Matai 21
21
Yesu kota mu Yelusalemi
1Bu bau kwizaka mfinama ku Yelusalemi ye kwizaka ku Betefange ku mongo ya Olive, Yesu fidisaka banlonguki zole. Mal. 11:1; Luk. 19:29; Yoa. 12:12
2Yandi tubaka kwa bau: Kota mu bwala ya ikele nantwala ya beno, ye nswalu beno tamona mpunda nkento ya kangwa, ye mwana ya yandi. Kangula bau ye twala bau kwa mono.
3Kana muntu tuba mambu kwa beno, beno tatuba: Mfumu ikele na bau kisalu nswalu yandi tafidisa bau,
4Mambu yai vandaka mpilayai, na yo lenda kumaniswa ya tubwaka mu mbikudi, kutuba:
5Tuba kwa nkento ya Sioni: Tala, ntinu ya nge ikele kwiza kwa nge, na nlembami ye vanda va mpunda, va mwana ya mpunda. Yes. 62:11; Zak. 9:9
6Banlonguki kwendaka ye salaka bonso Yesu sikidikisaka bau.
7Bau twalaka mpunda nkento ye mwana ya yandi, ye tulaka bau mvwatu ya bau; ye yandi vandaka va bau.
8Bantu mingi ya kibuka tulaka mvwatu ya bau va nzila, bankaka zengaka mavala ya banti ye tulaka yau na nzila.
9Bibuka ya kwendaka nantwala ye ya landaka bokaka, kutuba: Osana kwa mwana ya Davidi! Yandi ya kwiza mu nkumbu ya Mfumu ikele nkwa lusakumunu! Osana mu zulu ya zulu. Nk. 118:25; Mat. 23:39; Luk. 19:38
10Bu yandi kotaka mu Yelusalemi, mbanza yamvimba vandaka na makalele, bau tubaka: Yai ikele nani ?
11Kansi bibuka tubaka: Yandi ikele Yesu, mbikudi ya basika na Nazaleti mu Ngalili. Mat. 2:23
Yesu vedisa tempelo
12Yesu kotaka mu tempelo ya Nzambi, ye kulaka bau ya tekaka ye sumbaka mu tempelo, ye pindulaka bameza ya basompisi ya mbongo ye bakiti ya bateki ya mayembe; 5 Mose 14:25; Mal. 11:15; Luk. 19:45
13yandi tubaka kwa bau: Yo ikele kusonama: Nzo ya mono fwiti kubingwa nzo ya lombilu, kansi beno kitula yo sika ya bantani. Yes. 56:7; Yel. 7:11
14Bampofo ye bau ya tembila kwizaka kwa yandi mu tempelo, ye yandi belulaka bau.
15Bu bambuta banganga ye bansoniki monaka mambu ya yituka ya yandi salaka, ye bana ya bokaka mu tempelo ye tubaka: Osana, mwana ya Davidi! Buna bau vandaka na makasi,
16bau tubaka kwa yandi: Nge kuwa mambu ya bayai ikele tuba ? Kansi Yesu tubaka kwa bau: E, beno tangaka ve: Mu munoko ya bana fioti ye bana ya yamwa nge imene kulungisa nzitusu ya nge. Nk. 8:2
17Yandi bikaka bau ye basikaka na mbanza ye kwendaka ku Betania ye lalaka kuna.
Yesu tula ndola va nti ya figi
18Na suka-suka bu yandi vutukaka ku mbanza, yandi vandaka na nzala. Mal. 11:12, 20
19Bu yandi monoko nti ya figi mfinama ku nzila, yandi kwizaka ku yo, kansi yandi monaka kima ve va yo, kansi matiti kaka. Yandi tubaka kwa yo: Nge tabuta mabundu diaka ve mvu ya mvu. Nswalu nti ya figi yumaka.
20Bu banlonguki monaka yo, bau yitukaka, kutuba: Mpila nki nti ya figi yumaka nswalu ?
21Yesu vutulaka ye tubaka kwa bau: Kieleka, mono tuba kwa beno: Kana beno ikele na lukwikilu, ye ikele na ntembe ve, beno tasala kaka ve yina ya salwaka na nti ya figi, kansi beno tatuba mpe ku mongo yai: Nanguka ye dilosa mu mbu, ye yo tasalwa. Mat. 17:20; Luk. 17:6
22Yonso ya beno lomba mu lombilu, kana beno kwikila, beno tabaka yau. Mat. 7:7; 18:19; Yoa. 15:7; 1 Yoa. 3:22; Yak. 1:5
Bambuta banganga yuvula Yesu ngolo ya yanai
23Bu yandi kotaka mu tempelo, bambuta banganga ye bambuta ya bantu kwizaka kwa yandi bu yandi vandaka kulonga, ye tubaka: Mu ngolo nki nge ikele kusala mambu yai, ye nani pesaka nge ngolo yai ? Mal. 11:27; Luk. 20:1; Bis. 4:7; 7:27
24Yesu vutulaka ye tubaka kwa bau: Mono mpe tayuvula beno diambu mosi. Kana beno tuba yo kwa mono, mono mpe tasonga beno na ngolo nki mono sala mambu yai.
25Mbotika ya Yoane katukaka wapi ? Na zulu keti na bantu ? Bau yuvulanaka nakati na bau, kutuba: Kana beto tuba: Na zulu, yandi tatuba kwa beto: Buna sambu na nki beno kwikilaka yandi ve ?
26Kansi, kana beto tuba: Na bantu, buna beto ikele kutita kibuka, kadi bau yonso tanga Yoane bonso mbikudi. Mat. 14:5; Mal. 6:20
27Bau vutulaka kwa Yesu, ye tubaka: Beto zaba ve. Yandi mpe tubaka kwa bau: Mono mpe tasonga beno ve, na ngolo nki mono sala mambu yai.
Kingana ya bana babakala zole
28Kansi beno banza nki ? Muntu vandaka na bana zole. Yandi kwizaka kwa ya ntete, ye tubaka: Mwana, kwenda bubu kusala mu dilanga ya vinia.
29Kansi yandi vutulaka, ye tubaka: Mono zola ve. Nanima yandi pindulaka ye kwendaka.
30Yandi kwizaka kwa ya zole, ye tubaka mambu mpilamosi. Yandi vutulaka, ye tubaka: E, tata, kansi yandi kwendaka ve.
31Na bau zole nani salaka luzolo ya tata ya yandi ? Bau tubaka: Ya ntete. Yesu tubaka kwa bau: Kieleka, mono tuba kwa beno: Bamfutisi ye bankwa bizumba takota mu kimfumu ya Nzambi nantwala na beno. Luk. 7:29
32Sambu na Yoane kwizaka kwa beno mu nzila ya lunungu ye beno kwikilaka yandi ve; kansi bamfutisi ye bankwa bizumba kwikilaka yandi. Bu beno monaka yo, beno pindulaka ntima ve, na beno lenda kukwikila yandi.
Kingana ya basadi ya mbi ya dilanga ya vinia
33Kuwa kingana yankaka: Muntu vandaka ya vandaka mfumu ya nzo, yandi kunaka dilanga ya vinia, ye tulaka yo lupangu, ye timaka kamunu ya vinia, ye tungaka nzo ya yongi, ye bikaka yo mu maboko ya basadi, ye kwendaka ku ntoto yankaka. Nk. 80:8; Nk. Solo. 8:11; Yes. 5:1; Yel. 2:21; Mal. 12:1; Luk. 20:9
34Bu nsungi ya mabundu kwizaka mfinama, yandi fidisaka bampika ya yandi kwa basadi kubaka mabundu ya yo.
35Basadi simbaka bampika ya yandi, ye bulaka mosi, ye kufwaka yankaka, ye kufwaka yankaka na matadi.
36Diaka yandi fidisaka bampika yankaka kuluta ya ntete mu ntalu, bau salaka kwa bau mutindu mosi.
37Nanima yandi fidisaka mwana ya yandi kwa bau, kutuba: Bau tazitisa mwana ya mono.
38Kansi bu basadi monaka mwana, bau tubanaka: Yai ikele mvingidi ya difwa, kwiza, beto kufwa yandi ye baka difwa ya yandi. Mat. 26:3; 27:1; Yoa. 11:53
39Bau bakaka yandi ye losaka yandi nanganda na dilanga ya vinia ye kufwaka yandi.
40Bu mfumu ya dilanga ya vinia takwiza, yandi tasala nki na basadi yina ?
41Bau tubaka kwa yandi: Yandi takufwa bantu ya mbi yina na lufwa ya mbi, ye tapesa dilanga ya vinia kwa basadi yankaka, ya tapesa yandi mabundu mu bansungi ya yau.
42Yesu tubaka kwa bau: Beno imene kutanga ve mu masonukwa: Ditadi ya batungi buyaka imene kusalwa ditadi ya ntu ya fuma. Mfumu salaka yai, ye yo ikele ya ngitukulu mu meso ya beto. Nk. 118:22; Yes. 8:14; 28:16; Bis. 4:11; Lom. 9:33; Ef. 2:20; 1 Pet. 2:7
43Sambu na yai mono tuba kwa beno: Kimfumu ya Nzambi takatulwa na beno ya peswa kwa kikanda ya bantu ya tasala mabundu na yo.
44Yandi ya kubwa va ditadi yai tapasuka na bitini, kansi bu yo kubwila yo tapasula yandi bonso mfumfuta.
45Bu bambuta banganga ye bafalisi kuwaka bingana ya yandi, bau zabaka na yandi tubaka sambu na bau.
46Bu bau sosaka kusimba yandi, bau titaka bibuka, kadi bau tangaka yandi bonso mbikudi.
Currently Selected:
Matai 21: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
