Matayo 24

Minɔngɔ Misuka

1Yesu amana a tempelo, na yana adaka yo a njea eboyana, bacingami bande badoa bo bamonejae eyoeli etempelo. 2Iyo ko abasɔmbeja bo, Onɛkɛni leka lu losusu? Mbi natɔndɔkɔ no na soti bo pepe nongo litai limɔci lidi bodika diko dilitai litongo a esika ye; mâdumbama masusu.

3Yana adaka Yesu yo buki a Mono moOlive, bacingami badoa ai yo, na babala na nde bo, Mojɔ momina môda a ehole eni? Embete ebodoa bowɛ na esuka engondo edi boda bo? 4Yesu abasɔmbeja bo, Anganjamani na bato, bo basaka laboja no. 5Mojɔ bo bato badi bodoa banɛnɛ a bobala bo, Mbi nadi Masiya; na badi bolaboja bato bou mɛnɛ. 6Ô’kani koko mojɔ mobila na bijoki bibila; pɛ ko bodani na mokakwano, mojɔ bo ngando ji jibwani bodoa. Suka engondo ko êda oko ngɔngɔ, te a ehole emina. 7Mojɔ bo likota lidi bona na likota; bokumu bodi bona na bokumu; manjale na majonga mangondo mâda a bikina bisika. 8Ngando jimina ko jîda oko bobanga bomonɔngɔ. 9A ehole emina, bâsɛnjoja no bo badingojae no, bâweja no, na bato bamakota masusu bâlona no a mojɔ mokombe embi. 10Bato banɛnɛ bâsaka libaku a ehole emina, bâkambana na bâlonana. 11Batɔndɔi babokosea bâdoa na bâlaboja bato banɛnɛ. 12Epaeli ebato banɛnɛ êda etitamake, mojɔ bo bobe bodi bogbasoa. 13Moto ko akada na lingbangba oko a suka, moto omina âhela. 14Mwako mu moBokumu môpeta tɔndɔmɔ a ngondo esusu, bo makota masusu majebe; suka esa ko edoe.

15Oko boa, yana ânɛ no eka yena emaneene a esika yena ehɛngɛmɛ ai Njambe, o abala motɔndɔi Daniele, (yona olangaka, ye acingee) 16baya badi a Yuda ehole emina badi bocia a meno, 17Moto yona odi a diko dietondo abwaniti botita a botomba leka londe a ndako tei. 18Moto yona odi a gbie abwaniti bosɔmbɔ a botomba kasaka ende. 19Bali baya badi na memi, na baya banungejaka bana, bâda na monɔngɔ a masu mamina. 20Ingakani Njambe bo ehole enu ebocia etada a edidi epio, isa a busa boSabata. 21Mojɔ bo bodingoa bodi bogbasoa a ehole emina; tungu emina eipaka da, nongo a bobanga bongondo, suka oko busa bu, na botaya da boa. 22Masu mamina makayeyoa, pɛpɛ nongo moto omɔci odi bohela; matada ko manɛnɛ, a mojɔ mobato bahɔ Njambe. 23Moto akabala na nu a ehole emina bo, Anjani, Masiya adi yaya! isa, Adi bobo! t’ojimeni oko. 24Mojɔ bo BaMasiya babokosea bâdoa banɛnɛ a masu mamina. Bâneja bimbete na mindumba mibokamoa, na êdika mweka pɛ bo balabojae bahɔmɔke baNjambe. 25Hokeani bopele. Mbi najebejaka no yana adi mijɔ mimina pɛ bopeta doa. 26Bakabala na nu bo, Anjani, adi oho ta esika! t’okɛeni oko oho. Na bakabala bo, Anjani, adi a ndako tei! t’ojimeni oko. 27Mojɔ bo bodoa boMwana ’Moto bôda o mokalimo. Mohulaka a dɔngɔ diɛsɛta, na mokɔkɔ njɛɛ oko a wɛsɛta. 28Miambenga badi botitana oko a esika edi ekuulu.

29Minɔngɔ mimasu mamina mikasia, modika-busa môhinda bokpa, na songe atada na monjolo. Njɔtɔ badiko bâkwa nase, na ngulu jibusa jidi bombɛ. 30Embete eMwana ’Moto êmana oho Diko a ehole emina. Makota masusu mangondo mâyea bio, na bânɛ Mwana ’Moto akadoe a biyembi bidiko na kpaci na ekumu enɛnɛ. 31Iyo aloma babwɛnji bande a bohuea mondule na doi linɛnɛ, na bâbolea bahɔmɔke bande a pamba jisusu jinɛi, a suka ebusa emɔci, oko a suka etongo.

32Ikoani na mondɛ momole mofiguier. Bitape bika’mbɛ, na bisanga biyene bikatɔ, ojebakani bo yanga esii. 33Oko boa pongono, okanɛni ngando ji jisusu, ôjebani bo yo adi hulelu, adi oko a modipe mɛnɛ. 34Mbi natɔndɔkɔ no bo ngando ji jisusu jidi bodoa oko elulu ye esiakini. 35Busa bodi bogwa, na ngondo edi bodimoa, bikenge bimbi ko bitakputoa. 36Pɛpɛ nongo moto omɔci ko ojebaka busa bomina na ehole emina, nongo babwɛnji baDiko isa Mwana; ojebaka oko Sango pɛ. 37Bodoa boMwana ’Moto bodi boda o adaka masu maNoa. 38A masu mamina, adaka pela eelalo pɛ bopeta doa, bayakaka na bamwakaka, basɔkɔ bali na bahangaka bali ta meki, oko a busa botamba Noa a masua. 39Baijeba nongo, oko a ehole edoa pela eelalo na ebadongeja basusu. Bodoa boMwana ’Moto bôda koko boa. 40Bami babae badi boda a gbie a ehole emina; okina obu âtombama, na otongo âdika. 41Bali babae bâda a elomu endongo bonda; okina obu âtombama, na otongo âdika. 42A mojɔ momina, toma kɛngɛlɛni, mojɔ bo otajebakani busa bohulaka Kumu onu. 43Pɛ ko bobosani mojɔ mumu; akɔki yo jeba ehole edoaki mobi na bulu, ka moswa ’ndako amosei, na ajimiti bo aluse ndako ende. 44Ino pongono, toma dani na mosɛlingo boa, cina bo Mwana ’Moto âdoa a ehole edi no pɛ bolɛ.

45Mokɔmɛli olisuma na bopasa adi jɔ, yona obwani bosɔ kpaci ai moswa’nde a bobanea ndako ende, na a bopa bato mia a ehole eboyaka? 46Moswa’nde akahula, na akamotana a elomu, adi bosepa na mokɔmɛli omina. 47Mbi natɔndɔkɔ no na soti bo adi bokina leka londe losusu a mɔmɔ mande. 48Mokɔmɛli omina ko akada mobe, na akalɛ a molema monde bo, Kumu ombi atahula bwango; 49na akabanga botua bina’nde, na akayaka na akalangoa na balangoi, 50moswa omokɔmɛli omina adi bohula bokina busa yana adi yo pɛ bolɛ, na a ehole edi yo pɛ bojeba. 51Âmodingoja, na âmo’sa ta libondo libakosei, a esika ebio na bokpɛkpɛnɛ bomino.

Currently Selected:

Matayo 24: NTNG61

Highlight

Copy