Gênesis 35

Betel anushũ Deusũ Jacó mai pakea ibuwamakatsi yubakĩ kushipa wakĩ pepa wanikiaki, na hãtxarã

1Hanushũ hatu haska washiãbũ Deusũ Jacó yunukĩ:

—Minabu pewatã Betel anu hiwei kawe. Hanu hiwea mĩ Esaú anua pashaya ẽ miki nukua mĩ namaya ẽ mibe hãtxani anu ha mishki txi tapu hanushũ mĩ ea kẽwãtiru ashãwẽ— aka 2haska wa datekĩ hawenabu inũ hawẽ tsumabu Jacó yuikĩ:

—Matu anua dami yushĩ tibi mã haya kaĩmakãwẽ. Hanua nashi txuki petã pepanũ, ika matũ tari betsa sawetã 3hanu Deus hiwea mae Betel anu bunãkãwẽ. Ẽ nuitapakaini kai hanira ẽ kapanã Deusũ ea unãkĩ merabewakĩ ea hãtxa wani hanira ẽ kaya ebe kakũkaĩmiski, ea haska wamiswẽ taeshũ Deus kẽwãkĩ mishki txi tapu wakĩ mishki itxawakĩ maspu watã ẽ txashuwã bake teshteshũ ẽ menu keyushuni kairã— hatu wa 4hanushũ hatũ yushĩ deus dami tibi betsa betsapa kẽwãkĩ damiwamisbu inũ, hatũ dami ouro mane pau Jacó inãbu mae Siquém dapi hi shukua namã pukĩshũ ana uĩtimawakĩ Jacó dasibi maiwatã 5hatu haska wamabaini tashnibainaibũ mae tibi anua Deusũ hatu datemabaunaiwẽ taeshũ Jacó hawenabube detekatsi ibiai datekĩ hawẽ bakebube txibãma inibukiaki.

6-7Hanu hawẽ betsaki datei pashai Canaã anu kai ushaki hanu Deus haki nukuni ha mae Luz nawabũ kenanibu anu Deus haki nukua uĩshĩkĩ kena bena wakĩ: “Betelki”, ani anu ana Jacó hawenabuya hari kai hikitã hanushũ txi tapu wakĩ mishki itxawakĩ maspu watã Deus kẽwãkĩ Jacó txashuwã bake tesẽshũ menu keyushũtã ana habiariri kenakĩ: “Betelki”, anikiaki. 8Habianuari Jacó ewa Rebeca hatũ yumewani hawẽ tsuma Débora ma yushabuhaira Alom-Bacute anu mawakẽ Betel mae dapi hi shukua namã mai wanikiaki.

9Padã-Arã anua ana Jacó txĩtuĩmakẽ Deus ana haki nukushũ hau haskanũbarinũ Deusũ hawẽ kushipawẽ duawakĩ pe yuikĩ 10eska wanikiaki:

“Ikis mĩ kena Jacóki.

Ana Jacó kenama hakia: ‘Israelki’, akĩ

hau hawẽ mia kenapakeshãbũwẽ”,

iwanã, haska wakĩ Deusũ Jacó kena bena wanikiaki. 11Ana yuikĩ:

“Earã, ẽ mekenika Deus kushipaki,

ẽ kushipawẽ dasibi ẽ hatu binu keyuarã.

Ea nĩkawe. Itxapai pashãkãwẽ,

minabu bake pawai mirimahairawairã.

Mia anua minabu shukua betsa betsapa

shanẽ ibu kayabi ishãkanikiki.

12Na mai pakea mĩ hutxi Abraão

inũ mĩ epa Isaque yubakĩ ẽ yununi

habiaskari wakĩ ẽ mia yunuaii.

Hanushũ txipuri minaburi pakubainaibu

ẽ hatu yununũbariaii”, atã

13hanua Deus Jacóbe hãtxatã kakẽ 14habianuri Jacó mishkiwẽ unãti wakĩ dabekĩ nitxĩtã haska watã Deus kẽwãkĩ uva vinho inũ piti sheni hene inãkuĩkĩ haki mashu akĩ maukanikiaki, ha mishki Deusuna wakinã. 15Haska watã ma anishũ ana habiariri kenakĩ: “Betelki”, anikiaki, nukũ hãtxawẽ kenarã: “Deusũ Hiwea Maeki”, akinã.

Raquel bake kaĩtã mawanikiaki, na hãtxarã

16-17Betel anua kaĩbaini mae betsa Efrata ma kemai buaibũ Raquelĩ bake bima tuya kai bai namakia bake kainũ ika kaĩtxakai bika tenehairaya hatũ bake imaitũ yuikĩ:

“Dateama iwe, mĩ iki peairã, huni bake betsa mĩ kaiainã”, aka 18mawakatsis ikamabia ma mawai Raquelĩ shinãkĩ yuikĩ: “Ẽ huni bakẽ kenarã: ‘Benoniki’, nukũ hãtxawenã: ‘Ẽ isĩ nui bakeki’, atã mawakẽ hakia hawẽ epa Jacó hawẽ kena betxipaiama kena betsa wakĩ: ‘Kashahairai hi shukuaki’, ‘Benjamimki’, nukũ hãtxawẽ: ‘Duapa bakeki’ ”, hatu wa

19-20haskatã Raquel mawa Efrata bai kesha maiwatã hawẽ tsumabubetã Jacó mishki keyatapa hawẽ unãti wakĩ hawẽ mai mamaki nitxinibukiaki. Na habia eskatiã Efrata mae hawẽ kena bena Belém wanibu txaima anu na unãti uĩriatirubuki.

21Hanua Jacó hawẽ kena bena Israel hawẽ aĩ haska wabaini ana txipekekaini kakĩ hanu manaũrishũ uĩbaũti hawẽ kena Migdal-Éder daĩbaini kashũ hatũ tari hiwe hatu pũtematã 22hanu hiweyuaya hawẽ bake iyua Rúben kashũ hawẽ epã escravo aĩ Bila ati wakĩ hune txutakẽ Israel banabimabu nĩkatã haki sinatahairanikiaki.

Jacó huni bakeburã, 12 inikiaki, na hãtxarã

Jacórã, 12 huni bakeya inikiaki. 23Hawẽ aĩ Léiã huni bakeburã, hawẽ tue benarã, Rúben inũ, Simeão inũ, Levi inũ, Judá inũ, Issacar inũ, Zebulom hati binikiaki. 24Hamẽ hawẽ aĩ betsa Raquelĩ huni bake daberã, José inũ Benjamim inikiaki. 25Raquelĩ escrava Bilã huni bake daberã, Dã inũ Naftali inikiaki. 26Hanua betsa Léiã escrava Zilpa anua huni bake daberã, Gade inũ Aser inikiaki. Jacó Padã-Arã anu kani hiweshũ dasibi hatu bawarã, haria kainibukiaki.

Isaque mestebuhairatã mawanikiaki, na hãtxarã

27Manre hawẽ kena betsa dabe Quiriate-Arba inũ Hebromrã, hanu Abraão inũ Isaque hiwea mapupaunibu anu Jacó hawẽ epa Isaqueki ana nukutushinikiaki. 28-29Hanua Isaque 180 bariya mestebuhaira mawakẽ hawẽ yushĩ hawẽ shenipabuki dasishĩkẽ hawẽ bake dabe Esaú inũ Jacó hawẽ yura mai wanibukiaki.

Currently Selected:

Gênesis 35: cbsBR

Highlight

Copy