Matayo 7
7
Bileho biYesu
1Yɛni bosambejani, bo otasambani no bɛnɛ. 2Mojɔ bo, ôsambani oko na esambi esambejaka no; badi bongɛ ai no oko na mwɛngi mongɛkɛ no bɛnɛ. 3Onjaka mobumbu mua modi a diso dimwangwao, pɛ ko bonɛ epaso yena edi a diso diwɛ mɛne mojɔ moye? 4Wɛ yona odi na epaso a diso diwɛ mɛnɛ, obwani bobala na mwangwao bo, Kina nahwɛ mobumbu a diso diwɛ? 5Wɛ mokosei, peta hwa epaso a diso diwɛ mɛnɛ; oko boa odi bonɛ bohu a bohwa mobumbu a diso dimwangwao.
6Yɛni bopa leka losɛnɔke ai mbwa. T’odumbeni oko leka lonu loyumu a boso bongulube, basaka lodɛhɛkɛkɛ na sɛkɛ jibu, na bâhekoa a bona na nu.
7Ingakani nongo osɛni. Dukani nongo obolojaeni. Bomani nongo modipe modipoame ai no. 8Mojɔ bo, yona ongaka asɔkɔ; yona odukaka abolojaka, na modipe môdipoama ai yona obomaka. 9Okina onu adi bopa mwana’nde litai akamo’nga molɛmbɛ? 10Na mwana’nde akamo’nga swi, adi bomopa njɔ? 11Oko boa, isa ino ojebakani bopa bana banu leka lopele, nongo adi no bato babe, esingaiti Sangwa’nu yona odi oho Diko! Iyo âpa leka lopele ai baya bamongaka. 12Kɔni ai bato batongo o apalaka no bo bato batongo bakɔe ai no. Cina esusu eMibeko na mikanda mibatɔndɔi edi oko bosi. 13Kweani a modipe mokototake; mojɔ bo njea yena edi na sasa esukeaka na bogwa; modipe momina modi monɛnɛ, na bato banɛnɛ bakweaka ena. 14Njea yena esukeaka na bomɔ edi ekototake; modipe momina modi mokɛkɛ, na baya bakweaka ena badi oko baleka pɛ.
15Toma nganjamani na batɔndoi babokosea, Badoaka ai no na elwaeli ebata, na badi soti oko swa babila. 16Odini bobambetea na mbuma jibu. Mojɔ bo, bato te batwake mbunga a bolongo, isa mamwe a likpanda. 17Oko boa, mole mopele mobotaka mbuma jipele, na mole mobe mobotaka oko mbuma jibe. 18Mole mopele te mobotake mbuma jibe, na mole mobe te mobotake mbuma jipele. 19Mole momiti bota mbuma jipele, môkwɛlɛmɛ na môtumbama. 20Oko boa ôbambeteani na mbuma jibu.
21Badi bokwea a Bokumu boDiko, te nongo baya babeaka mbi Kumu, Kumu, oko moto yona okɔkɔ bolulea boSangwa’mbi yona odi oho Diko. 22Bato banɛnɛ bâbala na mbi a busa bomina bo, Kumu, Kumu, iso boitɔndɔ mwako a kombe ewɛ? Boimeja miembo mibe a kombe ewɛ? Boikɔ mindumba minɛnɛ a kombe ewɛ? 23Mbi ko nâbatɔndɔ bo, Mbi nitajebaka no nongo mweka. Dongani ya ai mbi, ino bato babikɔmɛli bibe.
24Moto yona o’kaka bikenge bi bimbi, na asumaka bikenge bimina, adi o moto obowɛi yona oyoa ndako ende a diko dilitai. 25Mbua akwa, pela elaloa, mopomba modoa monɛnɛ, na moboma ndako emina, Eikwa ko, mojɔ bo eyoama a diko dilitai. 26Moto na moto ko yona o’kaka bikenge bi bimbi, na yo pɛ bosuma bikenge bimina, adi o egegele yona oyoa ndako ende a mopunji. 27Mbua akwa, pela elaloa, mopomba modoa monɛnɛ na moboma ndako emina. Ndako emina ekwa oko bokwa, na bokwa bomina bodaka mojɔ monɛnɛ.
28Asieja Yesu bikenge bimina bobala, bato baemumu bakamoa a mojɔ mobokoja bonde; 29cina bo abakojaka na kpaci, te na ekɔmɛli ebasɔni.
Currently Selected:
Matayo 7: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
