Matayo 26

Ndungu a Bowa Yesu

1Iyana asieja Yesu bikenge bi bisusu bobala, abala na bacingami bande bo, 2Ojebakani bo Kola eBonɔ edikai oko masu mabae pɛ, na badi bopea Mwana ’Moto bo bamowoe a mole-mobokea.

3Basuku banganga na basuku bangando batitana a ehole emina, a ndɔngɔ enganga monɛne, kombe ende Kayapa. 4Badumba ndungu a bopea Yesu na poloso bo bamowoe. 5Endele ko, babala bo, Te a ehole eKola bo bato basaka’ngɔ na dane.

Yesu a Ndako eSimona

6Yesu adaka a ndako eSimona, moto omaba, a ngando kombe Betania. 7Okina mwali adoa ai yo na molangi momalasi mabobuno bonɛnɛ mɛnɛ, na asopa malasi mamina a molo moYesu yana adaka yo a mesa. 8Bacingami bande, yana anɛ bo mojɔ momina, bakɛniɔ oko bokeniɔ. Babala bo, Eka emina enami boa mojɔ moye? 9Akɔki so ngɛlɛ malasi mamina, ka bosi likonia linɛnɛ a bokaba na bato babokwali. 10Yesu ko acingea mojɔ, na abala na bu bo, Opukejakani mwali yo mojɔ moye? Akɔi mojɔ mopele mɛnɛ ai mbi. 11Bato babokwali badi na nu na bosusu; mbi ko naditi na nu na bosusu. 12Asopi yo malasi mamina a mokuku mombi, akɔi boa a mojɔ mobopusea bombi. 13Mbi natɔndɔkɔ no na soti bo badi botundeja gala emwali yo a bisika bisusu bitɔndɔkɔ bo Mwako mu Mopele a ngondo esusu, cina emojɔ mokɔi yo.

Yuda Iskalio

14Okina obu Domi-na-babae, kombe ende Yuda Iskalio, akɛ ai basuku banganga. 15Abala na bu bo, Nakamokaba ai no, êpa no mbi nde? Bamopa pata domi-isato. 16Oko boa yo abanga boduka njea a ehole emina bo akabe Yesu.

Yesu na Bacingami a Kola

17Bacingami badoa ai Yesu a busa boboso boMolɛmbɛ mua mopeliti lipetu. Bamohɔjɔ bo, Opalaka bo bosɛlingoe jɔ a boyaka Kola-eBonɔ? 18Iyo abasɔmbeja bo, Kɛni boso Songolo oho a ngando. Mojebejani boMokoja abali bo, Ehole embi edikai oko mweka pɛ. Napalaka nayake Kole-eBonɔ a ndako ewɛ, oko mbi menɛ na bacingami bambi. 19Bacingami bakɔ o ama bala Yesu, na basɛlingoa Kola-eBonɔ.

20Yesu adaka na bacingami bande domi-na-babae a mesa a ehole emɔkɔmɔkɔ. 21Yana ayakaka bo, Yesu abala bo, Mbi natɔndɔkɔ no na soti bo okina onu adi bokaba mbi. 22Ibo badaka na mobimba mɛnɛ a mojɔ momina, na babanga bomohɔjɔ moto na moto bo, Kumu, moto nda? Isa mbi? 23Iyo abasɔmbeja bo, Okina yona oyaki na mbi a saani emɔci adi bokaba mbi, 24Mwana’Moto bodonga ya soti a njea ejebejaka Misɔnɔ a mojɔ monde. Monɔngɔ ko ai yona odi bokaba Mwana ’Moto! Moto omina, akɔki ya da pɛ bobotama nongo, ka enɔi na bopele a mojɔ monde, 25Yuda, mokabi onde, abala bo, Labi, moto nda? Isa mbi? Yesu abala na nde bo, O abali wɛ.

26Adaka bo bakayake, Yesu atomba molɛmbɛ. Ajongoa na abuka molɛmbɛ momina; amopa ai bacingami, na abala bo, Asɔni, yakani; imu modi mokuku mombi. 27Atomba koko kɔpɔ; ajongoa na abapa. Abala bo, Mwakani no basusu. 28Mojɔ bo kɔpɔ ye edi makia mambi maMokongo, maya masopei a mojɔ mobato banɛnɛ, a bobacingoa a jibe. 29Mbi natɔndɔkɔ no bo nitamwaka koko muswa mu mombuma jivine, oko a busa bomwakabi mbi koko na nu a Bokumu boSangwa’mbi. 30Aseja bo yembo bo’mba, bakɛ a Mono moOlive.

Gɛtɛsemane

31Yesu abala koko na bu bo, Ôsakani libaku ino basusu na bulu bu a mojɔ mombi. Cina bo, mosɔnɔmɔ bo,

Nâboma mobanei, na bwela bobata bônangana.

32Mbi ko nadi bongɔ a bogwa, na nâkɛ boso bonu a Galile. 33Pɛtɛlo ko amosɔmbeja na abala bo, Nongo ibo basusu bakasaka libaku a mojɔ mowɛ, mbi nitasaka nongo libaku. 34Yesu abala na nde bo, Mbi natɔndɔkɔ wɛ na soti bo odi bongana mbi ngana jisato na bulu bubu, oko kɔkɔ abelekoakini. 35Pɛtɛlo amosɔmbeja bo, Nongo nakagwa na wɛ, nitangana wɛ! Bacingami basusu bajima koko boa.

36Yesu amea na bu a ekina esika yena edi na kombe Gɛtɛsemane. Abala na bacingaimi bo, Ino dikani yaya; mbi nakɛkɛ bobo a mojɔ mobo’nga. 37Abea oko Pɛtɛlo na babami babae baSebede bo bamopakae, na abanga boda na wa na molɔbɔ. 38Abala na bu bo, Molema mombi modi na wa te’pele, oko yogo mɛne. Ambani ya a bokɛngɛlɛ na mbi. 39Akɛ koko boso mweka, asadumba nase, boso bonde oko a kpɔtɔ, na angɔɔnɔ bo, Sesa, kina kɔpɔ ye enɔe mbi isa njea edi. Endele ko, te mojɔ mopalaka mbi, oko mojɔ mopalaka wɛ. 40Ahula ai bacingami na abatana bahwɛli. Abala na Pɛtɛlo bo, Boni! Ino otahɔnɔkɔni boda misu na mbi nongo heure emɔci? 41Kɛngɛlɛni; ingakani bo otakweani a bomeka. Mwembo modi na mokano soti, mokuku ko modi na bwɛmbu. 42Asɔmbɔ koko na angɔɔnɔ bo, Sesa, isa njea editi bo kɔpɔ ye enɔe mbi, oko adi mbi pe bopeta mwaka, yɛ modae o apalaka wɛ. 43Ahula koko ai bacingami na abatana bahwɛli, mojɔ bo bangbɔngɔkɔ na hiɔ. 44Oko boa abakina, asɔmbɔ koko na angɔɔnɔ ngɔɔnɔ ejisato, o ama yo ngɔɔnɔ boso. 45Ahula koko ai bacingami, na abala na bu bo, Ino ohwɛkɛni oko hiɔ? Ohemakani? Hokeani; edikai mweka pɛ, na Mwana’Moto âkabama a mɔmɔ mabato babe. 46Angɔni so bokɛe! Anjani, mokabi ombi akɛkɛ adoe.

47Iyana abalaka Yesu boa, Yuda, okina obu Domi-na-babae, adoa na lindundu libato baya bapeaka babɛnɛ na pɛngu. Basuku banganga na basuku bangando babaloma. 48Mokabi onde ama pa bato bamina ekina embete. Abajebeja bo, Mbi nakahia okina obu, mopeani; edi oko yo. 49Iyo adoa ai Yesu bokpa na amobɛjɛ bo, Labi, mbalea! Na amohia. 50Yesu abala na nde bo, Moninga, odoi mojɔ? Kɔ mojɔ momina. Bato badoa a ehole emina na bapea Yesu oko bopea. 51Okina obu baya badaka bacingi na Yesu ahwa abɛnɛ onde, akwɛle mobuli onganga monɛnɛ pola, na amolena litoi. 52Yesu ko abala na nde bo, Sɔmbeja abɛnɛ owɛ ta ligbogbo; cina bo bato basusu baya batombaka abɛnɛ, yogo ebu oko abɛnɛ. 53Otajebaka bo mbi nakabea mbuni ai Sangwa’mbi, abwani bolomeani babwɛnji-baDiko, mandundu domi-na-mabae? 54Mbi ko nakakɔ boa, Misɔnɔ midi bongama na ye, mia mitɔndɔkɔ bo mojɔ mumu modi boda boa? 55Yesu abala na lindundu libato a ehole emina bo, Odoini na babɛnɛ na pɛngu a bopea mbi; adi mbi mobengo? Mbi nadaka na mobondo a bokoja a tei etempelo busa na busa, na oipeani mbi. 56Mojɔ mu mosusu ko modi boa a bongameja misɔnɔ mibatɔndɔi. Bacingami basusu bamokina a ehole emina, na bacia oko bocia.

Yesu a Esambi eKayapa

57Yana apea bo Yesu, bakɛ na nde a ndako eKayapa yona odaka nganga monɛnɛ. Basɔni na basuku bangando bama titana oko ena. 58Pɛtɛlo asusa Yesu bohali mweka, oko a lopango longanga monɛnɛ. Akwea a tei elopango, na ada na mobondo a esika edaka bapolisi, bo anɛe suka emojɔ. 59Basuku banganga, na likita lisusu libajuji, baduka mokina mojɔ mobokosea a bodumba Yesu, bo bamowoe. 60Bakina bato badoa a botata, pɛ ko mojɔ boboloa. 61Bakina babae ko badoa ngɔngɔ na babala bo, Moto yoyo abali bo, Mbi nabwani bobuka tempelo eNjambe na boeyoa koko na masu masato. 62Nganga monɛnɛ angɔ na abala bo, Otasɔmbejaka nongo ekenge? Cina etati ebato bamina a mojɔ mowɛ edi bo? 63Yesu ko ahogoga oko bogo, Oko boa nganga monɛnɛ abala na nde koko bo, Mbi nabekeaka wɛ a kombe eNjambe obomɔ; tɔndɔ so isa we odi Masiya, Mwana oNjambe. 64Yesu amosɔmbeja bo, O abali wɛ. Mbi ko natɔndɔkɔ no bo odini bonɛ Mwana ’Moto na mobondo a dɔngɔ diebɔ ebami eNdangasa, na akadoe a diko dibiyembi biDiko. 65Nganga monɛnɛ ala bisenja binde oko bo’la, na abala bo, Iyo atangolaka Njambe, Bodi boduka banjɛnɛki batongo mojɔ moye? O’kini no bɛnɛ bo atangoli Njambe. 66Ino olɛkɛni bo? Bamosɔmbeja bo, Mokindo monde oko bogwa! 67Bamotwea masɔi a boso bonde; bamonda bibɔtu, bamola bipapata, 68na babala bo, We, Masiya! Tɔndɔ so; obomi wɛ nda?

Pɛtɛlo Angana Yesu

69Pɛtɛlo adaka na mobondo a sokolu, oko a lopango. Okina moseka adoa ai yo na abala na nde bo, Wɛ odaki koko na Yesu oGalile. 70Iyo angana a boso bobu basusu; abala bo, Nitacingeaka mojɔ mobalaka wɛ. 71Akɛkɛ yo amane a dɔngɔ dimonɔkɔ molopango, moseka otongo amonɛ, na yo abala na bato baya badaka baboli ena bo, Moto yoyo adaki na Yesu oNasaleta. 72Pɛtɛlo angana koko na abɛlɛ bɛli bo, Nitajebaka moto omina. 73Ngɔngɔ mweka, bakina baya badaka hulelu badoa ai Pɛtɛlo na babala na nde bo, Wɛ odi okina obu soti. Bombeteaka we na likɛkɔ liwɛ likɔpi. 74Iyo ko abanga bosinga, na abɛlɛ bɛli bo, Nitajebaka moto omina. Oko aehole emina, kɔkɔ abelekoa oko bobelekoa. 75Pɛtɛlo asi ko alɛi ekenge ema bala Yesu bo, Wɛ ôngana mbi ngana jisato oko kɔkɔ abelekoakini. Na amana sokolu na ayea bio na molɔbɔ mɛnɛ.

Currently Selected:

Matayo 26: NTNG61

Highlight

Copy