Matayo 16

BaPalusi Baduka Embete

1BaPalusi na BaSadoki badoa ai Yesu bo bamodingee, Bamo’nga bo abanejae ekina embete eDiko. 2Yesu abasɔmbeja bo, Isa biyembi bidi bikpetu a ehole edipaka busa, obalakani bo, Busa bôbɔngɔ puma. 3Ehumahuma ko, isa biyembi bidi bikpetu, na isa busa bohindi, obalakani bo, Mbua âkwa busa bu. Ojebakani bocingea bimbete bibusa, pɛ ko bombetea embete eehole yena ebwani. 4Bato baelulu ebe na elulu ebɔɔli bapalaka bonɛ eikina embete; batanɛ nongo embete, oko embete eJona pɛ. Yesu abakina boa, na adonga a esika emina.

5Yana alekela bacingami a dɔngɔ ditongo, babosa milɛmbɛ botomba. 6Yesu abala na bu bo, Nganjamani bopele a mojɔ molipetu liBaPalusi na BaSadoki. 7Bacingami babomana kitɛ a mojɔ momina, na bajɔ bo, Edi mojɔ bo botombiti milɛmbɛ. 8Yesu, yana anɛ yo mojɔ momina, abala na bu bo, Obomakani kitɛ mojɔ bo opelitini molɛmbɛ cina eye? Ejimeli enu edoni? 9Ocingeakinini mojɔ? Obosaini mojɔ momilɛmbɛ mitano na bato koto jitano, na etango esanga jilumejai no? 10na mojɔ momilɛmbɛ sambo na bato koto jinɛi, na etango esanga jilumejai no? 11Otacingeakani mojɔ? Abali mbi na nu bo onganjameni a mojɔ molipetu liBaPalusi na BaSadoki, nabaliti a mojɔ momolɛmbɛ. 12Oko boa bacingea bo abalɛjɛkɛ a mojɔ mobokoja boBaPalusi na BaSadoki, te nongo a mojɔ molipetu limolɛmbɛ.

Ejimeli ePɛtɛlo

13Iyana amea Yesu a likota liKaisalia-Pilipo, ahɔjɔ bacingami bande bo, Bato babalaka bo Mwana ’Moto adi nda? 14Ibo bɛ bo, Bakina babalaka bo odi Yoane Mobatisi. Batongo babalaka bo odi Elia; na batongo koko babalaka bo odi Yelemaya, isa okina motɔndɔi otongo. 15Yesu abahɔjɔ bo, Ino bɛnɛ ko obalakani bo? Nadi nda? 16Simona Pɛtɛlo amosɔmbeja bo, Wɛ odi Masiya, Mwana ’Njambe obomɔ. 17Yesu amosɔmbeja bo, Odi na bojongoa, wɛ Simona mwana ’Yona. Cina bo obolojaiti nongo mojɔ momina na bowɛi bomoto. Sangwa’mbi ko yona odi oho Diko amobolojai ai wɛ. 18Mbi natɔndɔkɔ wɛ bo, Wɛ odi Pɛtɛlo, na mbi nâyoa Denga dimbi a diko dilitai di; na ngulu eGehena etabwana boedumba. 19Mbi nadi bopa wɛ sabe jiBokumu boDiko. Okakanda ekina eka ya nase, êda ekandamake oho Diko. Na okacingoa ekina eka ya nase, êda ecingoamake oho Diko. 20Yesu asi ko alehi bacingami bande bo batatɔndɔ nongo moto bo yo adi Masiya.

21Yesu abanga bojebeja bacingami bande a ehole emina bo adi bokɛ a Yelusalema, bo basuku bangando, na nganga, na basɔni, badi bomodingoja bou mɛnɛ, bo badi bomowa, na bo adi bongɔ koko a busa bomasato, 22Pɛtɛlo amohɛngɛ a dɔngɔ dimɔci, na abanga bolemoa na nde. Abala bo, Kumu, yɛ bobala boa! Mojɔ momina motakwa nongo na wɛ. 23Yesu ahekoa, abala na Pɛtɛlo bo, Donga ya Satana; ngɔngɔ jimbi! Odi oko libaku a njea embi. Mijɔ milɛkɛ wɛ midi oko mibato pɛ, te nongo miNjambe.

Bocingama Na Yesu

24Yesu abala na bacingami bande bo, Isa moto apalaka bocingaraa na mbi, adi bosalona yo mɛnɛ, adi botomba mole-mobokea monde bo asuse mbi. 25Mojɔ bo, yona opalaka bobanea mohelo monde âmobungeja, na yona obungejaka mohelo monde a mojɔ mombi, âmoboloja. 26Nongo moto akakonja ngondo esusu mɛne, na akabungeja mohelo monde, adi bobɔngɔ na ye? Moto adi bosikoa mohelo monde na ye? 27Mojɔ bo, Mwana ’Moto adi bodoa na babwɛnji bande a ekumu eSangwa’nde, na adi bokaba ai moto na moto libondo lia libwani na bikɔmɛli binde a ehole emina. 28Mbi natɔndɔkɔ no na soti bo bakina ba’mi yaya baya batagwa oko banɛkini Mwana ’Moto akadoe a Bokumu bonde.

Currently Selected:

Matayo 16: NTNG61

Highlight

Copy