Mateo 8
8
1Habaikile ha ngulu, bibumbu bikata bibamulondele. 2Talai! kubafikile muntu sha kifwi, bamulangwile’shi, A Nfumu, s’okyebe, weuku kuntosha. 3Yesu bōlwele eyasa di’E, bamukumine’shi: Nankyebe, wekale mutoshibwe. Na kahindji n’āka busungu bwe bwa kifwi bubatoshibwe. 4Yesu bamulungwile’shi, Tala! tolungulanga muntu sunga ngumune; anka wende, okeleshe kwi tshiite-mwakwidi, lambula buntu bwobe bubakamikile Mosesa bu kitundwilo ku mpala kwa bantu.
5Habatwelele Yesu mu Kahanauma, mulami a basalai lukama bafikile kwadi, kwete kumwiyayila ’shi: 6A Mwanana, mufubi ande mulale mu nshibo na busungu bwa mufwe-mbidi, kwete kumona malwa e moo. 7Yesu bamulungwile’shi, Nankafiki, nkamuhwisha busungu. 8Mulami a basalai bamwalulwile’shi, A Mwanana, nkimuhwandjikil’obe kutwela munda mwa nshibo yande; anka akula’nka n’eyi diobe anka’dio, biabia mufubi ande akahwishibwa (busungu). 9Mwanda, ami nyi muntu muhebwa matalwa, nami namu nyi na bashidika ku nyima kwande; nalungula uno’shi, nda, ēnde; na kwi mungi’shi: Fika, afiki; na kwi mpika ande, kita kino’ki, akikitshi. 10Habahushishe Yesu biabia bakanyine, balungwile babadi abamulondo’shi: Binyibinyi, nenulungula’shi: Nkimumone lukuluhilo lukata hamune luno, ooo, sunga mu Isalele. 11Nenulungula’shi: Bantu be bungi abakafiki ku akutunduka na kuhono nguba, abakashala n’Abalahama na Isaka, na Yakoba mu bufumu bwa mwiilu. 12Anka bana ba bufumu abakēlwa ’mufito wi fututu, mukekala kudila na kwisuma kwa meno. 13Biabia Yesu balungwile mulami a basalai’shi: Nda kwobe, bu bibokumina, bikukitshinwe k’odi. Na ha nguba yawa mufubi e badi muhashwe busungu.
14Habatwelele Yesu mu nshibo ya Petelo, bamwene mukwa e mukashi mulale na busungu bwa kālo ku mbidi. 15Biabia bakumin’eyasa die, na kālo kabamulekyele; biabia e na mwinyi babukile, tebafubila.
16Hakuhona kwa nguba, babafikile na be bungi abakwatshibwe na bikudi bibi: bebibingile n’eyi di’E, bahashishe boso abakumbu. 17Biabia kukumbashwa bibākwilwe ku mutemuki Esaiye’shi: Na mwinyi bātshile mikumbo yetu, bātwadile namu masungu (etu).
18Yesu habamwene bibumbu bikata bibamwifunyine, E bambile’shi: Tukatukyei, twabukyei adi’eshia. 19Biabia mufundji-a-mikanda bafikile kwadi, bamulungwile’shi: Mulambukishi nankakulondo koso kwende. 20Yesu bamwalulw’ile’shi, miseo yi na mena’yo, tonyi tw’eilu twi na maswa; anka Mwan’a muntu te na hakusamina mutwe (we). 21Mungi mwan’a bukishi e bamulungwile’shi: A! Mwanana, onkumina’mi kwibedi nyende mu kushīka shami. 22Anka Yesu bamwalulwile’shi: Ndonde, olekye bafwe bashīkye batwe babo bana bene.
23Habaikile mu bwato, bana be ba bukishi abamulondele. 24Talai! kihahi kikata kibabukile h’eshiba; ha uno mwanda, bwato bubaule na mantanki a mbundambunda a mema, ank’e badi mulale mu tulo. 25Bana be ba bukishi abafikile kwadi, abamubushishe’shi: A Mwanana etuhashe ngiu watufu. 26Bebalungwile’shi: A nkinyi kibenukwata mō, ō anwe ba lukuluhilo luhela? Henyihaha bebwele, basashile bihaha na mema’eshiba, na kubafikile anka nyaa talō. 27Bantu balume abakanyine’shi: Au nga kihaso kinyi? Bihahi bi na mwinyi n’eshiba dia mema abimukokyela!
28Habadi mufikile adi’ eshīa mu nsenga ya Bena Ngadalene, kubafumankene n’e bantu babidi babadi bakwatshibwe na bikudi bibi, babatukile ku mashama, babadi bakambe bukyelo, biabia mungi muntu tabadi euku kukila dianka. 29Talai! ab’ēle musase’shi: Obe Yesu Mwan’Efile Mukulu twi n’obe mwanda kinyi? Obe bofiki kwitufwambusha kwibedi kwa kihindji takiabandjila kufika su? 30Kubadi lombe lwa ngulube kula n’abo yikwete kudia. 31Biabia, bikudi bibi bibamusendelele’shi; Su etukatushe, etukumine kwenda mu lombe lwa ngulube. 32N’e bebilungwile’shi: Ndai; habibadi bakatukile bibayile mu lombe lwa ngulube, talai! lombe lwoso lwa ngulube lubabututukile lubilo ha ngalala yimo, yibahone mwishiba, yibafwile. 33Abo babeyilamanga babasukile, babayile mu kibalo kiabo, babakwile mwanda woso, nao ubakitshinwe kwibo bakwatshibwe na bikudi bibi. 34Binyibiabia, bantu boso ba mu kibalo, babafikile kufumankana na Yesu: Habamumwene, babamusendele’shi: Akatukye ku yino mpese yetu.
Currently Selected:
Mateo 8: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo
