Yoane 17

1Eneki Yesu otendaka baoyi’aho, aenol’aiso’anande ena loola, ko aila, ate, Bafango, esike emoyela; kumya Bon’one lacin’eho Bon’one akokumy’e; 2yok’onoki e ofak’ende lifoka eneyali bato bahatu, lacina af’iyatu banak’ofak’ende liiko lonelofakale. 3Liiko lonelofakale loho lone: nko lacin’eho bakey’e onde Yakomba mene ena solosolo, ko baey’ende onok’otomaka, nko Yesu Masiya. 4Emi mokokumy’e ena loko, eneki’m’okadyaka ekambwa eho enek’ompaka lacina nkambe. 5Ko isanga, Bafango, onkumy’emi l’eamene nko la lokumo loneloki’m’oataka eneyat’e kuma loko lotanunolama. 6Meyanya lina line eneyali bato’a’no banak’ompaka ena loko. Bayaaki nko baneamene, ko ompak’iyo, ko bamomonya yoi line. 7Isanga bamey’oka baoyi bahatu banak’ompaka bayaki nk’eneyat’e; 8lacin’emi molafa baoyi banak’ompak’emi; ko bamotamba baho; ko bamonongany’oka emi njaki eneyal’e, ko bamimedy’oka e ontomaki. 9Lomaondel’iyo; mpaondele baise loko, laondela bane banak’ompaka, lacin’iyo bayali nko bane; 10banami bahatu bayali nko bane, ko bane bayali banami, ko lakumyama eneyal’iyo. 11Emi mpayale takina ena loko; koko bane bayali ena loko, ko emi loya eneyal’e. Bafango on’oeka, oamony’iyo banak’ompaka ena lina line, lacin’eho bayalame omoko, yoka bosamb’onoyal’iso omoko. 12Eneki’m’oyalaka l’iyo ena loko njamonyaki ena lina line linaliki ompaka; njatombanyaki, ko efan’omoko’oniyo onehaki, umola nko bon’ona eehedyo, lacina Bitengelo bina Yakomba biilame. 13Koko isanga loya eneyal’e, ko latenda baoyi’ane kuma njali ena loko, lacin’eho ekiko enami efudyame en’etem’eniyo. 14Molafa yoi lineamene, ko bato bana loko bamomaoka bowe, lacin’oka iyo bafayali bana loko, yoka bosambo bonofayal’emi ona loko. 15Mpil’oka oaumole ena loko: lakoonda oatombanya eneyali boto’oho On’owe. 16Iyo bafayali bana loko, yoka bosambo bonofal’emi ona loko. 17Oaeky’iyo en’oeka la solosolo ene: yoi line liyali nko solosolo eho. 18Yok’onok’ontomak’emi ena loko, nk’osamb’oho nja tomak’iyo ena loko. 19Ko lacin’eniyo layoeky’emamene en’oeka, lacin’eho iyo baekyame en’oeka la solosolo eho. 20Mpaonde lacin’eniyo kei; laonda lacin’ena bato’aho banangonjimedya linga lacin’ena yoi liniyo; 21lacina iyatu bayalame nk’omoko, yoka bosamb’onoyali e, Bafango, eneyal’emi, ko emi eneyali e: iyo bayalamake nk’omoko eneyal’iso; lacin’eho baise loko baimedy’oka e ontomak’emi. 22Momafa bokonde’one bonok’ompak’emi; lacin’eho bayalame nk’omoko, yoka bosamb’onoyal’iso nk’omoko; 23emi eneyal’iyo, ko e ene emi, lacin’iyo baongyame yok’omoko kei; lacin’eho baise loko baeye oka e kongontomak’emi, ko oaokak’iyo nganji, yoka bosamb’onok’onjokak’emi nganji. 24Bafango, lalanga lacina baho banak’ompaka bayalame l’emi en’edye eneyal’emi, lacina baene bokonde bonami bonok’ompaka; lacin’oka onjokaki nganji kuma loko lotanunolama. 25O Bafango ona mbongi, bato bana loko batakeya; ohonde emi nkeyaki, ko bane bamey’oka e kongontomaki. 26Ko emi momaeyanya lina line, ko nongaeyanya liho; lacina nganji enek’onjokak’emi eyalame en’etem’eniyo, ko emi njale eneyal’iyo njalama.

Currently Selected:

Yoane 17: BBY62

Highlight

Copy