Matayo 20

Monde moBasali

1Mojɔ bo Bokumu boDiko bodi o moswa’ elomu yona omana ehuma a boduka basali a mojɔ moelomu egbie ende. 2Ajima na bu bo abapɛ tu busa pata emɔci-emɔci, na abaloma a gbie ende. 3Amana koko a ngonga eneuf heures, na atana bakina batongo baya badaka ba’mi oko ema’ma a jando. 4Ajɔ na bu bo, Ino pongono, kɛni a gbie embi, na nâpa no likonia lia libwani. Oko boa bakɛ. 5Amana koko a midi na trois heures, na akɔ koko boa. 6Amana yo a cinq heures, atana bakina batongo baya badaka oko ba’mi ema’ma; abala na bu bo, Ino odini ya busa bosusu edada mojɔ moye? 7Ibo bamosɔmbeja bo, Mojɔ bo moto abeiti so a elomu. Iyo abala na bu bo, Ino pongono, kɛni a gbie embi. 8Yana adipa busa, moswa ’gbie abala na kapita onde bo, Bea basali na bapa likonja libu. Banga na yona osuka, na sukeja na yona oboso. 9Adoa basali baya bakwea a elomu a cinq heures, basɔ tu moto pata-pata. 10Adoa ko basali baboso, ibo badaka na njingo bo likonja libu lidi bohɛ. Ibo ko basɔ koko pata-pata. 11Asɔ bo likonja limina, bahima moswa ogbie 12na babala bo, Iso bokɔi elomu busa bosusu na moi mopipo; ibo ko bangɔngɔ bakɔi elomu oko heure emɔci pɛ, na obabwanejai na su amɛci. 13Iyo asɔmbeja okina obu bo, Moninga, mbi nitakɔkɔ wɛ bobe. Iso na wɛ bojimiti bo napɛ we pata emɔci? 14Tomba libondo liwɛ na yana. Mbi najimaka bo napɛ moto osuka oko na mwɛngi mowɛ. 15Nakapala bokɔ na likonja limbi boa, modi mojɔ mombi mɛnɛ. Odi na mbi lipɔle mojɔ bo nadi na likabo? 16Oko boa baya basuka badi boda boso, na baya baboso badi boda oko a suka.

Yesu Abala a Mojɔ moBogwa Bonde

17Iyana adaka Yesu a njea bo akɛe a Yelusalema, abea bacingami domi-na-babae a dɔngɔ dimɔci, na abala na bu a njea bo, 18Hokeani; iso bokɛkɛ a Yelusalema, na Mwana ’Moto âkabama ai basuku banganga na basɔni, baya bâjima bo agwɛ. 19Ibo bâmopa a mɔmɔ mabapakano bo bamopɔmbejae, bo bamotue na bamowoe a molemobokea; iyo ko ângɔ koko a busa bomasato.

Bana baSebede

20Nange ebana-bami baSebede adoa na bana bande ai Yesu, atita na magbunda a boso bonde a bomo’nga mokina mojɔ. 21Yesu abala na nde bo, Epalaka wɛ ndeni? Asɔmbeja Yesu bo, Jima bo bana-bami ba bambi babae badae a bidie a Bokumu bowɛ, okina a ebɔ ewɛ ebami, na otongo a ebɔ ewɛ ebali. 22Yesu asɔmbeja bo, Otacingakani mua mongaka no. Ino obwanini bomwa kɔpɔ ekɛkɛ mbi bomwa? Bamosɔmbeja bo, Bobwani. 23Yesu abala na bu bo, Odini bomwa kɔpɔ embi soti; mojɔ moboda ko a bidie a ebɔ embi ebami, na a ebɔ embi ebali, mocingiti na mbi. Modi mojɔ moSangwa’mbi yona obihɛngɛ ai bato bahɔ yo. 24Bacingami batongo domi, yana aka bo mojɔ momina, bakɛnjɔ na bananango babae. 25Yesu ko ababea ai yo na abala na bu bo, Ino ojebakani bo bakumu bamakota basakumejaka a boso bobato babu, na basuku babu badi na kpaci ai bo. 26Motada nongo boa a tei enu. Isa okina apalaka bo adae moto monɛnɛ a tei enu, yɛ adae mokɔmɛli onu. 27Isa okina apalaka bo adae kumu onu, yɛ adae oko mobuli onu, 28o adi Mwana ’Moto yona odoa bo apɛ mohelo monde o lisiko libato banɛnɛ, te bo bato badi bomokɔmɛ.

Bami Babae Basɔ Njɛnɛ

29Adongaka bo a Yeliko, bato badaka bacingi ngɔngɔ jinde banɛnɛ mɛnɛ. 30Bakina bami babae baya bagwa miso badaka na mbondo a dɔngɔ dinjea. Yana aka ’bo bo Yesu akanɔe, babekoa bo, Kumu, Mwana ’Dawidi, ikea so wa! 31Bato ko balemoa na bu, na babatɔndɔ bo badae bogo. Ibo ko bahɛjɛ bingi, na babekoa na bopipo mɛnɛ bo, Kumu, Mwana ’Dawidi, ikea so wa! 32Yesu ama, ababea na abala bo, Epalaka no bo nakɔe ai no ndeni? 33Bamosɔmbeja bo, Kumu, yɛ bosɛ njɛnɛ esu. 34Yesu aba’kea wa, abɛnjɛ miso mabu, na basɔ njɛnɛ ebu bokpa, na bacingama na nde.

Currently Selected:

Matayo 20: NTNG61

Highlight

Copy