Matayo 13

Bembila ya Bɔlɔi

1Nda lise lina asekwäkä Yesu nda ndakɔ, Inde loyala se nda ngɔngɛ ya eliya, 2la bikuke bifi fafo lolingel’Inde; eokao Inde lokwa nda watɔ, Inde loyala se omao ani bato loemala nda ngɔngɛ. 3Inde loekes’iyo njasɔ wike kola bembila, mbo— Tɛnɛ, bɔlɔi ɔmɔi lɔkɛ okalɔɔ koto; 4alɔɔkɔ inde koto ongoma, bimɔi lokwa nda mboka, la nɔli loya oyala yao; 5la yasi bimɔi lokwa nda elela olo ayali batalɛ, angwɛnɛ nyɛlɛ wike, yao lɔɔ̈tɔ̈ lisasaya eoka ya nyɛlɛ yotalangu. 6Nde ayäkä löwa ifitika, yao lokofa la njöwa, yao lobɛɛkɛlɛ fɛɛ eoka angwɛnɛ biili. 7La yasi bimɔi lokwa nda kɛ̈kɛ̈ limɔ kɛ̈kɛ̈ lɔɔ̈tɔ̈ la kɛ̈kɛ̈ lɔnyɛlɛ koto, 8Nde yasi bimɔi lokwa nda nyɛlɛ ilau, yao lɔɔ̈tɔ̈, yao lota tuma, bimɔi kama liu, bimɔi kama liambɛ, bimɔi kama isatɔ. 9Oyayali la batoi, okeke. 10Lamao baeki loya end’Inde, iyo mbo— ¿Monito otoonga lau la bembila? 11Inde lomutola lau mbo— End’ino kongo, njasɔ ebisoisomo ya Bɔkɔta wa Use, yao koisolomo, kongo ko ende iyo bitiisolomo. 12Eoka boto oyaɔli efomoko nde yasi, la eyalaka nde la ngɔnyi; nde boto oyatiɔlɛ ɛɔnɔkɔlɔmɔkɔ yao ebiɔliki inde. 13Eokao itoonga lau la bembila, eoka batɛnɛ ko liɛnɛ̈lɛ̈; batoka liokɛ̈lä, angolüwa litina. 14End’iyo litɔndɔli lia Yesaya lisokɔchɔmɔ, mbo—

La batoi, ino bokaka, nde angolüwa litina;

La baiso, ino botichaka, nde angotɛnɛ swa.

15Eoka betema ya etukela-ye bisokwelo itɔka,

La batoi bau batooka ko ilao kongo,

La basolinjaka baiso bau ndi,

Mbo bataɛnɛ la baiso, la bataoka la batoi,

Batalüwaka batina la betema la batakalangana,

La mbo itauwes’iyo.

16Nde baiso banu nd’asofota eoka basɔɛnɛ; la batoi imɔ, eoka basooka. 17Wewe, isoonga lanu mbo— Batɔndɔli wike la eba liengani wike balɛmbɛkɛ finɛ ndɔɛnɛ ebisɔɛnɛ ino, nde batiɛnɛ̈kɛ̈ yao; la ndooka ebisook’ino, nde batiaokäkä yao. 18Okaka to litina lia bombila wa bɔlɔi. 19Atooka boto lioi lia Bɔkɔta wa Use, angoosha to litina, limɔ Ewa Obe ako Satana atoyaɔnɔkɔlɔkɔ koto ebilɔɔmuku nda botema wande. Wao end’inde oyalɔɔmɔkɔ nda mboka. 20Inde oyalɔɔmɔkɔ nda elela ya batalɛ ende oto oyatooka lioi lisasaya la limɛngɔ; 21kongo ko ati la biili ndatiteni yande nde koumwaka ko mbile sinyo; limɔ atoya tale la likongolomu eoka ya Lioi, lisasaya atokwa se. 22Inde imɔ oyalɔɔmɔkɔ nda kɛ̈kɛ̈, atooka Lioi, bifembi ya wenda la lilimbi lia bieto, bitoyanyɛɛlɛ Lioi, angota tuma. 23Nde inde oyalɔɔmɔkɔ nda nyɛlɛ ilau atooka Lioi, atoosh’imɔ litina lia Lioi, atota tuma, bimɔi kama liu, bimɔi kama liambɛ, bimɔi kama isatɔ.

Koto ilau la Koto ibe

24Yesu lotamb’iyo bombila wasi, Inde mbo— Bɔkɔta wa Use kokwelomo la boto oyalɔɔkɔ koto bilau kwa bangwindi nda elanga yande, 25nde aingalaka bato tɔlɔ, wiyani lande loya oyalɔɔ baoköoko ko omao nda koto ya bangwindi, limɔ inde lotangwa eyande. 26Nde ɔtɔkɔ yao batɔmbɔ, lamao ko baoköoko imɔ lɔɛnɛlɛ. 27La bɛkɔwa ya ngɛnɛ w’elanga loya ayaonga lande mbo— ¿Ngɛnɛ, mbo aɛ otialɔ̈ɔ̈kɔ̈ koto ilau nda elanga yaɛ? ¿Baoköoko basokwi to nde lonima? 28Inde mbo— Wiyani nd’asokela ongoma. Lamao bɛkɔwa loonga lande mbo— Olɛmbi to mbo iso tɔɛkɛ okasɔnjaka bao? 29Nde inde mbo— Mbayɔ, eoka mbo atosɔnjak’ino baoköoko, otauwokola imɔ ko bangwindi lisanga. 30Machaka yaambale bikondakaneke konda mbile ya eula, lamao nda eula, imi koonga la ebatotwa mbo— Tasɔnjakɛ baoköoko, ndokandaka bao bekuku yofechomo limɔ sɔnjaka bangwindi nda ekukelo yami.

Bembila yasi yokweekela Bɔkɔta wa Use

31Inde lotamb’iyo bombila wasi, Inde mbo— Bɔkɔta wa Use bole kwa lokoto loa mbase, boto lɔsɔ loao, inde lolɔɔ loao nda elanga yande; 32lole lokoto lokɛkɛ loeta bitoti la bɔkɛkɛ, kongo ko atokonda loao, lotolongela tosasandu tototina, lotoya isandu angɛnɛ mbo nɔli biyeke oyakelaka bikalingo yau nda beta ya shao.

33Inde lokambes’iyo bombila wasi, mbo— Bɔkɔta wa Use wende kwa fulofulo eyundi otomali ndokaisa nda kilo isato ya lɔkɛ̈kɛ̈ (eoka yokela lituma) mbo bitotina biulweke la fulofulo. 34Bitotina-bi Yesu loonga ende bikuke ya bato ko la bembila, la Inde angoonga lau sakolo ko la bombila 35ongoma lioi eliaongaka bɔtɔndɔli liakɔchɔmɔkɔ mbo—

Itoasola bɔnɔkɔ wami ko ndokusola bombila,

Itoongaka yao ebiisamiki konda liako lia wenda ko louse.

36Lamao Inde lomacha bikuke ya bato, Inde lɔɔtɔ ndakɔ la baeki bande loya end’Inde, iyo mbo— Sanoelak’iso litina lia bombila eoka ya baoköoko nda elanga. 37Yesu loonga mbo— Bɔlɔi wa koto bilau ende Wana wa Boto, 38elanga ende ewenda-bo, koto bilau bende bana ba Bɔkɔta wa Use; nde baoköoko bende bana ba Ewa obe; 39wiyani oyalɔɔkɔ bao ale Satana; eula yende basilelo ba wenda, ebatotwa eula bende bakitomo. 40Kwa asɔnjɔmɔkɔ baoköoko ndokafechomo nda bosä, ko ongoma akakelomoko nda basilelo ba wenda. 41Wana wa Boto elatomaka bakitomo bande la iyo belasɔnjaka nda yakakaelo yande bitotina ebitobebekesa bato la ebatokelaka obe, 42la belaumbokolaka iyo nda bosa wa litumbo, olo elayalaka bileli la ngɛlɛtɛ ya bainyo. 43Lamao bato ba liengani belaangangaka kwa löwa nda Bɔkɔta wa Sango wau. Oyale la batoi, okeke.

Yeka ya loketi lofi fafo

44Bɔkɔta wa Use bole kwa bieto ya mbiso ebisoisomo nda elanga; aisoläkä oto oisola yao, inde loisa yao liasi, limɔ eoka ya limɛngɔ, inde lɔkɛ okaungesa biengo yande bitotina, inde kosomba elanga ena.

45Liasi imɔ, Bɔkɔta wa Use bole kwa botimbi wa bokalala oyatokalüke maka (eko sheka sha loketi lofi fafo); 46limɔ ɛnɛ̈kɛ̈ inde lomaka loa loketi loa likama, inde lɔkɛ okatambesa biengo bitotina, inde losomba loao.

47Liasi imɔ, Bɔkɔta wa Use bole kwa wɛngɔ ebosotomo nda balia, wao loobyamela swi ya befɔnɔ bitotina, 48akatumeke wao, iyo kosamba nda ngɔngɛ, iyo loyala se mbo baönyeke ebilau nda bembeya, ani iyo koumbola ebibe tubu. 49Lolayalaka ko ongoma nda basilelo ba wenda; bakitomo bekuswaka ndoönya bato babe la eba liengani shɛi, 50la beumbolaka iyo nda bosä wa litumbo, olo elayalaka bileli la ngɛlɛtɛ ya bainyo. 51Yesu loonga lau mbo— Osoluwa litina lia bitotina-bi? Iyo mbo— Eingo. 52Lamao Yesu loonga lau mbo— Eokao luwaka mbo Botikasa oyale boeki wa Bɔkɔta wa Use, ende kwa ngɛnɛ wa ndakɔ oyatokusokola boindä wa oso la biɛngɔ biyai imɔ, nda bondanda ebole lande.

Fee ya eba Nasaleta

53Asiläkä Yesu ndotel’iyo bembila-bi, Inde losekwa omao. 54Iyäkä Inde nda tukela yande angɛnɛ, Inde loekekes’iyo nda ɛsɔngɔmɛlɔ yau, iyo lomwaala, iyo mbo— ¿Boto-yo asɔɔlɔ wɛlï-bo la bisisho ya bofoka ko anima to? 55¿Ati nde bɔkwɛti-bo? ¿Nyango wande ati to la lina liko Maliya? ¿Bitungani yande bati to eba Yakobo la Yosefa la Simona la Yuda? 56¿Baelo bande batotina bati to lasu eya? ¿Boto-yo asɔɔlɔ bitotina-bi ko anima? 57La iyo lɔɛnɛ ko tale eoka yande. Nde Yesu loonga lau mbo— Bɔtɔndɔli atolitesomo sakolo ngo ko nda bokenge wande angɛnɛ la nda ndakɔ yande angɛnɛ. 58Atiakeläkä bisisho ya bofoka wike omao eoka batiäkä la liimeli.

Currently Selected:

Matayo 13: NTKE58

Highlight

Copy