Yoane 1

Yesu Klisto ikele Nzambi kibeni

1Mu luyantiku Diambu vandaka, ye Diambu vandaka na Nzambi, ye Diambu vandaka Nzambi. Bing. 8:22; Yoa. 10:30; 1 Yoa. 1:1; 5:20; Nzai. 19:13; Lom. 9:5; Eb. 1:8

2Yo vandaka na Nzambi mu luyantiku.

3Bima yonso imene kusalwa na yandi, ye konda yandi, kima mosi salwaka ve, ya imene kusalwa. Kolo. 1:17; Eb. 1:2-3

4Mu yandi vandaka moyo, ye moyo yai vandaka mwini ya bantu. Yoa. 5:26; 1 Yoa. 5:11

5Mwini ikele kukienzula mu tombe ye tombe bakaka yo ve. Yoa. 3:19

Nsi baka mwini yai ve

6Vandaka muntu, ya fidiswa na Nzambi, nkumbu ya yandi Yoane. Mat. 3:1; 11:14; Mal. 1:4; Luk. 3:2

7Yandi imene kwiza sambu na kitemo, na yandi lenda kutuba kitemo ya mwini, na bau yonso lenda kukwikila mu yandi.

8Yandi vandaka mwini yai kibeni ve, kansi yandi kwizaka na yandi lenda kutuba kitemo ya mwini.

9Mwini yai vandaka mwini ya kieleka, yo kienzulaka bantu yonso ya kwiza mu nsi. Yoa. 3:19; 8:12; 9:5; 12:35, 46

10Yandi vandaka mu nsi ye nsi imene kusalwa na yandi, ye nsi zabaka yandi ve.

11Yandi kwizaka kwa ya yandi, kansi bau ya vandaka ya yandi bakaka yandi ye.

12Kansi yonso ya bakaka yandi, yandi pesaka bau ngolo kuvanda bana ya Nzambi, ikele bau ya kwikila mu nkumbu ya yandi. Ngal. 3:26; 1 Yoa. 3:1

13Ikele bau ya butuka mu menga ve, keti mu luzolo ya nsuni ve, keti mu luzolo ya muntu ve, kansi mu Nzambi. Yoa. 3:5; 1 Pet. 1:23; Yak. 1:18

14Diambu kitukaka nsuni, yo vandaka nakati ya beto, beto monaka nkembo ya yandi, bonso nkembo ya Mwana mosi kaka ya Tata, fuluka na nlemvo ye kieleka. Mat. 1:16, 18; Luk. 1:31; Mat. 17:2; Kolo. 1:19; 2:3, 9; Eb. 2:14

15Yoane tubaka kitemo sambu na yandi, yandi bokaka, kutuba: Yandi yai ya mono tubaka, yandi ya kwiza nanima na mono imene kutulwa nantwala na mono, kadi yandi vandaka nantwala na mono. Mat. 3:1; Mal. 1:7; Yoa. 1:30

16Kadi beto yonso bakaka mu kifulusilu ya yandi, ye nlemvo mu nlemvo.

17Kadi nsiku peswaka na Mose; nlemvo ye kieleka kwizaka mu Yesu Klisto. 2 Mose 20:11

18Muntu imene kumona Nzambi ve ta mbala mosi; Mwana mosi kaka ya vandaka na ntulu ya Tata, yandi imene kuzaisa yandi. Mat. 11:27; Luk. 10:22; Yoa. 6:46; 1 Tim. 6:16

Kitemo ya Yoane mbotika

19Kitemo ya Yoane ikele yai, bu baYuda fidisaka banganga ye baLevi ya katuka na Yelusalemi, kuyuvula yandi: Nge ikele nani ? Yoa. 5:33

20Buna yandi ndimaka, yandi buyaka ve, kansi ndimaka: Mono ikele Klisto ve. Yoa. 3:28; Bis. 13:25

21Ye bau yuvulaka yandi: Kansi nge ikele nani ? Nge ikele Elia ? Yandi tubaka: Mono ikele yandi ve. Nge ikele mbikudi yina ? Yandi vutulaka: Ve.

22Buna bau tubaka kwa yandi: Nge ikele nani ? Na beto lenda kuvutula mvutu kwa bau ya fidisaka beto. Nki nge tuba sambu na nge kibeni ?

23Yandi tubaka: Mono ikele ndinga ya muntu ya ikele, kuboka mu nsi ya mpamba: Beno sungika nzila ya Mfumu; bonso mbikudi Yesaya tubaka: Yes. 40:3; Mal. 1:3; Luk. 3:4

24Ye bau ya fidiswa vandaka ya bafalisi.

25Bau yuvulaka, kutuba kwa yandi: Sambu na nki nge ikele kubotika, kana nge ikele Klisto ve, keti Elia ve, keti mbikudi yina ve ?

26Yoane vutulaka kwa bau, kutuba: Mono ikele kubotika mu masa, nakati na beno ikele kutelema mosi ya beno konda kuzaba, Mat. 3:11; Mal. 1:7; Luk. 3:16; Bis. 13:25

27yandi ikele kwiza nanima na mono, mono lunga ve kukangula nsinga ya nsampatu ya yandi.

28Mambu yai salwaka mu Betania simu ya Yodani, sika Yoane botikaka.

29Kilumbu ya landa, Yoane monaka Yesu kwiza kwa yandi, yandi tubaka: Tala, Mwana Dimeme ya Nzambi ya ikele kukatula masumu ya nsi. 1 Pet. 1:19

30Yandi ikele yai ya mono tubaka, muntu ikele kwiza nanima na mono, yandi tulwaka nantwala na mono, kadi yandi vandaka nantwala na mono.

31Mono zabaka yandi ve: Kansi na yandi lenda kuzabisa kwa Isaeli, sambu na mambu yai mono kwizaka kubotika mu masa.

32Yoane tubaka kitemo kutuba: Mono monaka Mpeve kulumuka tuka zulu bonso yembe, yo vandaka va yandi. Mat. 3:16; Mal. 1:10; Luk. 3:22

33Mono zabaka yandi ve, kansi yandi ya fidisaka mono kubotikaka mu masa, yandi tubaka kwa mono: Va konsonani ya nge tamona, Mpeve kulumuka ye vanda va yandi, yandi yina ikele kubotika mu Mpeve Yanlongo.

34Mono imene kumona ye kutuba kitemo na yai ikele Mwana ya Nzambi.

Andele ye Petelo landa Yesu, bantu yankaka kwikila yandi

35Diaka kilumbu ya landa, Yoane vandaka kutelema ye banlonguki ya yandi zole;

36yandi talaka Yesu bu yandi tambulaka, yandi tubaka: Tala, Mwana Dimeme ya Nzambi.

37Banlonguki yina zole kuwaka, bu yandi tubaka, ye bau landaka Yesu.

38Buna Yesu pindukaka, yandi monaka bau kulanda yandi, yandi yuvulaka bau: Nki beno sosa ? Bau tubaka kwa yandi: Labi— tendula yai ikele Nlongi—, nge vanda wapi ?

39Yandi tubaka kwa bau: Kwiza ye beno tamona. Sambu na yai bau kwendaka, ye monaka sika yandi vanda, ye bau vandaka na yandi kilumbu yina, yo vandaka mpilamosi lokula iya.

40Mosi mu bau zole ya kuwaka ndinga ya Yoane ye landaka Yesu, yandi vandaka Andele, mpangi ya Simoni Petelo.

41Yandi sosaka ntete mpangi ya yandi, Simoni, yandi tubaka kwa yandi: Beto imene kumona Mesia, tendula yai ikele Klisto.

42Yandi twalaka yandi kwa Yesu. Yesu talaka yandi, ye tubaka: Nge ikele Simoni mwana ya Yona; nge tabingwa Kefa, tendula yai ikele ditadi. Mat. 16:17

Yesu binga Filipo

43Kilumbu ya landa, Yesu zolaka kwenda ku Ngalili, yandi monaka Filipo. Yesu tubaka kwa yandi: Landa mono.

44Filipo katukaka mu Betesaida, mbanza ya Andele, ye Petelo.

45Filipo monaka Natanaeli, yandi tubaka kwa yandi: Beto imene kumona yandi ya sonikaka Mose mu nsiku, ye bambikudi ya Nzambi, Yesu ya Nazaleti mwana ya Yosefi. 1 Mose 3:15; 22:18; 49:5; 5 Mose 18:18; Yes. 7:14; 9:6; 40:11; 53:1; Yel. 23:5; Yeh. 34:23

46Natanaeli tubaka kwa yandi: Kima ya mbote lenda kubasika mu Nazaleti ? Filipo tubaka kwa yandi: Kwiza, kutala.

47Yesu talaka Natanaeli ikele kwiza kwa yandi; ye tubaka sambu na yandi: Tala, muntu ya Isaeli kieleka, yandi ikele na luvunu ve. Nk. 32:2

48Natanaeli tubaka kwa yandi: Nge zabaka mono ndambu wapi ? Yesu vutulaka, ye tubaka kwa yandi: Ntete Filipo bingaka nge, bu nge vandaka nansi ya nti ya figi, mono monaka nge.

49Natanaeli vutulaka kwa yandi: Nlongi, nge ikele Mwana ya Nzambi, Nge ikele Ntinu ya Isaeli Yoa. 6:69; Mat. 14:35; 16:16; Mal. 8:29

50Yesu vutulaka ye tubaka kwa yandi: Sambu na mono tubaka kwa nge: Mono monaka nge nansi ya nti ya figi, nge ikele kukwikila ? Nge tamona ya luta yai nene.

51Yandi tubaka kwa yandi: Kieleka, kieleka, mono kutuba kwa beno: Beno tamona zulu kanguka ye banjo ya Nzambi tomboka ye kulumuka va Mwana ya muntu.

Currently Selected:

Yoane 1: NTK50

Highlight

Copy