Yoana 6

Yesu Ekulisia Bantu Bakuka Tununu Tutano.

Mat. 14:13-31; Mk. 6:32-44; Lk. 9:10-17.

1Gasilile Yesu bubo, endile ku lisilia lia kiziba kia Galela, kili kiziba kia Tibelia. 2Nu musanganano munene wamuyangile, kubuno bamonine migeleko zakitile ku basambi. 3Nu Yesu abakamine ku muiduko, nu eikede kuko na beigisibua bage. 4Nu kisagulo kiesuluko lia baYuda, kiabezaga buigi. 5Yesu alambuide meiso, nu amonine ku musanganano munene gukumuvuila, abuzizie Filipo bune, Kuni kutukukunzila tumpampa tubalia? 6Nu amutendaga bubo tugu kumugeleka: kubuno wenyene amenyaga buakite. 7Filipo amuakuide bune, Tumpampa tua falanga kanunu kamozi nkama mutubakamo tatunakuka, muntu na muntu analia tugu lubobu. 8Ungo muigisibua, Andele, muto wa Simona Petelo, amuakuide bune, 9Gano geli musikila, eli na tumpampa tutano, nu biena bibili: tondo bibino buni bubinakuka ku bantu beingi? 10Yesu ababuide bune, Ikaziazi bantu gansi. Kuabezaga bisugu bingi. Bubo bamulume beikede, babezaga bakuka tununu tutano. 11Yesu atolile tumpampa; nu gasegile, abeganizizie babo babezaga gansi; nu bibio biena anga bubatundaga. 12Nu gabekutile, abuide beigisibua bage bune, Songiazi zezo mbobu zasigala, takuzimine luampa. 13Nu basongezie, nu bezazizie nzi ikumi neibili za zezo mboau za tuto tumpampa tutano zasigalaga kubaliaga. 14Gamonine bantu ku mugeleko wozo wakitile, batendile bune, Lebelebe, wono eli mulengania ukavua ku kisi.

Yesu Ekutabanga Gantata ga Mazi.

Mat. 14:22-36; Mk. 6:45-56.

15Gamenyine Yesu buno bekutunda kumueka ku magala, buno bamubike mukota, endile lingo wenyene ku muiduko.

16Geidile busi, beigisibua bage bendile ku kiziba; 17nu bengide mu buato, basokile lisilia lia Kapenuma. Nu kuabezaga kuseli kapilo, nu Yesu ntabezaga nabo. 18Nu kiziba kiabezaga na bimpumi binene kubuno kuabezaga kisoa. 19Gabalugile buato bendile bulazi bua kilometele inazi aba itano, bamonine Yesu ekuenda gantata ga kiziba, avule buigi na buato: nu bakule boba. 20Tondo Yesu ababuide bune, Nne wono tamunakua boba. 21Umpanga bamuitabizizie kuingila mu buato: nu buato buasasizie kubasa kuisokelo.

Yesu eli Kampampa ka Kalamo.

22Gakede busi, bantu bemene lisilia lia kiziba bamonine takuli bungo buato tugu bumozi; bamenyine buno, Yesu ntengide mu buato na beigisibua bage, umpanga beigisibua bendile bobenyene 23(tondo mato makeke matukile ku Tibelia mavule buigi na gabalilaga tumpampa, gasegaga Mukota): 24gamenyine bantu buno, Yesu ntabezaga kuko, aba nu beigisibua bage tababezagako, bengide mu mato bobenyene, nu bavule ku Kapenuma kulonda Yesu. 25Nu gabamumonineko lisilia lia kiziba, bamubuzizie bune, Labi, nkungu nkizi ziwavule kuno? 26Yesu abakuide bune, Lebelebe, lebelebe, nkumubula bune, Inyue mukundonda, ta kubuno muamonine ku mugeleko umpanga, tondo kubuno mualile tumpampa, nu muikutile. 27Tamukite mulimo kuidia likubiga, tondo kuidia litanakubiga, aba ku kalamo katanakuzinda, lilio likamukasa Muana wa muntu; kubuno we uwabikilue kamenyikilo nelsi u Kalaga. 28Bamubuzizie bune, Buni butukita butunakita milimo za Kalaga? 29Yesu ababuide bune, Wono u mulimo wa Kalaga kukatizia wasingilue. 30Bamubuzizie bune, Ukukita mugeleko mukizi? tumone kugo, nu tunakukatizie. Buni bukukita? 31Batateisue baliaga mana mu kalula; anga buasanzilue bune, We akabakasa kampampa ka muigulu kukalia. 32Yesu ababuide bune, Lebelebe, lebelebe, nkumubula bune, Mose ntamukasile kampampa ka muigulu; tondo Tatane amukasile kampampa ka bulili ka muigulu. 33Kubuno kampampa ka Kalaga ukako katukile muigulu, nu kukasa kisi kalamo. 34Bamubuide bune, Mukota, tukasage kampampa kakano bindi binsania. 35Yesu ababuide bune, Nili kampampa ka kalamo: unsania wavua kundi ntakakua na nzala, nu wankatizia ntakakua na mpusia. 36Tondo namubulile bune, Muamonineko, nu tamuankatizizie. 37Bansania bankasile Tatane bakavua kundi; nu unsania wavua kundi, nsikamuisa kumbuga. 38Kubuno nsiatukile muigulu kukita kusombola kuane tondo kusombola kua wozo wansingile. 39Nu kukuno u kusombola kua wansingile buno, nsizimizie umozi wa babo banakasilue, tondo nimuyukie ku busi buzinda. 40Bubo u kusombola kua Tatane buno, muntu unsania ukumona ku Muana, nu kumukatizia, eli na kalamo katanakuzinda; nunne namuyukie ku busi buzinda.

41BaYuda babede na manungunungu, kubuno we atendile bune, Nili kampampa ka muigulu. 42Bamutendile bune, Ndi wono nteli Yesu muana wa Yosefu, tuizi isi nu nina? kubuni ekutenda bune, Natukile muigulu? 43Yesu abakuide bune, Tamuneizuzuma. 44Takuli muntu unavuama kuvua kundi ndi ntabulutua na Tatane wansingile: nunne nti namuyukie mu busi buzinda. 45Balengania basanzile bune, Bansania bakeigisibua na Kalaga. Muntu unsania ungule ku Tatane nu kumenya meigisia mage, nti ekuvua kundi. 46Takuli muntu wamonine ku Tatane, umpanga wozo watukile ku Kalaga, we uwamonine kuIsi. 47Lebelebe, lebelebe, nkumubula bune, Unsania wankatizia eli na kalamo katanakuzinda. 48Nili kampampa ka kalamo. 49Basoinyue balile mana mu kalula, nu bakule. 50Kakano kampampa katukile muigulu, buno ndi muntu alia kuko, ntakue. 51Nne U kampampa ka kalamo katukile muigulu: ndi muntu alia ku kampampa kakano, akalamaga kalamo katanakuzinda: lebelebe, kampampa kankakasana u mubili wane, kanakasane kuba kalamo ka kisi.

52BaYuda babezaga bakuakanania, batendile bune, Buni bunavuama muntu kutukasa mubili wage buno tugulie? 53Yesu ababuide bune, Lebelebe, lebelebe, nkumubula bune, Ndi tamualia ku mubili wa Muana wa muntu nu kunua ku mikila zage, nti mumuli tamuli kalamo. 54Unsania ukulia ku mubili wane, nu kunua ku mikila zane, eli na kalamo katanakuzinda, nu nkamuyukia ku busi buzinda. 55Kubuno mubili wane uli idia lia bulili, nu mikila zane zili zakunua za bulili. 56Unsania walia ku mubili wane nu kunua ku mikila zane eli mundi, nunne mueli. 57Anga bukulamaga Tatane wansingile, nunne nkulamaga ku Tatane; bubo nuwe wandia, nti akalamaga mundi. 58Kakano keli kampampa katukile muigulu; takeli anga mana maliaga basoinyue, nu bakule; tondo unsania walia ku kampampa kakano akalamaga kalamo katanakuzinda. 59Yesu atendile bubo mu numba za kukumbamina, gegisagia ku Kapenuma.

Yesu Ekugeleka Beigisibua Bage.

Mat. 8:19-22; 10:36.

60Beigisibua bamozi bage gabongule ku bubo, batendile bune, Bubuno buli bubibu; nazi gunabungua? 61Yesu amenyinine wenyene buno, beigisibua bage bekuizuzuma na bubo, ababuide bune, Buni bukumuinia bubuno mitima? 62Buni bukaba tanga gamukamona Muana wa muntu ekuenda kuko kualingaga kuba? 63Muuza ugukulamagia, tondo bumba bua Adama tabukukita buampa: moki manamutendaga meli muuza, nu meli kalamo. 64Tondo kumuli kuli bamozi batakatizia. Kubuno Yesu alingile kumenya wakalazi batakatizia, nu wozo gukamugabula, 65Nu abatendile bune, Kukabamba kako namubuide buno, Takuli muntu unavua kundi ndi ntakasibua na Tatane. 66Beigisibua bage beingi basubanizie tabendile nage lingo. 67Yesu abuide beigisibua ikumi nu babili bune, Ndi nuinyue tamukutunda kuenda? 68Simona Petelo amubuide bune, Mukota, kua nazi kutuenda? Uli na moki ma kalamo katanakuzinda. 69Tuakatizia nu tuizi buno, uwe Uwasililila wa Kalaga. 70Yesu ababuide bune, Ndi nsiamusombuede inyue ikumi nu babili? Nu umozi wa kumuli u Liabo. 71Atendede ku Yudasa, muana wa Simona Isakaliote, kubuno ukamugabula, we abezaga umozi wa ku babo ikumi nu babili.

Currently Selected:

Yoana 6: NTKI57

Highlight

Copy