Yoane 5

Yesu Aheleja Moto Mondɔke

1Ngɔngɔ jimina, Yesu akɛ a Yelusalema, mojɔ bo ekina Kola eBaYuda edaka oho. 2Likina lilebo lidi a Yelusalema, libati na njea ebata. Lidi na biseba bitano, na kombe emina edi Beteseda a LiEbele. 3Bato babego banɛnɛ mɛnɛ badaka basambi a biseba bimina, bagwa-miso, bamitɛngu, na bandɔke. (Bambaka bohua bomadiba 4mojɔ bo obwɛnji oDiko atita oko a lilebo bikina bihole, na madiba matɔkɔ. Na moto yona otitea a madiba boso yana atɔkɔ madiba, ahela a yogo ende.) 5Momi omɔci adaka ena yona oma sama na ekina yogo bianga domi-isato na bianga bomwambe. 6Yesu amonɛ asambi, na ajeba bo ama yeyoa ekoka boa. Abala na nde bo, Opalaka ohele? 7Moto yona odaka na yogo amosɔmbeja bo, Kumu, mbi napeliti moto a botiteja mbi ta madiba a ehole etɔkɔkɔ madiba. Yana atitaka mbi, okina otongo atitaka a boso bombi. 8Yesu abala na nde bo, Angɔ! Tomba litɔkɔ liwɛ! Dala! 9Moto omina ahela a yogo ende bokpa mɛnɛ, atomba litɔkɔ linde na adala.

Busa bomina bodaka busa boSabata. 10A mojɔ momina, BaYuda babala na moto yona ohela a yogo ende bo, Busa bu bodi Sabata; ebɔngiti bo otombe litɔkɔ liwɛ. 11Iyo ko abasɔmbeja bo, Moto yona ohelejaini abali na mbi bo, Tomba litɔkɔ liwɛ na dala. 12Bamohɔjɔ bo, Moto omina nda, yona otɔndɔi wɛ bo otombe litɔkɔ liwɛ bo odale? 13Moto ko yona ohela a yogo aijeba moto omina, na Yesu yo mɛnɛ ama donga, mojɔ bo bato badaka banɛnɛ a esika emina. 14Yesu amotana ngɔngɔ a tempelo, na abala na nde bo, Ika! wɛ oheli a yogo ewɛ. Yɛ bokɔ koko bobe, bo osaka nɛ mokina monɔngɔ mua monɔi na bobe. 15Moto omina akɛ ajebejae BaYuda bo yona omoheleja adi oko Yesu. 16A mojɔ momina, BaYuda babanga bonɔngeja Yesu, ema bo akɔkɔ ngando jimina a busa boSabata. 17Yesu ko abasɔmbeja bo, Sangwa’mbi adi oko a elomu, na mbi koko nakɔkɔ elomu. 18Oko boa, BaYuda bahɛjɛ bingi bo bamowoe, mojɔ bo aisopa mobeko moSabata pɛ; abea koko Njambe Sangwa’nde, na asabwaneja na nde amɛci.

Mojɔ Mobomɔ

19Yesu abasɔmbeja bo, Mbi natɔndɔkɔ no na soti bo, Mwana t’ahɔnɔke bokɔ mokina mojɔ yo mɛnɛ; akɔkɔ oko mua monɛkɛ yo bo Sango akɔkɔ. Ngando jisusu jikɔkɔ Sango,—Mwana akɔkɔ boa pongono. 20Mojɔ bo Sango adi na Mwana ngɛnjɔ, na amonejaka ngando jisusu jikɔkɔ yo. Adi bomoneja koko ngando jitongo jia jinɔi jiji a bokamoja no. 21Sango angɔjɔkɔ bagwake, na abapaka bomɔ. Oko boa koko, Mwana apaka bomɔ ai baya bapalaka yo. 22Sango t’asambejake nongo moto. Akina elomu esusu ebosambeja a mɔmɔ maMwana, 23bo bato basusu badae na lisuma ai Mwana, o asumaka bo Sango. Yona odi pɛ bosuma Mwana, aditi na lisuma ai Sango yona omoloma. 24Mbi natɔndɔkɔ no na soti bo, Yona ohokeaka ebaeli embi, na ojimaka yona olomani, adi na bomɔ bua bodi na bosusu. Iyo atada nongo na esambi, mojɔ bo aheli a hogwa, na akwei a bomɔ. 25Mbi natɔndɔkɔ no na soti bo bagwake mɛnɛ badi boka kɔpi eMwana ’Njambe a ehole yena ekɛkɛ adoe. Ee, ehole emina emei edɛye, na baya bahokeaka bâhela. 26Sango adi na bomɔ a tei ende mɛnɛ. Oko boa Mwana asɔ epeeli ebomɔ ai yo bo adae na bomɔ a tei ende mɛnɛ pongono. 27Amopa koko kpaci a bosambeja, cina bo adi Mwana ’Moto. 28Yɛ bokamoani a mojɔ momina. Bokina busa, bato basusu baya badi a bisɛmɔ bakabi kɔpi ende na bamanabi. 29Baya bakɔ bopele bangɔbí a bomɔ; baya bakɔ ko bobe bangɔbí a mojɔ mobosamba.

30Mbi naditi na kpaci a bokɔ mokina mojɔ mbi mɛnɛ. Nasambejaka o akaka mbi. Esambi embi edi bojo, mojɔ bo mbi napalaka oko bolulea boSango yona olomani, te nongo bolulea bombi mɛnɛ. 31Nakatata tati ai mbi mɛnɛ, tati embi embi etada tati esoti 32Okina otongo ko atataka tati ai mbi, na mbi najebaka bo tati etataka yo ai mbi edi tati esoti. 33Ino olomani ai Yoane, na yo atata tati esoti. 34Tati ko esɔkɔ mbi, editi tati emoto. Mbi ko nabali ngando ji bo oheleni. 35Yoane adaka paka yena eyoaka, na epaka bohu; na odakani na posaa bosepa a mojɔ mobohu bonde ekina ehole.

36Na tati embi ko, na tati eYoane, tati embi enɔi. Mojɔ bo Sango apani bilomu bo nabisiejae. Bilomu bimina, oko bilomu bikɔkɔ mbi, binejaka bo Sango alomani. 37Sango yo mɛnɛ yona olomani, atata tati ai mbi. Ino ko oikani nongo kɔpi ende; omɛni nongo elimo ende. 38Ebaeli ende editi atei enu, mojɔ bo otajimakani yona oloma yo. 39Odukakani a Misɔnɔ mojɔ bo olɛkɛni bo obolojaeni bomɔ bua bodi na bosusu a tei eMisɔnɔ. Misɔnɔ ko mibalaka a mojɔ mombi a bohu. 40Ino ko otapalakani bodoa ai mbi bo osɛni bomɔ. 41Mbi te nasɔke ekumu ai bato. 42Najebaka bo ino opelitini ngɛnjɔ eNjambe a tei enu. 43Mbi nadoi a kombe eSangwa’mbi, na otasɔkɔni mbi. Okina otongo ko akadoa a kombe ende mɛnɛ, ômosɔni. 44Ino odini bojima na ye? mojɔ bo osɔkɔni oko ekumu enu ai bato batongo; otadukakani nongo ekumu yena ehulaka ai Njambe pɛ. 45T’olɛeni oko bo mbi nadi bodumba no a boso boSango. Okina otongo adi bodumba no, oko Mose; njingo enu ko edi oko ai yo. 46Akɔki no jima Mose, ka ojimini mbi pongono, cina bo yo asɔnɔ a mojɔ mombi. 47Isa otajimakani misɔnɔ minde, odini bojima bikenge bimbi na ye?

Currently Selected:

Yoane 5: NTNG61

Highlight

Copy