Luka 13

1Ha kiakia kihindji kubadi bamo abamulungwile mwanda wa Bena Ngadilea’shi: Pilato badi asangakana mase abo na milambu ya bitahilo biabo. 2Biabia Yesu bebālulwile’shi: Anutentekyesha’shi, bano Bena Ngadilea abadi balwishi kukila Bena Ngadilea boso ha mwanda abamwene ano malwa? 3Nenulungula’shi, ooo, anka su tanwilanga ’mashimba enu, anwe boso anukalwila’nka hamune. 4Sunga mbaba ekumi na mwanda abahonenwe na musungo wa Siloama ubebahayile boso, anutentekyesha’shi abadi basha balwishi bakile bantu boso ababombela mu Yelusalema su? 5Nenulungula’shi: ooo, anka su tanwilanga ’mashimba enu anwe boso anukalwila’nka hamune.

6E bēle luno lukindji’shi: Kubadi muntu badi na mutshi wa kikuku ukunyibwe mwifuba die dia nfinyo, bafikile mu kukimba bikuba hanka, tamusanane sunga nkimune. 7Henyihaha balungwile mulami’efuba’shi: Talanga bino bihwa bisatu nafikile kukimba bikuba ha uno mutshi wa kikuku, nki musa nane’bio, sunga nkimune: eushinde, a nkinyi kiaukwete kulwisha nsenga bisumanga. 8E bamwalulwile’shi: A Nfumu banda kwiulekye namu kino kihwa, mpā na hankeudimina na kutshinkisha nsenga hanka. 9Biabia su ngwa kuha bikuba (biabia bibuwa), su mbisumanga okeushinde hashi.

10Binyibiabia badi alambukisha mu kitumbwilo kimune; h’efuku dia Sabado. 11Tala! kubadi mwana mukashi badi na kikudi kimubofushe bihwa ekumi na mwanda; badi mu tontshibwe kiongo, badi teuku kubanduluka sunga mpahelahela. 12Yesu habamumwene, bamwitanyine bamulungwile’shi: Obe mwana mukashi bohosolwa ku busungu bwobe. 13Bamutentekyele masa, biabia kahindji n’āka bolokyele, batumbishe Efile Mukulu. 14Binyibiabia mulami a kitumbwilo, badi na nsungu mwanda Yesu bahashishe (bantu) mwifuku dia Sabado, balungwile bantu’shi: Kwimafuku asamombo alombene bantu kufuba: binyibiabia nufikye mu aa mafuku kuhashibwa kushī h’efuku dia Sabado, ooo. 15Anka Nfumwetu bamwalulwile’shi: Obe nsesa, ese’enu shyashitula ku kikutu ngombe’e sunga mpunda hadilā, kwiyifungila ku mema h’efuku dia Sabado, nanyi? 16A uno mwana mukashi biadi mwikale mwan’Abalahama mwanyibwe kwi Satana, bihwa ekumi na mwanda: tambilombane kumuhosola h’efuku dia Sabado su? 17Biabia habākwile yino myanda, boso abadi betuhishena n’e, abakwetwe na būfu: na bantu boso abasehelele mwanda wa bintu bioso bia ntumbo bibakitshine kwadi e.

18Henyihaha bakwile’shi: Bufumu bw’Efile Mukulu bwi bu kinyi? Nankebuhwandjikisha namu bu kinyi? 19Mbuhwandjikile bwimuma dia lubyo lwa moutade dibātshile muntu, edimina mwifuba die, diamena diatama, tamutshi ukata; biabia tonyi twa mwiilu tubalalanga mu ntabi yao.

20Bakwile dimonyi’shi: Bufumu bw’Efile Mukulu mbuhwandjikile bu kinyi? 21Bwi bu kitatusho kibātshile mwana mukashi, ekifia mu bihimo bisatu bia bukula, mpā na hakibatatwishe bioso. 22E batambukile mu bibalo bioso na misumba yoso, badi alambukisha bantu badi ēnde luendo ku Yelusalema.

23Henyihaha umune bamwihwishe’shi: Obe, Nfumwa mi: aba hashibwa mbahela su? E bebālulwile’shi: 24Nyishai bikata kutwela mu kibelo kihela, mwanda nenulungula’shi: Bebungi abakakyebe kutwela, abakakutwa. 25A hakabuku sha nshibo, na kushita ku kibelo, anwe nwanabangye kwimana hasha, na kukukula ku kibi’shi: A Nfumwetu! A Nfumwetu, etushitwile; biabia anakalule na kwinulungula’shi: Tanyinwiuku kwa nufiki. 26Henyihaha nwanabangye kwakula’shi: Tubadile, tubatomene ku mpala kobe, n’obe bolambukishe namu mu misē yetu. 27Ank’e anakālule’shi: Nenulungula’shi: Tanyinwiuku kwa nufiki, katukai kwandjimi, anwe boso bakitshi ba bubi. 28Kwanakekale kudila na kukyeneka meno, hanwanakamone Abalahama, na Isaka, na Yakoba na batemuki boso, mu bufumu bw’Efile Mukulu, n’anwe (bana bene) nwanakatakulwe hasha. 29Abakafiki kwa kutunduka nguba, na kwa kuhon’a nguba, na ku Noda na ku Sude, abakashāla mu bufumu bw’Efile Mukulu. 30Biabia talangai, kwi ba kunfudilo, banakekale ba kwibedi, na ba kwibedi banakekale ba kunfudilo.

31Ha diadi’efuku kubafikile bamo ba ku Bafadiseo, banwambile’shi: Katuka wende, mwanda Heloda akakwiha. 32E bebalungwile’shi: Ndai mulungule wawa museu: Tala biambingi bikudi bibi, nahwisha masungu lelo na maloba, na h’eluku dia kasatu nankahudisha mpā. 33Sunga mbiabia wandji n’au nyi ngwa kutambuka lelo, na maloba, n’āmaloba: mwanda ushyauku mutemuki kushimina mu Yelusalema, ooo. 34A ee! Yelusalema, Yelusalema oiha batemuki na kwasa binyi bakutuminā mabwe; misusa na misusa nadia kukongyelesha bana bobe hamune bu nsolo akongyelesha bana be mushi mwa mbaba, anka’nwe nubatune. 35Talangai! nshibo yenu ayinulekyelwa bu kishiboshibo, binyibinyi nenulungula’shi: Tanukamono mpā na (ha kihindji) kia nwanakakule’shi, Mwabi kwi yawa afikī mwishina dia Yehowa.

Currently Selected:

Luka 13: NTLK52

Highlight

Copy