Yoane 1

1JOI liki nd’iango, ko Joi liki la Nzakomba, ko Joi liki Nzakomba. 2Ende aki la Nzakomba nd’iango: 3wengi yomba emamaki l’ende, nko yomba imoko ikociki iki’nde ntema. 4Loiko loki el’ende, ko loiko loki fole e’anto: 5koko fole eofolala nda wilima, ko wilima ntumbak’eko. 6Bont’omo aolenya, oki Nzakomba otomaka, lina likae liki Yoane. 7Ende ayaki oyalema bosangi, wae asange nsango ea fole, ncina wete bant’auma bimeza l’ende. 8Ende ntaki fole eko, lolo ayaki wae asange nsango ea fole. 9Fole ea nsosolo wae eko efolaza wengi’onto, eoya nd’okili. 10Ende aki nd’okili, ko bokili wemami l’ende, lolonde ba-bokili ntaboea. 11Ayaki eka’nde mongo, ko bakande mongo ntaboamba. 12Lolo iy’andoambaki, aolaka iyo mpifo wae bayaleme bana ba Nzakomba, wete iy’andimeza nda lina likae, 13iy’aotswaki, afa l’alongo, ko afa la wango wa jonge, ko afa la wango w’onto: lolonde baotswaki la Nzakomba. 14Koko Joi joyoyalema wunyu, ko likokit’ase l’iso: (tolena jilangi likande—jilangi ngole ja bona owa likinda owa Ise) ende aokama l’oya ko la nsosolo. 15Yoane aosanga nsango ekande, aobeleza, akela, One wae ende oki’m’osangelak’inyo. Os’ondiel’emi aoyala nda joso likami: nd’ewel’eki’nde nda joso likami. 16Is’auma tolamba lim’ofula bokae, boya l’oya. 17Bisekyelo bikaemaki la Mose, lolo boya la nsosolo baoya la Yesu Masiya. 18Nk’ont’ondenaki Nzakomba nd’ekeke nko loswele: lolo Bona owa likinda, ole nda ntolo ea Ise, ende aoleanya Nzakomba.

19Ene wae nsango eki Yoane osangaka aki Ba-Yuda ba Yelusalema otomaka nkanga ko la Ba-Lewi wae bouole, We ole na? 20Aolimeza, ko ntangana nye, aolimeza: Emi mpa Masiya. 21Ko baolouola, Nkin’o ngoko, ole na? W’ol’Eliya? Aokela, Mp’ende. W’ole boteli’oko? Aolamba, Onye. 22Nd’ewel’eko baolokela, We ole na, wae tokaoza iy’atotomaki. Joi litefela we nd’eloko eke mongo na? 23Akela, Emi nde lofoso j’ont’omo obeleza nd’etekeleke, Locilaza mboka ea Yawe ci, ngoki Yesaya owa boteli okelaka. 24Iy’atomamaki el’ende baki Bafalusi. 25Ko baolouola, baolokela, Nkin’ofa Masiya, ko ofa Eliya, ko ofa boteli’oko, oyin’anto nd’asi lae? 26Yoane aolaamba, akela, Emi njin’anto nd’asi, lolo Omo emi nd’etei ekinyo of’iny’oea, 27wae end’ondiel’emi, of’em’eji lolembola bekulu bia bikoto bikae. 28Baoyi’ane bakelamaki nda Betania, wij’a Yoladane, nd’itenela iki Yoane oinak’anto nd’asi.

29Nda mbile ea lobi, aolena Yesu aoy’el’ende, ko akela, Bala, bona owa mpate owa Nzakomba ondimola bobe w’okili. 30One wae end’oki’m’okelaka, Nd’afek’akami bont’omo aoya oyalemaki nda joso likami: nd’ewel’eki’nde nda joso likami. 31Ko emi ncoea; lolo njoy’oin’anto nd’asi wae ende enya ele Yisalaele. 32Yoane aosanga, akela, Njenaki Bolimo ayokitele, ngol’embenga, lima loola: ko aoyal’el’ende nkotama. 33Koko emi ncoea: lolo ontomaki wae njin’anto nd’asi, ende aonkela, oe we wena Bolimo ayokitele ko ayafem’el’ende, ende wete ondin’anto nd’olimo w’olotsi. 34Ko emi njolena, ko njosanga wete, One ale Bona owa Nzakomba.

35Lenkina nda mbile ea lobi, Yoane akemi, ende l’akimi’akande bafe, 36ayoale Yesu nk’aki’nd’olande, ko akela, Bala, bona owa mpate owa Nzakomba! 37Koko bakimi’ak’afe baolok’end’atefela, ko baokima Yesu. 38Ko Yesu aokengwana, ko aolaena bayokim’ende, ko aolakela, Inyo lasa na? Iyo baolokela, Labi, wae Bolaki, okit’ase nko? 39Ende aolakela, Loyaka, lene. Koko baocwa, ko baolena boyalo boki’nde, ko baoyala l’ende mbil’eko: eki nkina quatre heures. 40Omoko ow’ak’afe bandokaki Yoane ko bakimaki Yesu wae Andelo okosangi la Simona Petelo nd’ooci. 41Nda joso ende aotana Simona osangi l’ende, ko aolokela, Tolena Masiya: wae Kilisito. 42Ko aoloyel’ele Yesu. Ko Yesu aoloteemeza, ko akela, We ole Simona, bona owa Yoane: wifotangema Kefa, wae Petelo.

43Nda mbile ea lobi, Yesu aki la wango wae acwe nda Ngalilaya, ko aotana Filipo, ko Yesu aolokela, Yonkime. 44Filipo aki bosi Betesaida, bonanga wa Andelo la Petelo. 45Filipo aotana Natanaele, ko aolokela, Totan’end’oki Mose okotaka lotelo nda bisekyelo, ko oki bateli okotaka lotelo wae Yesu owa Nazaleta, bona owa Yosefa. 46Koko Natanaele aolokela, La joi j’olotsi joya lima Nazaleta? Filipo aolokela, Yaka, yene. 47Yesu aolena Natanaele aoy’el’ende, ko akela, Bala, Bo-Yisalaele owa nsosolo, ofa l’okakatano nye. 48Natanaele aolokela, Onjea emi lima nko? Yesu aolamba, aolokela, Atafa Filipo oketa, aki we nd’ase b’otamba wa liteli, nkenaki. 49Natanaele aoloamba, Labi, we ole Bona owa Nzakomba, Bokulaka owa roi owa Yisalaele. 50Yesu aolamba, aolokela, Wimeza nde nd’ewel’eki’m’okosangelaka, Nkenaki nd’ase b’otamba wa liteli? Wifena baoyi bandekola bane. 51Koko aolokela, Nsosolo, nsosolo, nkosangela, lifena loola lokombwa, ko bikima bia Nzakomba bayounde ko bayokitela ele Bona ow’onto.

Currently Selected:

Yoane 1: NTMN58

Highlight

Copy