1 Bakolinto 16
16
Lisɔnji lia Lifaefi
1Nda loasɔ loa lifaefi liokɛsɔmɔ ende eba Etanda ebale la boeno, kwa asokambesa’mi okambesa bitanda ya Galatia, ino imɔ kelaka ko ongoma. 2Lise lia oso lia yenga, boto la boto wanu, ücheke likaɔ lia bondanda ebosɔɔl’inde ndokukia liao mbo lifaefi litasɔnjɔkɔmɔ nda mbile eyekayeke’mi. 3Limɔ akayeke’mi end’ino, itotoma lifaefi lianu lia booto nda Yelusaleme ko la besamba ya bato ebatosɔn’ino baina nda lokasa. 4Eya to mbo loengana lami angɛnɛ ndɔkɛ la liao, limɔ iyo kɔkɛsɛnɛ amamwito lami.
Mboli ya kɛndɔ ya Paulo
5Itoya end’ino fɛtɛti ani akaeteke’mi nda yese ya Makedonia eoka isosanga oeta nda Makedonia, 6nde eluwa imi koyala lanu sumbu, ango ko la tengai ya bɔfɛfyɔ, limɔ ino nd’atokɔkɔlɔ ndokatika’mi olo akaɛkɛ’mi. 7Itilɛmbɛ ndoya ko fɛtɛti kongo, nde Ngɛnɛ ekulia, iyɛli shami sile mbo itikaleke lanu mbile sumbu yumwa. 8Nde itoyalaka nda Efeso ko nda Elambɔ ya Pentekosete, 9eoka bome wa fofe ya likuwa bosoliolomo fololo oso wami, la ebalɛmbi ndokufesela’mi bende wike.
Wɛndi la baseeli ende Bakuwani la Paulo
10Akayeke Timoteo end’ino, tinganaka mbo batawänges’inde ani atoyala inde lanu, eoka inde atokelaka likuwa lia Ngɛnɛ kwa atokelak’imɔ ko’mi. 11Eokao boto atasɛɔlɛk’inde, nde kɛsɛk’inde lɔkɛndɔ ko la lilatemi mbo ainyweke end’mi; eoka itotaumbakela inde amamwito la beoto ya Etanda.
12Nda loasɔ loa etungani yasu ako Apolo, isolɔmbɔkɔl’inde balɔmbɔkɔlɔ wike mbo ayeke amamwito la bitungani ebitoya end’ino, kongo ko atisangeke ndoya ko kwani, nde eyaka oko ani akɛnɛk’inde fofe.
13Lambaka bitungani, kɔkɔmɔkɔ nda liimeli, wangemaka la bofoka kwa batolome baoku! 14Nde bitotina yanu bikelomoko ko la losamɔ nda betema yanu.
15Oluwi nde bato ba bofindi wa Setefano mbo baaka eba Etanda ba oso nda Akaya, la mbo iyo angɛnɛ basoundaka likuwa liosungaka eba Etanda; 16la isolɔmbɔkɔl’ino bitungani mbo oliteseke bato ana la basi imɔ ba bɔfɔnɔ-bo la batotina ebatosungana lasu nda bakuwa bawau-ba. 17Yende la limɛngɔ finɛ mbo Setefana la Folotunato la Akaiko basoya eoka basosilesa boeno wami wɛnɛ ino, 18la basoyaimwesa to botema wami la eyanu betema lisanga; luwanaka to la bato ba bɔfɔnɔ-bo.
19Eba Bitanda nda Asia basoseel’ino la losamɔ loa Ngɛnɛ, la Akwila la Pulisika imɔ ko la bato b’Etanda ebatosɔngɔmɔ nda ndakɔ yau basoseel’ino. 20Bitungani bitotina ono batoseel’ino; lamolanaka la tɔchɔu etüchomu end’eba Etanda.
21Liseeli-li lisɔnɔmu la bosamba wami angɛnɛ ako Paulo. 22Eya to boto atisame Ngɛnɛ, oyo asendomoko! Ngɛnɛ wasu atoya!
23Booto wa Ngɛnɛ wasu boyalakeke lanu! 24Losamɔ loami loa Masiya loyaleke lanu batotina.
Currently Selected:
1 Bakolinto 16: NTKE58
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
