Yoane 3

1BONT’OMO aki eko owa Bafalusi, lina likae Nikodemo, engambe ea Ba-Yuda. 2Ende aoy’ele Yesu l’otso, ko aolokela, Labi, tea wae ole bolaki oyei lim’ele Nzakomba: ele nk’ont’omo okeleya ntaz’ine ikela we, imola nko Nzakomba ale l’ende. 3Yesu aolamba, aolokela, Nsosolo, nsosolo, nkosangela we, ayaka bonto ntaotswaka lima loola, afokuseya jena likulaka ja Nzakomba. 4Nikodemo aolokela, Akita bonto mpaka, aotsweya ngamo? akuseya jotswa lenkina nda likunju ja nyango ekande, ko aotswa nde? 5Yesu aolamba, Nsosolo, nsosolo, nkosangela we, ayak’onto ntaotswaka l’asi ko l’olimo, afaotsweya nda likulaka ja Nzakomba. 6Os’ootswa lim’ele jonge wae jonge, ko os’ootswa lim’ele Bolimo wae bolimo. 7Tokamwake eki’m’okokelaka, Lootswaka lima loola. 8Impempe ilekaka wiji bolang’iko, ko oloka lofoso j’iko, lolo ofea lim’eki iko oyaka, ko l’ecwa iko: nk’eleng’eko la wengi’onto ootswa l’olimo. 9Nikodemo aolamba, ko aolokela, Baoyi’ane bakelama ngamo? 10Yesu aolamba, aolokela, Kamba we bolaki mongo owa Yisalaele, ko ofea baoyi’ane? 11Nsosolo, nsosolo, nkosangela, wete toyotefela baoyi bandea iso, ko toyosange nk’ako bak’is’oenaka; ko inyo lofambe nsango ekiso. 12Nga nsangel’inyo baoyi b’okili ko lofimeza, a em’osangel’inyo baoyi ba loola, lifimeza ngamo? 13Nk’onto ondulelaki nda loola, imola nk’ende okitelaki lima loola, wae Bona ow’onto ole nda loola. 14Ngoki Mose osangyaka njwa nd’etekeleke, o ngoko Bona ow’onto ifosangema, 15ncina wete wengi’onto ondoimeza ifoata loiko ja seko.

16Nd’ewel’eki Nzakomba okaka banto b’okili bouma eefe eleng’ene, wae akaaki Bona’okande owa likinda, wete wengi’onto ondoimeza afaofitana, lolo ifoata loiko ja seko. 17Eki Nzakomba ntatomaki Bona’okae nd’okili wae aumbe ba-bokili, lolonde ba-bokili baike l’ende. 18Ondimez’ende afoumbama; lolo ofimeza aolumbama aeyoko, nd’ewela wae afimeza nda lina ja Bona owa Nzakomba owa likinda. 19Ene ekwelo wae fole eoya nd’okili; la wilima la fole, banto balangaki wilima: nd’ewela wae beketo bekiyo beki’obe. 20Wengi’onto okela bobe atonaka fole, ko afoye nda fole, nyango beketo bekae befolomwa. 21Lolo okelaka nsosolo ayaka nda fole, wae belemo bekande beolenya wete beokelama ele Nzakomba.

22Nd’afeka ba baoyi’ane Yesu la bakimi’akande baoya nd’ese ea Yudea: ko aotem’eko l’iyo, ko aolin’anto nd’asi. 23Koko Yoane ayin’anto nda Ainona ntutama la Salima, eki basi bauke eko: ko banto baoy’el’ende ko baolinama. 24Eki nd’ekeke eko atafusama nd’onyolo. 25Koko bikoli bioliela ndatsa bakimi ba Yoane la bosi Yuda la ncina ea elenge ea mpetola. 26Ko baoy’ele Yoane, baolokela, Labi, ende oki la we wij’a Yoladane, ko oki w’osangaka nsango nd’eloko ekande, bala, ayin’anto, ko bant’auma baoy’el’ende. 27Yoane aolamba, akela, Bonto ntaataka yomba imola nko iokaem’el’ende lima loola. 28Inyo mongo lolimeza wae nsangaki, Emi mpa Masiya, lolo ntomama nda joso likae. 29Oata waji wae wengi, lilongo ja wengi ondemi, ko okoz’ende ale l’osalangano nd’ewela ea lolaka ja wengi. Nd’ewel’eko, bosalangano bokami bokoka. 30Sikinde acw’okaka, lolo emi nsotsame.

31End’oya lima loola alekola bauma o ndekola mongo; lolo ende ole ow’okili ale wae ow’okili, ko atefela baoyi b’okili; end’oya lima loola aolekola bauma o ndekola. 32Ayosange baoyi baki’nd’oenaka, ko la baki’nd’ookaka, ko nk’ont’ondamba nsango ekae. 33Ondambaki nsango ekae aolila lotaza lokae wae Nzakomba ale nsosolo. 34El’ende oki Nzakomba otomaka atefela baoyi ba Nzakomba, ele Nzakomba afokaya Bolimo la njeeza. 35Ise oka Bona eefe, ko aolokaya baoyi’auma nda likata likae. 36Ondimeza Bona aata loiko ja seko, lolo otendola Bona afaena loiko, lolonde nkele ea Nzakomba eoyal’el’ende o njalema.

Currently Selected:

Yoane 3: NTMN58

Highlight

Copy