Yoana 5

Yesu Ekonia Musambi Busi bua Sabato.

1Kusila kua bubo kuabezaga kisagulo kia baYuda; nu Yesu endile ku Yelusalema.

2Nu mu Yelusalema buigi na luibi lua mukumba wa mikoko muabezaga kiziba kia mazi ma koga, kiamanagua mu kilibelo buno Betesaida muabezaga nusu itano. 3Mu nusu zezo muabezaga muiyombeka misanganano za basambi, biuku, nu bitunga, nu boma biganza balindilaga kukulunguka kua mazi: 4kubuno kuabezaga nkungu imozi zakumbaga mugenzi wakiminaga mu kiziba, nu wakulungulaga mazi: nu wozo walinga kubasa kungua mazi masila kukulungulua nti uwona lusambo luabezaga nalo. 5Nu kuabezaga muntu umozi kuko na lusambo luage miaka makumi masatu nu kinana. 6Nu Yesu amumonineko eiyombeka, nu amenyine buno, ese na lulo lusambo nkungu ndazi, amubuzizie bune, Ndi ukutunda konibua? 7Wozo musambi amuakuide bune, Mukota, Nne nsili na muntu wakunisa mu kiziba; mu nkungu zikukulungulagua mazi; kungua nsenenda nti ungo muntu antanga. 8Yesu amubuide bune, Yuka, nu weke mugu wobe, nu wende. 9Nu kazanga kongo wozo muntu onine, nu ekile mugu wage, nu endile.

Busi bubo buabezaga busi bua sabato. 10BaYuda babuide wozo wonagibua bune, Lelo buli busi bua sabato tabuakulungana ku mulembe kueka mugu wobe. 11Tondo ababuide bune, Wozo wanonagia uwambuide buno, neke mugu wane nende. 12Bamubuzizie bune, Nazi wakubuide buno, weke mugu wobe nu wende? 13Tondo wonezibue ntamenyine wamonizie; kubuno Yesu eidombuede kuko, kubuno kuabezaga bantu beingi mu kiziki kikio. 14Nu Yesu amusangile mu numba nnene za kukumbamina, amubuide bune, Ungua, wasila kona: ntuage lingo, unavua kuba na bungo buatinga bubuno. 15Muntu wozo endile, nu abuide baYuda bune, Yesu wanonizie. 16Nu ku bubo baYuda basingizie Yesu, kubuno akitile bubo busi bua sabato. 17Tondo Yesu ababuide bune, Tatune ekukitaga mulimo aba nu kano kaluma, nunne nkukita mulimo. 18Ku bubo baYuda balondile nunse bubanamuita, kubuno etile mulembe wa busi bua sabato nu amanine Kalaga buno, Isi, nu egelamizie na Kalaga.

19Yesu abatendile bune, Lebelebe, lebelebe, nkumubula bune, Muana ntanakita kampa wenyene, tondo bubo buakumona Isi ekukita; kubuno bubo bunsania buakukita nti ubuakite nuwe Muana. 20Kubuno Isi ekutundaga Muana, nu ekumulolesia bunsania buakukita: nu akumulolesia mulimo munene kutinga wono buno, inyue muangame. 21Kubuno anga bubo bukuyukagia Isi bakuzi nu ekubakasaga kalamo, bubo Muana nuwe ekukasa kalamo ku babo bekutundaga wenyene. 22Kubuno Isi ntakusungia muntu, tondo akasile Muana lusungio lunsania; 23buno bantu bansania banze Muana, anga bubakuanza Isi, 24Lebelebe, lebelebe, nkumubula bune, Wongua kuidagi liane, nu kukatizia wansingile, eli na kalamo katanakuzinda, nu ntakasungibua nunse, tondo atikibua ku lukuo, nu engila mu kalamo. 25Lebelebe, lebelebe, nkumubula bune, Nkungu zikakuka, nu ziseli, nu bakuzi bakongua kuiyuki lia Muana wa Kalaga; nu babo bakaliunguako bakalamaga. 26Kubuno anga bubo buli Isi na kalamo mueli, ububo akasile Muana wage kalamo mueli nuwe: 27nu amukasile buangato bua kusungia, kubuno eli Muana wa muntu. 28Tamuangame kububo: kubuno nkungu zikakuka uzikongua ku babo bansania beli mu nsinda kuiyuki liage, 29nu bakayuka; babo bakitile busoga, kuiyukilo lia kalamo; nu babo bakitile mibi, kuiyukilo lia lusungio.

30Nne nsinakita buampa nnenyene: tondo anga bunkungua, ubunkusungia; nu lusungio luane luli luisa; kubuno nsikulonda kusombola kuane nnenyene, tondo kusombola kua wozo wansingile. 31Ndi nkuidongekela nnenyene, kasi bulongeki buane tabuli bulili. 32Kuli ungo ukundongekela; nunne nizi buno bulongeki buage buakundongekela buli bulili. 33Inyue muasingile bantu ku Yoana, nu alongekile buli bulili. 34Tondo bulongeki bunakasilue nsiabukasilue na bantu: tondo nkutenda bubuno buno monibue, 35We abezaga kasuku kaguluminaga nu kasanaga; nuinyue muatundile kubogelabogela kiengi kiako nkungu imozi. 36Tondo bulongeki bundi nabo; buatinga bua Y oana, kubuno milimo zankasile Tatane buno nizizindilizie, milimo zeno zinkukita, zikundongekela buno Tatane ansingile. 37Nu Tatane wansingile andongekede. Inyue tamungule kuiyuki liage busi bumozi, aba kisusania kiage tamuakimonineko. 38Idagi liage talili mu muli, kubuno inyue tamuakatizia wozo wasingile. 39Mukulondaga mu masanzo, kubuno mukukengela mumo muli kalamo katanakuzinda; numo umakundongekela; 40nu tamukutunda kuvua kundi buno mube na kalamo. 41Nsikukasua lutanuno na bantu. 42Tondo namumenya buno, lutundo lua Kalaga taluli mu muli. 43Navule muizina lia Tatane, tondo inyue tamuansekede: ndi ungo avua muizina liage wenyene, nti muamusekela. 44Buni bumunakatizia, inyue bakukasana lutanuno bueinyu bueinyu, nu lutanuno lulo luatukile kua Kalaga wenyene tamukululonda? 45Tamukengele bune, Nne namusongele ku Tatane: tondo kuli ungo ukumusongela, eli Mose umukulemaninaga. 46Kubuno gamunakatizizie Mose, munankatizizie, kubuno we asanzile musagu wane. 47Tondo ndi tamuakatizia masanzo mage, kubuni munakatizia malagi mane?

Currently Selected:

Yoana 5: NTKI57

Highlight

Copy