Yoane 5

1ND’AFEKA b’aoyi’ako, elambo ea Ba-Yuda eki eko, ko Yesu aocwa nda Yelusalema. 2Ko ecima eki nda Yelusalema ntutama la wiso wa mpate etangema nda lofoso ja Ba-Ebele Betesaida, eki la bisele bitano. 3Etukuluku e’anto ba nkangi baokalema: bawei’aiso, betengu, belema, [baolendeza efukelo e’asi. 4Nda bikeke bimo ekima ea loola akitelaki nd’ecima ko aofukya basi: ko os’okitela nda joso, aki basi ofukaka, ende aikaki lima nkangi nko loswele eki’nd’okaka.] 5Bont’omoko aki eko, aki la nkangi ekae année ntuku isato l’années mwambi. 6Aki Yesu oenak’ende akalema, ko aolea wae atemaki la nkangi ekae elingi, aolokela, Olanga nde oike? 7Owa nkangi aoloamba, Nkolo, nk’afuk’asi, mpa l’ont’onkiteza nd’ecima: lolo nk’ay’emi, omo aokitela nda joso likami. 8Yesu aolokela, Emala, ambol’itoko ike, ko kenda. 9Ko nkakoyoko bont’oko aika, ko aolambol’itoko ikande, ko aokenda.

Mbil’eko eki Sabata. 10Nd’ewel’eko Ba-Yuda baokela bont’oko oikaki, Ene wae Sabata, afeji l’esekyelo wete otombe itoko ike. 11Lolo aolaamba, Ombikyaki ende aonkela, Ambol’itoko ike, ko kenda. 12Baolouola, bakela, Bont’oko okokelaki, Ambol’itoko ike ko kenda, ende na? 13Lolo oikaki ntea ende ondoikyaki, eki Yesu oimanaka nd’ewela ea etukuluku e’anto eki eko. 14Nd’afeka Yesu aolotana nd’ilombe ya Nzakomba, ko aolokela, Bala, oika: tokelake bobe lenkina, nyango emo elekola efokokwela. 15Bont’oko aokenda, ko aosangela Ba-Yuda wete Yesu ondoikyaki. 16Nd’ewel’ene Ba-Yuda baotumola Yesu, eki’nd’okelaka baoyi’ane nda Sabata. 17Lolo Yesu aolaamba, Fafa ekami ayokambe belemo elaka nk’aeyoko, ko emi njokambe. 18Nd’ewel’ene Ba-Yuda baofonga jasa loom’ende, eki’nde ntasekol’oeko wa Sabata kika, lolonde la nd’ewela eki’nd’otangaka Nzakomba Ise ekae mongo, eleng’eko aosongany’ende mongo la Nzakomba o fio.

19Nd’ewel’eko Yesu aolaamba, akela, Nsosolo, nsosolo, nsangel’inyo, Bona afokambeya bolemo lim’el’ende mongo, imola nk’olemo bonden’ende Ise akamba: ele baoyi nko loswele bakelak’Ende, Bona akelak’aoyi’ako o ngoko. 20Ele Ise oka Bona eefe, ko aoloeneya baoyi’auma bakelak’ende mongo. Koko ifoeneya belemo bendekola bene wae inyo lokamwa. 21Elenge eetolaka Ise bawei, ko akaak’iyo loiko, nk’eleng’eko Bona akaaka loiko el’iyo balang’ende wae baate. 22Nd’ewela wae Ise afotenele bont’omoko likambo, lolo aolil’ona nda mpifo e’etenelo e’akambo bauma: 23ncina wete bant’auma bamemya Bona ng’omemy’iyo Ise. Bonto ofomemya Bona afomemya Ise ondotomaki. 24Nsosolo, nsosolo, nsangel’inyo, ondokoza joi likami ko imez’ende ontomaki aata loiko ja seko, ko afaoya nd’etenelo e’akambo, lolonde aoleka lim’iwa ko aokita nda loiko. 25Nsosolo, nsosolo, nsangel’inyo, ekeke eoya, ko eokit’aeyoko ee bawei ooka lolaka ja Bona owa Nzakomba, ko iy’andoka bifoika mbaika. 26Eleng’ele Ise ale la loiko nk’el’ende mongo, o ngoko aoka Bona wae aate loiko nk’el’ende mongo, 27ko aoloka mpifo e’etenelo e’akambo nd’ewela wae ale Bona ow’onto. 28Talokamwake la joi line: ele ekeke eoya e iy’auma bale nd’eomba bekiyo ooka lolaka lokae, 29ko bifola, iy’akelaki baoyi b’olotsi bifoetswa ele loiko, ko l’iy’akelaki baoyi’obe bifoetswa ele ekwelo e’akambo.

30Emi mpokeleya joi limoko nk’emi mongo; ng’ondok’emi, nten’akambo, ko etenelo ekami eolelama, nd’ewela wae mpase lokela wango bokami mongo, lolo wango w’oko ontomaki. 31Nga nsanga nsango nd’eloko ekami mongo, nsango ekami efa nsosolo: 32onkina al’eko oyosange nd’eloko ekami, ko njea wae nsango esang’ende nd’eloko ekami ele nsosolo. 33Inyo lotomaki ele Yoane, ko ende aosanga nd’eloko ea nsosolo. 34Lolonde nsango endamb’emi efa e’anto: lolo emi ntefela baoyi’ane wae inyo loike. 35Ende aki itswa ifeta ko ya ngesingesi, ko lolangaki wae losalangane fele nda fole ekae. 36Lolo nde la nsango emo esangema nd’eloko ekami endekola eko ea Yoane: belemo beki Fafa onkaaka wae nsiza beko, wete nk’elemo’eko bekamb’emi, beko beosanga nd’eloko ekami wete Fafa antomaki. 37Koko Fafa ontomaki, ende mongo aosanga nsango nd’eloko ekami; iyo ntalokaki lolaka lokae nye, ko ntalenaki jonge likae, 38ko joi likae lifoyale nd’etema’ekinyo nye, ef’iny’oimez’ende oki’nd’otomaka. 39Inyo loyengele bikotelo bia Nzakomba, el’inyo lokanela wae nda biko loata loiko ja seko: ko bikotelo biko biosanga nsango nd’eloko ekami: 40ko lofolange loy’el’emi wae loate loiko. 41Mpambe imemya lim’el’anto. 42Lolo njea inyo wae lofa l’eefe ea Nzakomba nd’etema’ekinyo. 43Em’one njoya nda lina ja Fafa ekami, ko inyo lofonjambe; ayak’omo aoya nda lina likande mongo, lifamb’ende. 44Iny’amemyana ko lofase imemya indoya lim’el’Ende ole Nzakomba mongo, lokuseya jimeza ngamo? 45Talotangake wae njifoanda baoyi’akinyo ele Fafa; omo al’eko oyoande baoyi’akinyo, nk’ende ok’iny’oilak’etema, wete Mose. 46Nga limezaki Mose, siki lonjimezak’emi; eki’nd’okotaka nd’eloko ekami. 47Lolo nkina lofimeza bikotelo bikae, lifimeza baoyi’akami ngamo?

Currently Selected:

Yoane 5: NTMN58

Highlight

Copy