Yoane 17

Lisomboli lia Yesu eoka ya Inde angɛnɛ la baeki la baina

1Aongakä Yesu ongoma, limɔ Inde loila baiso bande nda use, Inde mbo— Sango, mbile esoya, taliaka to Wana waɛ tala mbo Wana atalieke Aɛ tala; 2kwa afakä Aɛ of’Inde isosha sholongela bato batotina mbo afeke loiko loa layalaya ende batotina ebafak’Aɛ of’Inde. 3Loiko loa layalaya lole ko ndoluwa Aɛ, Mungu Ɔmwitoto wa Wewe la oyatomomu laɛ ako Yesu Masiya. 4Imi nd’asotalia Aɛ tala ono se, isokela yao eyafak’Aɛ ofaefa’mi ndokela. 5Kwani to Sango taliaka Imi tala amamwito laɛ, ko la tala eyaɔlɔkɔ Imi amamwito laɛ oso wa loyaleso loa wenda-bo.

6Ende bato ebafak’Aɛ ofa’mi nda wenda, isoisola lina liaɛ. Baaka nde ebaɛ, la wafaka’mi iyo, la basolitesa lioi liaɛ. 7Kwani basoluwa mbo bitotina eyefak’Aɛ efaefa’mi, biasokwaka ko ende Aɛ; 8eoka isofaef’iyo liekesi eliafak’Aɛ efaefa’mi la basoimela liao, la basoluwa wewe mbo yasokwaka end’Aɛ la basoimela mbo Aɛ nd’atomaka Imi.

9Isosomboel’iyo, iitosomboela wenda kangä ko loasɔ loa bato ebafak’Aɛ efaefa’mi, 10bende to ebaɛ la bitotina ebisɛli nde Imi, yende imɔ ko eyaɛ, la ebile eyaɛ yende imɔ eyami la isotaliomo tala ko lau. 11Nde kwani iti’mɔ nda wenda-bo, kongo ko iyo bakoyali nda wenda ani Imi nd’atoya end’Aɛ, Sango Botanu, tɛmyak’iyo nda lina liaɛ eliafaefak’Aɛ efaefa’mi mbo bayaleke ko ɔmwito, kwani ayali ko Iso ɔmwito. 12Ayalakä Imi amamwito lau, Imi yatɛmyak’iyo tɛmya nda lina eliafak’Aɛ ofaefa’mi la yatinganaka lau, angwɛnɛ ɔmɔi wau wosɛɛsɛlɛ sakolo ngo ko wana ona wa losɛɛsɛlɔ, mbo lioi lia Lokasa loa Mungu likɔchɔmɔkɔ kɔkɛ. 13Nde kwani isoya end’Aɛ, nde itoonga baoi-ba ani ikoyali nda wenda mbo baɔlɛkɛ limɛngɔ liami liotumesa betema yau fuu.

14Isofaef’iyo lioi liaɛ la eba wenda basoiyana lau eoka mbo bati ba e-wenda-bo, kwa Imi angɛnɛ iti wa e-wenda-bo. 15Itisomboel’Aɛ mbo osokolek’iyo nda wenda, kangä mbo otekames’iyo ende ewa bobe. 16Bati ba wenda-bo kwa Imi angɛnɛ iti wa wenda-bo. 17Uchak’iyo nda Wewe; Lioi liaɛ liende Wewe. 18Kwa atomak’Aɛ otoma’mi nda wenda, ko ongoma Imi isotoma iyo nda wenda, 19la isüchama Imi angɛnɛ mbo iyo imɔ büchomoko lisanga nda Wewe.

20Itisomboel’iyo kongo, kangä imɔ ko ebakalendeloko Imi ko l’eoka ya lioi liau, 21mbo iyo yaatotina bayaleke ko ɔmwito, kwa Aɛ Sango, wende lami ko ɔmwito, lami yende laɛ ko ɔmwito mbo iyo imɔ bayaleke ɔmwito lasu mbo eba wenda bimeleke mbo Aɛ nd’atomaka’mi. 22Imi nd’asofaef’iyo tala eyafak’Aɛ efaefa’mi, mbo bayaleke ɔmwito kwa ayali imɔ ko Iso Ɔmwito. 23Imi batebate lau, l’Aɛ batebate lami mbo baɔlɔlɔkɔ oyala ko ɔmwito mbo wenda boluweke mbo Aɛ nd’atomaka’mi la mbo Aɛ nd’asosamak’iyo kwa asosamak’Aɛ osama’mi.

24Sango, Ilɛmbi nde mbo iyo imɔ ebafak’Aɛ efaefa’mi bayaleke amamwito lami olo akayaleke’mi, mbo bɛnɛkɛ tala eyataliak’Aɛ etalia’mi ani wasamaka’mi oso wa baswelo ba e-wenda-bo. 25E Sango wa Liengani, ko wenda angɛnɛ angoluw’Aɛ, kangä Imi nd’asoluw’Aɛ, la eba basoluwa mbo Aɛ nd’atomaka Imi; 26la isoluwes’iyo lina liaɛ la yeluwesak’iyo ngo ko ongoma, mbo losamɔ eloasamak’Aɛ osamaka’mi loyaleke nda betema yau la mbo Imi iyaleke ngo ko nda betema yau.

Currently Selected:

Yoane 17: NTKE58

Highlight

Copy