Yoana 20

Kuyuka kua Yesu ku Bakuzi.

Mat. 28:1-10; Mk. 16:1-14; Lk. 24:1-43.

1Mu busi bua kulinga kuizinga, Malia wa Magadala avule ku nsinda mu nindunindu, busi tabuzibuka, amonine ku lilio ikozi liatikibua ku nsinda. 2Nu eitumine lubilo ku Simona Petelo, nu ku wozo muigisibua watundagua na Yesu, nu ababuide bune, Batikia Mukota mu nsinda, nu tatuizi kuni kubamubikile. 3Petelo endile, nu wozo ungo muigisibua, nu bendile ku nsinda. 4Nu beitumine lubilo bobabili: nu wozo muigisibua asasizie kutinga Petelo, nu alingile kubasa ku nsinda; 5nu einamine, nu alolilemo, amonine ku zezo nsulu zabota zili gansi; tondo nteingidemo. 6Simona Petelo avule amuyanga, nu eingide mu nsinda; nu amonine ku zezo nsulu zabota zili gansi, 7tondo zezo nsulu zabezaga kuitoe, tazabezaga gamozi na zezo ingo nsulu, tugu zabezaga zagondua mu kingo kibe. 8Bubo nu wozo muigisibua walingaga kubasa ku nsinda, eingidemo, nu amonine kuzo, nu akatizizie. 9Kubuno babezaga tabemenyinina masanzo, buno atunganana kuyuka ku bakuzi. 10Babo beigisibua basubizie lingo ku numba zabo.

Yesu Amonekako na Malia wa Magadala.

11Tondo Malia abezaga emana ku mbuga buigi na nsinda; nu alilaga, einamine, nu alolile mu nsinda. 12Nu amonine ku migenzi ibili, beli na nsulu zenga bekile, umozi kuitoe nu ungo ku magulu, gago gababikile kitumba kia Yesu. 13Nubo bamubuide bune, Mukikulu, ukulilila kikizi? ababuide bune, Bendile na Mukota wane nu nsizi ku bamubikile. 14Nu gasilile kutenda bubo akebetukile kumbusa, amonine ku Yesu emine, ntamenyaga buno u Yesu. 15Yesu amubuzizie bune, Mukikulu, ukulilila kikizi? Ukulonda nazi? Nuwe akengelaga buno, wozo eli mulangi weisoa, amubuide bune, Mukota, ndi uwe uwamutukizie kasi mbule kuwamubikile, nunne nimutole. 16Yesu atendile bune, Malia. Nu agalukile, amubuide mu kiEbelo Laboni, buisulilua buno, Musozi. 17Yesu amubuide bune, Ntuneitubia kundi; kubuno nsibakama ku Tatane: tondo enda, ku mibuto zane gubabule bune, Nabakama ku Tatane nu soinyue, nu ku Kalaga wane nu Kalaga weinyu. 18Malia Magadala endile kusolela beigisibua musagu bune, Namona ku Mukota nu bubuno ubuambulaga.

Yesu Amonekileko na Beigisibua Bage Tondo Toma Ntabezagago.

Lk. 24:36-49.

19Gabede buse muigolo lia busi buakulinga buizinga, beigisibua babezaga beigala nibi, kubuno bakuaga baYuda boba, Yesu ababaside, nu emene kima munkatini muabo, nu ababuide bune, Bobelelazi. 20Nu gasilile kutenda bubo, abalolesezie maboko mage nu mumpege. Babo beigisibua babogilebogile gabamonine ku Mukota. 21Yesu ababuide lingo bune, Bobelelazi: anga buansingile Tatane; ububo nunne bunkumusinga. 22Nu gasilile kutenda bubo, abopide, nu ababuide bune Sekelazi Muuza Wasililila: 23unsania umuasigilila misako za buagi, nti asigililua; nu unsania umutasigilila, nti akasigala na misako za buagi buage.

Yesu Amonekako Lingo na Beigisibua Bage nu Toma Eseligo.

24Tondo umozi wa ku beigisibua ikumi nu babili, Toma wamanagua Didumu, ntabezaga nabo gabamonaga ku Yesu. 25Bango beigisibua bamubuide bune, Tuamonine ku Mukota. Tondo we ababuide bune, Ndi nsiamona ku mikolu za misomani mu maboko mage, nu kuingizia munue wane mu matengu ma mikolu za misomani, nu kuingizia ikasa liane mu mpege zage, nne nsinakatizia nunse.

26Nu gatingile bindi kinana, beigisibua bage babezaga lingo beigala nibi, nu Toma abezaga nabo, Yesu ababaside, nu nibi zabezaga zigalua, nu emene munkatini muabo, nu ababuide bune, Bobelelazi. 27Nu abuide Toma bune, Vua na munue wobe, ulole maboko mane; nu vua neikasa liobe, nu ulingizie mu mpege zane: unakivua kutakatizia, tondo katizia. 28Toma amuakuide bune, Mukota wane nu Kalaga wane. 29Yesu amubuide bune, Wakatizia, kubuno wamonako: tondo mbogimbogi ku babo batamonako, nu kukatizia.

Yoana Ekusambala Buasanzilue.

30Tondo ingo migeleko mingi zakitile Yesu nu nti beigisibua bage bekumona, tazasanzilue mu mukanda wono. 31Tondo bubo buasanzilue, buno mukatizie buno, Yesu eli Klisto, Muana wa Kalaga; nu mu kukatizia muabe na kalamo muizina liage.

Currently Selected:

Yoana 20: NTKI57

Highlight

Copy