Romanos 1

Paulõ hatukiri xinãnikiaki, na hãtxarã

1Mã Jesus Cristo ikũwaĩbu Roma anuabu ẽ Paulo hawẽ tsumapã mã haskaramẽkaĩ? ishũ ẽ matu kene bumai uĩrakãwẽ. Hawẽ kakape ẽ txaniakeakeshanũ habistũ hawẽ kuxipaya ea wakĩ Deusũ ea meribi watã ea yununiki. 2Bebũkirihaira ha dukũ Deusũ hãtxa meribi kenenibu anu hawẽ bakewẽ yubakanikiri hawẽ hãtxa yuishunikabu Deusũ hatu kenemani nũ unaiĩ. 3Haska nukũ Shanẽ Ibu kuxipahaira, Deusũ bake Jesus Cristorã, huni kayabi judeubũ shenipabu Davĩ baba kaĩshanaikiri Deusũ hãtxa yuishunikabũ kenenibu hayaki. 4Hanua Jesus tenãbu mawaxina hawẽ Yushĩ Pepabetã hawẽ kuxipawẽ Deusũ bestẽwãtã: “Narã, ẽ bake kuxipahaira dasibi binuaki”, akĩ Jesus Cristokiri nuku shabakabi unãmaniki.

5Haskawẽ taeshũ Jesus Cristo ẽ ikũwãniwẽ ea duawakĩ Jesusũ kuxipaya Deusũ ea wanikẽ yura betsa betsapa tibitũ hau habũri Jesus Cristo nĩkatã txibãkĩ kẽwãshanũbũ hawẽ daya ashũkĩ ẽ hatu tapĩmakubaunaii. 6-7Hari mã Roma anua hiweabũ Jesus Cristo mã ikũwaĩburã, matu dikabiwẽ Deus nuikĩ katunishũ hawenabu meribi matu waikiki. Mã haska hiweabuwẽ taeshũ nukũ Epa Deus inũ nukũ Shanẽ Ibu Jesus Cristõ duawakĩ hau unãnuma matu hiwemakubainũbũwẽ.

Jesus Cristo ikũwaĩbu Paulõ xinãkĩ hatuwẽ taeshũ Deus kẽwãkubainikiaki, na hãtxarã

8Ha dukũ matu yuinũ nĩkakãwẽ. Haska wakĩ mã Jesus Cristo ikũwãkĩ pe txibãkubainaibu mae betsa betsapa tibi anushũ matukiri txanimisbuwẽ taeshũ Jesus Cristobe hãtxakĩ matu dasibikiri dayuikĩ ẽ merabenã Deus ẽ kẽwãkubaĩmiski. 9Haska inũ, Deus besti duawanũ, iwanã, hawẽ bakewẽ nukũ txakabu Deusũ nuku buashũkatsis ikai hawẽ bakekiri dasibi ẽ kuxipawẽ hatuki txanikũkauni matu hakimama matu ea ashũkĩ Deus ẽ yukakubaĩmis Deusũ unaĩkiki. 10Haska inũ, matuki ẽ bakatsi ikai hau Deusũ hawẽ xinãnẽ ea beshpawashũshanũ hanu matuki ea bamakatsis ikĩ ea yunushanai Deusbe hãtxakĩ matukiri ẽ ea akubainaii. 11Ẽ xinãnã, matu uĩ kashũ ẽ matu yusĩkatsis ikaii, hau Jesus ikũhairawai mã kuxipakubainũbunã. 12Haska ẽ matu yuiairã, nũ Jesus txibaĩbu nuku dasibi merabenamei nũ huĩti kuxipanametirubuki, matubu inũ earã.

13Ẽ betsabu inũ ẽ puibuũ, haska judeubuma mae betsa betsapa anu hiweabu ẽ hatu yusĩmis keska wakĩ matukiriri xinaĩ mã Roma anushũ Jesus ikũwaĩbu ana matu ikũhairawamakĩ inũ betsabũ ikũwãriabuma Jesus hatu ikũwãmanũ ika mã Roma anu hiweabu ẽ matu yusĩ kakatsis ikaii. Matu uĩnũ ika ẽ yubakabiakũkainaya hamapai betsa betsapatũ ea teawa matu anu ẽ kariamaki. 14Yura betsabu tibirã, Gregonawabu inũ, Gregobuma, unãnepabu inũ, unãnepabuma Deusũ ea yusĩmakatsi ea yununiki. 15Haska ẽ xinaĩwẽ taea mã Roma anu hiweabu anuri Jesuskiri kakape matu yusĩ kakatsis iki ẽ matukiri bepeshea ẽ xinã txãkãtxakayamaii.

Deusũ kakaperã, kuxipakiaki, na hãtxarã

16Tsuabũra Deusũ kakape nĩkatã ikũwaĩbu Deusũ habũ txakabu buakĩ ana xinãma hawẽ kuxipa paewẽ hawenabu hatu wamisshũ mekepakeshanikiki. Haskawẽ taea ha dukũ judeu hatiribũ ikũwãkĩ taewanibuki. Hanushũ ha katxu judeubuma betsabũri ikũwãriakanikiki. Haskakẽ Deusũ kakape Jesus Cristokiri yuikĩ datã akĩ hawa hawẽ dakeama ẽ hatu yusĩkubainaii. 17Haska inũ, hawẽ hãtxa yuishunikatũ Deusũ kakapekiri kenekĩ yuikĩ: “Tsuabũra Deusũ hãtxa ikũwãkĩ txibaĩwẽ taea pepai hiweshãkanikiki”, aniki. Haskawẽ taeshũ hawẽ bakekiri kakape Deusũ hawẽ hatu mekekĩ hatũ txakabu buanishũ ha besti ikũwaĩbu hatu pashawashanikiki.

Deus txibãkatsi ikabuma ana Deusũ hatu mekeismakiaki, na hãtxarã

18Yura hirabi hiwebaunabu hatũ txakabuwẽ txakabukubaĩkĩ hãtxa txanimawẽ hiwekatsi ikabumawẽ taeshũ betsabũ ikũwãtirubũ hau nĩkayamanũbũ txanima hãtxa hunekĩ nemamisbuki. Habũ hatu nemamisbu Deus nai anu hiwea hatuki sinatakĩ natiã hatu kupikĩ habu tenemaikiki. 19Hawara Deuskiri unãtirubu habu Deusũ unãmakĩ hamebi hatu uĩmamiski. 20Hanushũ Deus tsuã uĩtirubumabia Deusũ mai damiwani anua haska niti akama hawẽ kuxipa inũ haska watãra dasibi pewakeakekubaĩmis Deusũ yurabu uĩmaya hawara damiwani uĩkĩ dasibibũ Deuskiri shabakabi unãtirubuwẽ taea tsuabura Deuski meseama yuikĩ: “Deuskiri tsuã ea yusĩamaki”, iki txanitxaka bestikanikiki. 21Hanushũ yura itxapabũ Deuskiri tapĩbianishũ hawẽ hãtxa danãkĩ duawama inũ kẽwãma inibuki. Hakia haki petxitã hatũ xinãnẽ besti txakabu xinaĩ unaĩsmapakĩ ana txanima hãtxa tapĩtirubuma ikubainibuki. 22-23Ha Epa Deus kuxipahaira mawatiruma ana kẽwãma habũ xinã kuxitã ha dami uĩtiru kẽwãkatsi ikĩ huni mawatiru betsabũ dami waibu tsuabũra ha dami bitã kẽwaĩbu betsabũ peiyabu dami waibu bitã kẽwaĩbu betsabũ yuinaka piti inũ pitima tae dabe inũ dabeya dami waibu bitã kẽwaĩbu betsabũ nutawẽ sharaibu dami waibu bitã kẽwãkĩ haska xarabu besti kẽwãkubainũ ikĩ Deus danãkĩ yuikĩ: “Ẽ unãnepaki”, ibiai unaĩsmapabu ipaunibukiaki.

24Haskawẽ taeshũ yurabũ haska xinaĩ aki hiwekatsis ikaibu hawaki ana dakeama hau habũ yura mekeama txakabukubainũbũ habũ xinã txakabu inũ hawara txakabuwakatsis imisbu akeakeaibu ana nemama ana hatu mekeama hatuki petxitã Deusũ hatu henea haska hiwenibukiaki. 25Yura betsabũ Deuskiri hãtxa kayabi danãtã txani hãtxa ikũwãkĩ txibãkĩ Deus kayabi ana xinãma hawara Deusũ damiwani besti uĩkĩ kẽwãkubainibukiaki. Hakia nũ ikũwaĩbunã, nukũ mekenika Deus hatũ nuku damiwani kẽwãkubainãkãwẽ. Haskakirã.

26-27Haska txakabu besti xinãkubainaibuwẽ taeshũ Deusũ hatu henekinã, yurabu ana abunamekayabiama hatũ txakabuki dakeama daketapaibu hatu uĩkĩ anikiaki. Hawarawẽ yura pepabu dakeaibu ana dakeama aĩbuaibũ hunibu txutamakatsis ikama hakia habe aĩbu betsabe txutanamei itsai menamei ibunanãbu, inũ huniburi aĩbuwẽ ana kemukĩ txutakatsi ikama habe huni betsawẽ kemui habe txutanameaibuwẽ taeshũ hau haskai besti hiwekubainũbũ Deusũ hatu ana nemama henenikiaki. Haska hiwei dakeisbumawẽ taeshũ hatũ yura isĩ betsawẽ tenemakĩ Deusũ hatu kupikĩ taewaniki. 28Habũ Deuskiri xinã txanima kayabi ana xinãkatsi ikama ikubainaibuwẽ taeshũ hatũ huĩtinĩ xinã txakaibu haska abui hiweaibu Deusũ habu ana nemamaki. 29Eska tibi matawaibuwẽ taeshunã, hawẽ atimapaiburã, txutanametxakaiburã, yauxiaiburã, ha pewẽ hiweama txakabuwẽ hiweairã, betsabu hatũ hawara hayawẽ hatuki sinataiburã, yura betsa tenaĩburã, detenameaiburã, txani txakabaunaiburã, beparameaiburã, yuãnanaĩburã, haskai hiweabuki. 30Ha inũ, shetxakai hãtxa txakabumisburã, habũ Deus danãkĩ abuisbumarã, hawẽ nuibiabu benunũ ikĩ tsua nĩkaismarã, hamapai atirukiri keaĩburã, txakabu betsa betsapa benawairã, haskakĩ hatũ ibuã hãtxa danãkĩ nĩkaisbumariki. 31Haska inũ, hãtxa txanima nĩkakatsi ikamarã, hãtxabiatã aisbumarã, tsuawẽ nuisbumarã, tsua merabenãma hiwemisbuki. 32Ha inũ, haskai hiwea hau hawẽ besti mawanũbũwẽ, Deus ibianikẽ haska unãhairabiai ana hawaki meseama habias txakabuwakubaĩkĩ betsabũ habias akaibu uĩ benimakubaĩmisbuki, habu huni txakabu tibirã.

Currently Selected:

Romanos 1: cbsBR

Highlight

Copy