kusambizia kukizi kukuno? 30Nu mugenzi wamutendile bune, Ntunakua boba Malia; kubuno wakitua mponga na Kalaga. 31Unguilila, uwe weke iyimi, nu wabute muana wamulume, wamuinike izina buno YESU. 32Nu wono akaba munene, nu akamanua Muana wa wozo Uli Kuigulu nunse: nu Mukota Kalaga akamukasa kisumbi kia buangato, kiesi Davidi: 33nu akangata numba za Yakobo nkiko zitanakuzinda; nu bukota buage tabunakuzinda. 34Nu Malia abuide mugenzi bune, Buni buabe bubuno, kubuno nsimenya wamulume? 35Nu mugenzi wamutendile bune, Muuza Wasililila akuvuile, nu magala ma Wozo Uli kuigulu nunse: makukukile anga kilimelime: kubuno wozo wasililila wabutue kuobe amanue Muana wa Kalaga. 36Unguilila, Elizabeta mubuto wobe, ekile iyimi lia muana wa mulume mu bukungu buage; ese miezi mutuba, wozo wamanagua mugumba. 37Kubuno takuli butanakulungana ku Kalaga. 38Malia atendile bune, Nili mukiti wa Mukota; nu bubo buwantendile bumbele. Nu mugenzi amusigile.
Malia Ekuvua Kulola Elizabeta.
39Mu nkungu zezo, Malia azanzukile nu asasizie kuenda ku kisi kia miduko, mu muino wa Yuda; 40nu eingide mu numba za Zakalia nu asekeide Elizabeta. 41Nu gongule Elizabeta ku musekelo wa Malia, muana eikulunguide munda; nu Elizabeta eiyazizibue na Muuza Wasililila; 42nu alalukile neiyuki inene, nu atendile bune, Wakitua mponga kutinga bango bakikulu banyobe, nu muana wobe wakitua mponga. 43Buni buambela bubuno, buno nina wa Mukota wane anvuile? 44Kubuno ganungua ku musekelo wobe, nu muana eikulungula munda zane na mbogimbogi; 45nu mbogimbogi ku wozo wakatizizie; kubuno bubo buabuidue na Mukota buzindilile. 46Nu Malia atendile bune,
Malia Ekuganuna Kalaga.
Mutima wane ukuganuna Mukota,
47Nu muuza wane wasila kubogaboga ku Kalaga Monia wane.
48Kubuno alolile lukita lua mukiti wage:
Kutukila lelo bibuti binsania bikamana buno, wakitua mponga.
49Kubuno wozo uli na magala ankitila bunene;
Nu izina liage lili liasililila.
50Nu kiombo kiage kili ku bibuti na bibuti kubabo Bakumukua boba.
51Akitile magala na kuboko kuage;
Akegezie bekuikotia mu makengelo ma mitima zabo.
52Atikizie bangati ga bisumbi biabo bia buangato,
Nu kusakika basigulila.
53Embukia babo bakuaga na nzala busoga;
Nu enzia bagumi tabeli na kampa.
54Akasizie mukiti wage, Isalele,
55Buno akuile Abalahama kiombo nu kikanga kiage ku nkiko zitanakuzinda.
(Anga buatendile ku batateisue).
56Nu Malia eikeide nage miezi isatu, nu asubizie ku numba zage.
Kubutua kua Yoana Mubatizi.
57Gakukile nkungu za kubuta kua Elizabeta abutile muana wamulume. 58Gongule beida bage nu kikanga kiage buno Mukota amukuila kiombo nunse, babogilebogile nage. 59Gakukile bindi kinana, bavule kumonesia wozo muana; nu batundaga kumuinika izina lieisi, Zakalia. 60Nu nina atendile bune, Tabubo; tondo akuinikua Yoana. 61Bamutendile bune, Takuli muntu umozi mu kikanga kienyu ukumanagua izina lilino. 62Nu batendile isi na maboko buno, bamenye buamumane. 63Nu atundile lubabu lua kusanza nu asanzile buno, izina liage lili Yoana. Nu bansania bangamine. 64Nu kazanga kongo kanua kage kakandukile nu lulami luage luakandukile, nu alingile kutenda, aganuine Kalaga. 65Nu bansania babezaga beikala buigi nabo bakule boba: nu misagu zezo zakukile ku kisi kinsania kia miduko za Yudaya. 66Nu bansania babunguleko babubikile mu mitima zabo, batendile bune, Wozo Muana abe buni? Kubuno kuboko kua Mukota kuabezaga nage. 67Nu isi, Zakalia iyeide na Muuza Wasililila, nu alenganizie bune,
68Aganunue Mukota Kalaga wa Isalele;
Kubuno avuila bantu bage;
Nu kubakulula,
69Nu atuzanzulila iyega lia lonio.
Mu numba za Davidi mukambi wage.
70(Anga buatendile ku tunua tua balengania babezaga wakalazi),
71Lonio luatutikia mu maboko ma beiti beitu nu ku maboko
ma bansania batusomba;
72Buno akuile batateisue kiombo.
Nu kukengela idagano liage liasililila.
73Nu kilumbilo kialumbide tateisue Abalahama,
74Akatukasa ndi tona mu maboko ma beiti beitu nti tuamukitila kuteli boba.
75Mu kusililila nu mukuisanana kueli bindi binsania mu kalamo keitu.
76Nu uwe muana, wamanue mulengania wa Wozo Uli Muigulu nunse:
Kubuno walinge kuenda luabusio lua Mukota kukunga nzila zage;
77Kukasa bumenyinino bua lonio ku bantu bage.
Mu kusigililua kua misako za buagi buabo.
78Ku kiombo kia Kalaga weitu,
Mu kiengi kiatukile kuigulu nu kutusanina.
79Kusanina bansania beli mu kapilo nu mukilimelime kia lukuo;
Nu kusondelezia magulu meitu mu nzila za bubobelelo.
80Nu wozo muana akulile, eitide na magala mu muuza, nu abezaga mu kalula aba mu busi bualolesizibue ku balsalele.
Currently Selected:
Luka 1: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
