Matayo 10

Lɔkɛndɔ loa Baeki liu la bambale

1Lamao Yesu lota baeki bande liu la ambale lioi limɔ Inde lofaef’iyo isosha shokusola belimo ebe la shosäsekesa ngwo la kambo ya bɛfɔnɔ bitotina. 2Baina ba batomomu liu la ambale bako mbo— ewa oso ako Petelo, la Andelo etungani yande; Yakobo wana wa Sebedayo la Yoane etungani yande; 3Filipo la Balatomayo, Toma la Matayo, ewa bɔsɔnji wa bɔsɔmbi; Yakobo wana wa Alufayo, la Tadayo; 4Simona wa Kanana, la Yudasi wa Keliota oyawambäkä Yesu.

5Yesu lotoma eba liu la ambale, Inde loima iyo mbo— Ɔkɛndɛ̈kɛ nda mboka ya ebati BaYuda, ɔɔtɛkɛ nda okenge wa eba Samalia, 6kangä kɔkɛ ende bɛkɔkɔ ebelefani ya tukela ya Isalaele. 7Atɔkɛndɛkɛnd’ino, taka boekï mbo— Bɔkɔta wa Use bosoya tina. 8Säsekesaka eba ngwo, uwesaka ebasowa, tanekesaka eba baɛndi, kusolaka belimo ebe; Osɔɔlɔ liɔlɛlɛ, faka to lifaefela. 9Ɔɛ̈kɛ la falanga ango ko bakuta nda biuku yanu, ɔɛ̈kɛ la litanga, ango ko bisinda imbale, 10ango ko bilato, ango ko itumbe eoka bosali aondu nde ofomo pɔshɔ yande. 11La nda okenge ona, kwa ofi kwa bɔkɛkɛ ebokaɔtɛk’ino, lukäka boto oyaengani la yalaka komao lande, kond’akasekwek’ino omao. 12Akaɔtɛk’ino ndakɔ, seelaka yao, 13eya mbo ndakɔ engani, ambo lilatemi lianu liyaleke la yao, nde eyambo etiengane, ambo lilatemi lianu liinweke end’ino. 14Eyambo boto aitonyangel’ino la aitooka baoi banu, akosokwek’ino nda ndakɔ ena, kwa nda bokenge ona, fufolaka liunge elisowatema la batindi banu. 15Wewe, isoonga lanu mbo— Yese ya Sodoma la Ngomola angooka likuchi lifi elikokeke bokenge ona nda lise lia likomyi.

16Tɛnɛ, Imi isotom’ino kwa bɛkɔkɔ nd’atiteni ya ngɔi, eokao yalaka la wɛlï kwa ewa njɔ, la yalaka la esaela kwa eya biküku. 17Lambaka to mbo bato batakɛsɛk’ino ende tokumbɛ, eoka batoomak’ino fimbo nda bisɔngɔmɛlɔ; 18bemesak’ino oso wa bekumi la bekɔta eoka yami mbo oongeleke’mi oso wau la oso wa ebati BaYuda. 19Kongo ko atoundes’iyo ounda ino, ndokakɛsɔmɔ ende bekumi otakelëke olenda eoka ya boongeli ango eoka ya baoi angɛnɛ ebakaongek’ino eoka baoi boonga befomoko end’ino nda mbile-ao. 20Eoka bati nde ino angɛnɛ nd’atoonga, kangä Bolimo wa Sango wanu oyatoonga ko lanu. 21Boloo atowamba etungani nda liwa, la sango atowamba wana, la bana batotefola ebaot’iyo mbo bakɛsɛk’iyo nda liwa, 22la ino boiyanomoko la bato batotina eoka ya lina liami. Nde inde oyatokɔkɔmɔ konda losilo, inde elauwesomoko. 23Nde atokongola bato ekongol’ino nda bokenge-bo, kwaka otili konda bokenge wasi, eoka isoonga lanu wewe mbo ino angotasila otandela bekenge bitotina ya Isalaele oso wa loyo loa Wana wa Boto.

24Boeki aitolongela Boekesi wande la bɔkɔwa aitolongela Ngɛnɛ wande; 25loengani nde mbo boeki ayaleke kwa Boekesi wande la bɔkɔwa kwa Ngɛnɛ wande. Betanga ngɛnɛ wa ndakɔ mbo Baalasebula, nde asa kɔni iyo kɔsɛɔlɔ eba bofindi wande. 26Eokao owangëk’iyo, eoka angwɛnɛ eyaisama sakolo ko ndoisolomo; angwɛnɛ loasɔ eloisomuku sakolo ko ndolüwakomo mbisa. 27Ebitokambesa’mi okambes’ino nda lilima, ongaka to yao nda löwa; ebitook’ino la iyoiyoi, taka boekï wa yao nda bɛtɔndɔ ya ndakɔ. 28Owangëke ebatoola bindo nde batikɔkɔlɛ ndoola bolimo; kongo ko wangaka inde oyasokɔkɔlɔ ndosɛɛsɛlɛsɛ la bolimo la bindo nda Ngehena. 29¿Mbo bɛnjwɛɛ imbale biitoungesomo la likute? Nde ɔmɔi wa yao angokwa se nda nyɛlɛ sakolo ko la Sango wanu. 30Nde eyanu swee ya betö bitotina bisolüwana loketi. 31Eokao, owangëke, eoka ino nd’asolongela bɛnjwɛɛ la loketi lofi. 32Eokao boto eaolela Imi oso wa bato, Imi yaolelak’inde oso wa Sango wami oyayali nda Use; 33nde boto eanganya Imi oso wa bato, Imi yelaanganyaka imɔ ko wao oso wa Sango wami nda Use.

34Oenyelëke mbo isoya oyasɛlɛ lilatemi ono se, itiye oyasɛlɛ ko lilatemi kangä chaka ya bita. 35Isoya nde ndowesanesa botö la sango wande, la wana otomali la nyango wande la wali wa wana la boilana lande, 36ani baiyani ba boto ko bato ba bukulu wande angɛnɛ.

37Boto oyasami sango kwa nyango ndolongela Imi, ona angoöndo otangomo wami, la oyatosama wanaotolome kwa wana-otomali ndolongela Imi, wao imɔ angoöndo otangomo wami; 38la oto ona oyaitoilaka lieka liande ndotuta’mi, ambo wao angoöndo oyala boeki wami. 39Inde oyatolukä ndokukya liwawi liande angɛnɛ, ambo atolefesa nde liao; nde oyatolefesa liwawi liande ko eoka yami, wao koosha nde liao.

40Inde oyatonyangela ino ambo atonyangela’mi, la inde oyatonyangela’mi, ambo atonyangela oyatomaka’mi. 41Oyatonyangela bɔtɔndɔli ko eoka mbo ayali bɔtɔndɔli, ɛɔlɔkɔ imɔ bondanda wa bɔtɔndɔli, la boto oyatonyangela boto wa liengani ko eoka mbo ayali ewa liengani ambo ɛɔlɔkɔ imɔ bondanda wa boto wa liengani. 42Boto oyatomwesa ɔmwito wa ebakɛkɛ-ba kɔpɔ ya balia ba bondiya ko eoka mbo ayali boeki, itoonga lanu wewe mbo aitoomelo bondanda wande.

Currently Selected:

Matayo 10: NTKE58

Highlight

Copy