Luka 22
22
1Binyibiabia kidibwa kia mampa ashī na kitatusho takibadi hehi, akitemunwa bu Pāque. 2Biabia batshiite-bakwidi bakata na bafundji ba mikanda, abakimbile mwa kumwihayila, mwanda abatshine bantu.
3Henyihaha Satana batwēle mu Yudasa, eshina die diakabidi dibadi bu Isakadiota biabadi mwikale a ku b’ekumi na babidi. 4E bayile eshinda die, akesamba na batshiitebakwidi bakata na bimankinda mwadia kumwihukila kihuko kwabadi. 5Abo abasehelele, abalombene n’e kumuha nfalanga. 6Bebalayile, bakimbile mwa kumusokwela kwabadi ha shībadi kibumbu kia bantu kwanka.
7Henyihaha efuku dia mampa ashī na kitatusho dibafikile, diabadi na wa kwiha bia Pāque. 8E batumine Petelo na Yoano eshi: Ndai nuketulumbulwila Pāque tudye. 9Biabia abamwihwishe’shi: A kokyebe tulumbule kwi kunyi? 10E bebālulwile’shi: Talangai, hanutwele mu kibalo, anukafumankana na muntu mutwal’ebuka dia mema: numulonde mpaa na mu nshibo yiakatwele. 11Anukalungula sha nshibo’shi: Mulambukishi akwihusha’ shi: A nshibo ya benyi yi kwi kunyi mwandjia kudila bia Pāque na bana bande ba bukishi? 12E akenulesha kadimbo kakata ka kwiilu kalumbulwe, nulumbulwile’bio mwanka. 13Abo abayile, abasañene anka biabebalungwile: n’abo abalumbulwile bia Pāque, 14Habakumbene nsa, bashalele na batumibwa ekumi na babidi hamune n’e. 15Biabia bebalungwile’shi, nyi na musanku kukyeba kudia nenu kino kidibwa kia Pāque kwibedi kwa kufwambuka kwande. 16Mwanda nenulungula’shi: Tankeyidi nenu dimo, mpaa na hayikakumbashwa mu bufumu bw’Efile Mukulu. 17E bātshile ekuho, batumbwile, bambile’shi: Tambulai dino, nwibekyeshene munkatshi mwenu. 18Mwanda nenulungula’shi: Tankatomo bia ku bikuba bia nfinyo mpaa n’ahakafiki bufumu bw’Efile Mukulu.
19Biabia bātshile mampa, batumbwile, beabaswile, bebahele’shi: Ano nyi mbidi yande yibenuhebwa; kitai bino mwa kuntentekyesha. 20Hakuhwa kudia kitomeno namu anka hamune’shi: Kino kitomeno nyi kilombeno kihya kia mu mas’ande abenusumbukile. 21Anka talangai, easa dia winyi anyihuluka di n’ami ha mesa. 22Binyibinyi Mwan’a muntu ’ēnde, bu mwa kidi kifunwe: anka mpombo kwi yawa muntu amusokola. 23Biabia ababangile kwīhushena munkatshi mwabo’ shi: akakitshi kino kintu nanyi?
24Binyibiabia, kubadi mpaka namu munkatshi mwabo’shi, a nanyi akyebe kutumbwa bu mukile bakwabo. 25E bebalungwile ’shi: Bafumu ba Bajentaila abebakitshisha butontshi hanundu habo: n’abo abebakitshisha butontshi, abatemunwa bu, Basha bu-muntu. 26Anka’nwe tanukekala biabia, anka yawa mukile bukata munkatshi mwenu, ekale bu mukinga; n’e bu kimankinda, ekale bu mufubi. 27A biabia mukile’nyi nanyi? a mushale ku bidibwa’nyi ngatumibwa? Ta ngyawa ashalā ku bidibwa? anka’mi nyi munkatshi mwenu bu atumibwa. 28Anwe nwi babadi bekale n’ami mu kutompibwa kwande. 29Ami nenusangwile bufumu, bu bibansangwidile Yaiya; 30eshi, nudie, nutome ku mesa ande mu bufumu bwande, na kushala ha mpunānsulu, kutshiba myanda ya bisaka bīkumi na bibidi bia Bena Isalela.
31Binyibiabia Nfumwetu bakwile’shi: Shimona! Shimona! tala Satana bakamikile kukukwata mwadia kukuhehwila bu ngano. 32Anka’mi tankutekyele’shi, lukuluhilo lobe talukakutshikwa: na hokāluluka kwishimba okankamike bakwenu. 33Biabia bamwalulwile’shi: A nfumwetu, nyi mwimene kwenda n’obe ku nshibo ya lukano na ku lufu. 34(Yesu) bamwambile’shi: Petelo, nakulungula’shi: etombole tadikasamina lelo uno kwibedi okantunu misusa yisatu’shi: Tamwiuku’mi.
35E bebalungwile’shi: Hanenutumine tanubadi n’edimba, sunga ebofu, sunga bilato nubakutshilwe kintu su? Abamwalulwile’shi: Ooo, sunga nkahela. 36Henyihaha bebalungwile’shi: Anka binobino, sh’edimba ediate n’ebofu die hamune: yawa namu shī na luhete lwa ngoshi ahane mutwelo we elūle. 37Mwanda nenulungula’shi: uno ubafundjibwe waudi na’o ngwa kukumbashwa mwimi’shi: Badi mubadikwe na basodi ba myanda. Mwanda bintu bioso binemene bi na kunfudilo. 38Abo abakwile’shi: A Mwanana, mpete yibidi ya ngoshi ngii. N’e bambile’shi: Kubahu.
39E batukile, ēnda, mwiyile kihikwa kie, ku ngulu ya Olefeta, na bana be-ba-bukishi abamulondele namu. 40Habafikile ku kihindji, bebalungwile’shi: Nutekei’shi, tala nwakafishwa mu kutompibwa. 41Bakungulukile kwabadi hehi bu kihimo kia kwelwa ebwe diakafika, henyihaha bakunamine, ateka’shi: 42Obe Yaiya, su okumina, kasha dino ekoho kwandjimi; anka tamwankyebela mwishimba diande, ooo, anka mokyebela mukitshibwe. 43Biabia mwikeilu a mwiilu bamwekyele kwadi, bamunyishishe. 44Biabia hakufika na mitanyo yikata, banyingamene na luteko, na matahuta e abālulukile bu makohola akata a mase abanokyele hashi. 45Habebwele ku luteko lwe, bafikile kwi banabe-ba-bukishi, bebasañene balale tulo ku bishiotshi. 46Biabia bebahwishe’shi: A nkinyi kianudi balale tulo? bukai nutekye, tala nuakatwela mu kutompibwa.
47Na habadi ākula, talai, kibumbu na yawa aitanyinwa bu Yudasa, umune a ku bekumi na babidi, badi ende ku mpala kwabo, befubwīle hehi na Yesu humufifya ku kanwa. 48Anka Yesu bamwihwishe’shi: A Yudasa oyihuluka Mwana muntu na kufifya ku kanwa su? 49Biabia abadi hehi n’e habamwene ubadia ulondo abamwihwishe’shi: A Nfumwetu, twibatahe na luhete lwa ngoshi su?
50Na umune abo batahile mufubi a tshiite-mwakwidi mukata, amutshib’etwi dibalume. 51Biabia Yesu bamwalulwile’shi: Banda kuleka. Henyihaha bamukumine kwitwi, amuhwīsha. 52Henyihaha Yesu bakwile kwi batshiitebakwidi bakata, na kwi bimankinda bia mu ntempelo, na bakulu abafikile kwadi’shi; A nubatuku na mpete ya ngoshi, na tubongye bu abakyebe kulwa na munyefianyi? 53Hanadi nenu mu ntempelo kwifuku n’efuku, tanwibōle masa kunkwata: anka yino nyi nsa yenu, na matalwa a mufito.
54Henyihaha abamwatshile bamukunkusha, bakamufisha mu nshibo ya tshiite-mwakwidi mukata. Biabia Petelo badi a mulondo kunyima kula. 55Habosheshe kālo munkatshi mwa luhoho, bashala humune, biabia Petelo bashalele munkatshi mwabo. 56Henyihaha nsongwakashi umune bamumwene habadi mushale ku kālo, bamutale swee, bambile’shi: Uno muntu namu badi n’E. 57Anka e bamutune’shi: Obe mwana mukashi ntamwiuku’mi, ooo. 58Hakubayishishe kahindji kahela mungi namu bamumwene, bambile’shi: Obe namu we untune abo. Biabia Petelo’shi: Obe muntu, ami, ooo. 59Biabia habakile kihindji bu nsa yimune, mungi namu bakwil’anka musumine’shi: Binyibinyi au muntu namu badi anka n’e, mwanda e Mwina Ngadileo. 60Henyihaha, Petelo bambile’shi: Obe muntu, taftuku biokula’bi. Biabia kahindji n’āka habadi kiakula, etombole dibasamine. 61Binyibiabia Nfumwetu bealulwile, atala kwi Petelo. Henyihaha Petelo batentekyeshe mwanda wa Nfumwetu bu bamulungudile’shi: Kwibedi etombole tadiadile, obe akantunu misusa yisatu. 62Biabia Petelo batukile, tadidi bikata na mpolo.
63Baba bantu abadi abakwata Yesu, abamusengyele, tabamukuhila. 64Binyibiabia habamwanyine kitambala ’eso, abamukuhila mu mpala, tabamwihusha’shi: Temuna bakukuhila e nanyi? 65Na yingi myanda yibungi yiabamwambile yibadi anka yiakūmuka.
66Binyibiabia habubatokyele na mashika, bakulu ba bantu, na batshiite-bakwidi bakata, na bafundji-ba-mikanda abekongyele hamune, abamukishishe ku meso, benda n’e ku kimu kiabo’shi: 67Obe, we Kidisitu su? etulungule. Ank’E bebalungwile’shi: Nenulungula, tanukakumina. 68Sunga nenwihusha namu tanukañalula mwanda, sunga kumposola. 69Kubanga lelo uno mpaa na ku mafuku e ku meso, Mwan’a muntu akashala ku mboko yibalume ya bukome bw’Efile Mukulu. 70Henyihaha boso abamwihwishe’shi: a biabia, obe Mwan’Efile Mukulu su? E bebālulwile’shi: Anwe bianwakula. 71Biabia abakwile’shi: Atukyebe kangi kamonyi na minyi? mwanda tubahu kwihushisha’twe bana bene ku kanwa kwe.
Currently Selected:
Luka 22: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo