Matayo 15

Bikela ya Mungu bitolongela eya bato

1Limɔ BaFalusi la Batikasa ba Yelusaleme loya ende Yesu oyafel’Inde mbo— 2Monito baeki baɛ batotefola ndola ya bangau? Eoka baitosoola bangasa ani batola bieka. 3Yesu lomutola lau mbo— ¿Ino imɔ, monito bototefola Bikela ya Mungu eoka ya ndola yanu? 4Eoka Mungu nd’aongäkä mbo— Litesaka sango waɛ la nyango waɛ; la imɔ mbo— Oyatomɔlɔ sango kwa nyango wande, aweke wewe. 5Nde ino nd’atoonga mbo— Boto oyatoonga la sango kwa nyango mbo— Yeka esambɔɔlɔ ino ende’mi, yao ele lifaefi, 6inde angolitesa sango wande la nyango wande. Ongoma ino osotombola Lioi lia Mungu ko la baiti banu ba kwala. 7Ino ba bolimbakeli, Yesaya atɔndɔlɔ̈kɔ̈ wewe loasɔ loanu nda lokasa loande mbo—

8E bato-ba batolitesa’mi la bɛnɔkɔ,

Kongo ko betema yau bile esika lami.

9Batosemola’mi lisemoëlä,

Eoka liekesi liau lile ko bikela ya bato.

10Limɔ Inde lota ekuke ya bato end’Inde, Inde loonga lau mbo— Okaka la lüwak’imɔ mbo, 11eti yeka eyetɔɔtɔ nda bɔnɔkɔ w’oto nd’atosɛlɛ inde la bɔwɛwɛ; kangä yao ebitokuswa nda bɔnɔkɔ wande, yao nd’atobebes’inde la bɔwɛwɛ. 12Lamao baeki bande loya end’Inde, iyo mbo— ¿Olüwi nde mbo BaFalusi basɔɛnɛ tale finɛ ani asook’iyo e-lioi-li? 13Inde lomutola mbo— Litɔmbɔ la litɔmbɔ elitilɔɔmɔ ko la Sango wami, liao litouwolomo fukuku. 14Machak’iyo, iyo angɛnɛ bende betoli oso ebale imɔ la botuku; boto wa botuku etola ewa botuku oso nda mboka, iyo yaambale kokekelana nda liyöndo. 15Limɔ Petelo loya liasi mbo— Sanoelak’iso e-bombila-bo. 16Yesu mbo— ¿Ko ino imɔ, oti la liluwani? 17¿Mbo, otiluwe mbo yeka eyetɔɔtɔ nda bɔnɔkɔ etoetela ngo nda sɔlɔ, etonyomo nda tɔi. 18Kongo ko ebitokusola boto nda bɔnɔkɔ, yao bitosekwa nda botema; yao nd’atosɛlɛ boto la bɔwɛwɛ; 19eoka ebitosekwaka nda botema biko yɛmɛ ibe, lioli-lia-boto, nyongo, bolëfë, wiya, liwanjeli, la limɔli. 20Njasɔ-bi nd’atosɛlɛ boto la bɔwɛwɛ; nde ndola bieka ani bangasa batitasoolomo, angosɛlɛ boto la bɔwɛwɛ.

Boseka wa yese yasi louwesomökö

21Asekwäkä Yesu omao, Inde lɔkɛ nda bolelo wa yese ya Tulo la Sidona. 22Kwaamao botomali wa Kanana oyasekwi nda bolelo wa yese ena, inde loyamama mbo— Okelaka’mi ngandi sumbu, Aɛ Ngɛnɛ, Wana wa Dawidi, wana wami otomali atookesomoko wale finɛ la bolimo obe. 23Nde Yesu angomutoela otomali lioi ango limɔi. Baeki bande loya oyaomb’Inde mbo— Kɛsɛk’inde, atangweke eoka atoamama ombisa yasu. 24Nde Yesu lomutola mbo— Itiatomomökö sakolo ko ende bɛkɔkɔ ebalefani ya bofindi wa Isalaele. 25Limɔ otomali loyaswa balui se oso wande, inde mbo— Ngɛnɛ sungaka’mi. 26Yesu lomutola mbo— Etiengane ndɔɔnɔkɔlɔ lituma lia bana okakushela ngwa. 27Nde inde mbo— Eingo Ngɛnɛ, ko ngwa kongo bitolaka bakɔmbɔ ba lituma ebatokwaka ose ya mɛsa ya ngɛnɛ wa yao. 28Lamao Yesu lomutola lande mbo— Botomali, liimeli liaɛ lile lifi. Loyaleke end’aɛ kwa asolɛmbɛ aɛ. La wana wande losäsesomo ko la mbil’ao.

29Yesu losekwa omao, Inde lɔkɛ tina la eliya ya Ngalilai, lamao Inde lolila nda löngo, Inde loyala se ko omao. 30Limɔ bikuke ya bato loya end’Inde, iyo loeshakela Inde bato ba bikoti, l’eba betuku, l’eba biuma, l’ebalɛmbɛtɛki, la basi imɔ, la bato lot’iyo se nda bakolo ba Yesu la Inde losäsekes’iyo; 31eokao ekuke ya bato lomwaala ani ɛnɛk’iyo eba biuma batoongaka, ebalɛmbɛtɛki basɔɔlɔ bosäsu, eba bikoti batɔkɛndɛ, eba betuku batɔɛnɛ, limɔ iyo losemola Mungu wa Isalaele.

Lilesi lia bato bilɛfu binɛi

32Lamao Yesu lota baeki bande lioi, Inde loonga lau mbo— Isookela bikuke ya bato ngandi, eoka basoumwaka lami kwani ko becho isatɔ la bati la yeka yola, itilɛmbɛ ndokɛsɛ iyo eyau ko la isiye mbo batawa boleka nda mboka. 33La baeki bande loonga lande mbo— ¿Totoosha nd’anima beila boengana ekuke efi ya bato nda e-isimo-si? 34Yesu loonga lau mbo— ¿Ole la beila yanga? Iyo mbo— Bosambale la toswiswi tɔmɔi. 35Inde loonga la windi wa bato mbo bayaleke se nda nyɛlɛ, 36Inde lɔɔsɔ beila bosambale la toswiswi, Inde lofa kelekëlë, Inde loataka bao, Inde lofaekefa baeki bande la baeki lokafaekefe bato. 37Iyo atotina lola, iyo lɔtɛkwa; iyo loina twinyo etwatikaläkä, iyo lotumesa bisaka osambale. 38Bato ebaläkä baaka batolome bilɛfu binɛi, angotanga batomali la bana. 39Inde lɔkɛsɛ bato eyau, Inde lokwa nda watɔ, limɔ Inde loiya nda tukela ya Mangandala.

Currently Selected:

Matayo 15: NTKE58

Highlight

Copy