Atos 9

Jesusũ Saulo xinã betsa wamanikiaki, na hãtxarã

(At 22.6-16; 26.12-18)

1Hanua habiatiãri Shanẽ Ibu Jesus ikũwaĩbuki pubẽkĩ Saulõ hatu itxakawakĩ tenãkĩ heneriama haskawẽ taea Deusbe hawenabu hãtxashunika shanẽ ibuhaira hatu binua anu Saulo kashũ 2haska xinaĩ yuikĩ: “Damasco anu kashũ ha Bai Bena Jesuskiri hatu tapĩmaibu huni inũ aĩbu atxitã Jerusalém anu ẽ hatu iwekatsis ikaii, nenu hatu bitxinũ, iwananã. Haskakẽ mĩ kuxipaya kanũ, iwanã, ẽ mia yukai huaii. Ea kuxipa wakĩ Damasco mae ewapanua hanu nukunabu itxamisbu hiwe anu ẽ kakẽ hau shanẽ ibubũ ea merabewashanũbũ mĩ kuxipa hatu yunuwe, ẽ buairã”, aka: “Peki”, ishũ keneshũtã haya yunua 3hanua Saulo haska wa kai Damasco bai tanabaini ma kemaya nai anua bĩ kuxipahaira peshekirã Saulo datxashaya 4hanua Saulo maĩ di ikaya hui tashnikĩ yuikĩ:

—Sauloõ, Sauloõ, haskakĩ mĩ ea hatu itxakãwaĩ?— aka

5Saulõ dateyabi yukakĩ:

—Shanẽ ibuũ, mĩ tsua ikai?— aka

hanushũ ha hui tashniaitũ Saulo ana yuikĩ:

—Habia ea ikũwaĩbu mĩ ea hatu itxakãwainã, ẽ eaki, Jesusrã. 6Benikaini kai Damasco anu karitãwẽ, harishũ mĩ haskakũkaĩshanai tsuãra mia yuishanikikirã— akaya

7ha hunibu Saulobe buaibũ hawẽ hui nĩkabiai tsua uĩyama datehairaibũ 8hanua Saulo maĩ daka benikawã ma bepeshebia hawa uĩtirumakẽ ha habe buaibũ metsũshũ Damasco anu Saulo iyuabu 9haskakaĩxina haria ma shaba dabe inũ besti kaya hawa uĩyama datekĩ Saulõ hawa piama hawa nushuamakẽ

10ha Damasco mae anu hiweshũ Jesus ikũwaĩ betsa hawẽ kena Ananias nama keskaiwẽ uĩayã Shanẽ Ibu Jesus hushũ ha bebũshũ kenakĩ yuikĩ:

—Ananiasiĩ— aka

kemakĩ:

—Shanẽ Ibuũ, ẽ nenuki. Mĩ hawa ea yuiai?— aka

11Shanẽ Ibu Jesusũ yuikĩ:

—Benikaini kakĩ ha bai hawẽ kena Kayatapia anu kashũ Judasĩ hiwe anu hikitã hanua huni betsa Tarso anua kaĩni huxiã hawẽ kena Saulo yuka itãwẽ, Deusbe hãtxaikikirã. 12Namai keskawẽ huni hawẽ kena Ananias hikitã mamepishũ hau ana uĩ benawanũ, merabewai ma uĩshuki— aka

13Ananiasĩ nĩkatã Jesus yuikĩ:

—Shanẽ Ibuũ, Jerusalém anushũ minabu meribi mĩ hatu wai ha hunĩ mia hatu itxakãwãmiskiri itxapabũ hakiri hãtxakĩ txakabu ea yuimisbuki. 14Hatu haska wakubaini Deusbe nukunabu hãtxashunika shanẽ ibubũ kuxipaya bexiãbukiaki. Nũ habũ mĩ kenawẽ taeshũ Deus yukaibu dasibi nukuri nenua atxitã Jerusalém anu nuku iyushũ bitxinũ ika huxiãkiaki— aka

15haska yuibiaya Shanẽ Ibu Jesusũ ana yuikĩ:

—Hẽ iyamai dateama katãwẽ. Ha huni kaĩriama ẽ katunitũ ekiri txanikĩ nawa shukua betsa betsapabu hatu yusĩkĩ inũ, hatũ shanẽ ibubu yusĩriakĩ inũ, Israelburi ea hatu yusĩriashũkubaĩshanikiki, 16ea txibaĩwẽ taea haskai nuitapakũkaĩshanai ẽ unãmashanairã— aka

17nĩkabaini Ananias kai hanu Saulo ika anu hikikaĩ mamepitã yuikĩ:

—Sauloõ, Jesus ikũwaĩ ma mĩ nukũ betsaki. Mĩ bai tanabiranai habias Shanẽ Ibu Jesus miki nukuxinatũ hau mĩ beru mĩ ana uĩ pewanũ inũ hawẽ Yushĩ Pepatũ hau mia atxitã kuxipa wanũ mia anu Jesusũ ea yunushuki— akaya

18-19hakimamari hawaira Saulõ beru anua baka shaka keska niri ikaya ana uĩ pewatã benikaĩ ma hatubetã Jesus ikũwãyã naximatã iyushũ pimabu ana kuxipatã usha eskarabes Damasco anua ikũwaĩbube hiweyunikiaki.

Damasco anushũ Saulõ Jesuskiri yusĩkĩ taewanikiaki, na hãtxarã

20Hanu hatube hiweyushũ hanu judeubu itxamisbu betsa betsapa anushũ Saulõ hatu yusĩ taewakubaũkĩ:

—Jesusrã, Deusũ bake kayabiki— akĩ hatu yuikubainaya 21dasibibũ nĩkai e iki yuinamei:

—Na huninã, Jerusalém anushũ ikũwaĩbu hatu itxakawamisshũ nenuri hushũ nũ habũ Jesusũ kenawẽ taeshũ nũ Deus yukaibu nukuri habiaskari wakĩ nuku atxishũ Jerusalém anu Deusbe nukunabu hãtxashunika shanẽ ibubu anu nuku iyunũ ika huxianã, ha hunirã, hamamẽ?— ikaibũ

22hanua Saulo ana hawa dateama Deusũ kuxipawẽ shabakabi judeubu Damasco anu hiweabu hatu yusĩkubaĩkĩ: “Jesus Deusũ Katua Messiaski”, akĩ Deusũ hãtxa kenenibuwẽ hatu unãmakubainaya hanua judeubũ uĩ e iki hakiri harakiri xinãtima ikaibũ

Judeu shanẽ ibubũ Saulo detepanãbũ pashanikiaki, na hãtxarã

23usha itxapa hatu yusĩkubainaya judeu shanẽ ibubu Sauloki sinatakĩ detekatsis iki hakiri hãtxai yubakaxinabũ 24Saulõ nĩkatã unãyã hanu kaĩkainai atxinũ ika yubakaxinabu bariri inũ mexu merã ha mae ewapa mixki kenebaunibu hikiti shui anu manakakĩ kesheabũ 25hanua hatũ mae anu mixkiwẽ kenekĩ keyatapa wanibu hanu uĩti shui anu Saulõ habu hatu yusĩa Jesus ikũwaĩ haki txiti ikaibu betsabũ mexu merã Saulo kuki ewapaki nanetã buteabu ha mae anua kaĩkaini pashanikiaki.

Saulo ana Jerusalém anu txĩtũkainikiaki, na hãtxarã

26Hanua pashai kai Jerusalém anu ana hikixina hanishũra Jesus ikũwaĩ betsabube itxanũ ika dasipanã haska hatu itxakawatxakayamakubaĩxinawẽ taea dasibibu haki mesei ikũwãma ikai dabanẽ xinaĩ: “Jesus ikũwãmabia Saulõ nuku beparãtã anũ ika ikimẽkaĩtsa”, ika haki dateaibũ 27hakiri mesebiaibũ Barnabẽ Saulo Jesusũ kuxipayabu anu iyushũ hatu unãti wamakĩ yuishũkĩ:

—Ana haki meseyamakãwẽ. Damascokiri kakĩ nukũ haibu Saulõ Shanẽ Ibu Jesus uĩ habe hãtxaimaki. Hanushũ Jesus ikũwãtã hawẽ kuxipawẽ Damasco anushũ hawa dateama Jesuskiri hatu dasibi yusĩbaũxinaki— hatu wakĩ hatu beya wamakĩ tapĩmaxinawẽ taea 28hanu hatu anu niti iyuxina haskai hiweyushũ Jerusalém anu Jesusũ kuxipayabube hiwea hawa dateama nukũ Shanẽ Ibukiri yusĩ Saulo hatube hãtxakũkaĩkĩ 29judeubu Grego hãtxawẽ hãtxamisbube hatube hãtxai yuinamekĩ hatu yusĩayã hawẽ yusĩa danaĩ haki sinatakĩ tenãnũ ika yubakaibũ 30hakiri haska xinaĩbũ ikũwaĩbu betsabũ hune nĩkashũ Saulo merabewanũ, iwanã, iãnẽwã kesha Cesaréia anu iyuxĩshũ harishũ hawẽ mae Tarso anu niwe shashu ewapawẽ nitxĩkĩ yununibukiaki.

31Ha haskaibutiã ikũwaĩbu Judéia mai pakea anuabu inũ, Galiléia mai pakea anuabu inũ, Samaria mai pakea anuabu itxakawakĩ ana tsuã hatu meabuma unãnuma hawama hiwei hanua ikũwaĩbu kuxipai Deus kuxipaki meseaibũ hawẽ Yushĩ Pepatũ hatu merabewaya ana itxapabũ ikũwaĩ mirimabu hatuki dasikubaini hiwenibukiaki.

Pedrõ Enéias kaya wanikiaki, na hãtxarã

32Hanushũ Pedrõ ikũwaĩbu hatuki bakĩ hatu yusĩ kakũkaũkĩ mae betsa Lida anu hiweabu anuri Deusũ enabu meribi anu hatuki bai hikishũ 33hanua huni betsa hawẽ kena Enéias hawẽ yura babuniwẽ taea ma oito ano kabia benisma dakasa Pedrõ betxitã 34yuikĩ:

—Enéiasiĩ, Jesus Cristõ mia kaya waikiki. Benitã ha mĩ haki dakamis pewariwe— aka

hawaira Enéias benitã hawẽ yura damestẽtã nikaunaya 35ha mae dabe Lida inũ Sarona anu hiweabũ ha huni Pedrõ kaya waxina uĩkĩ Shanẽ Ibu Jesuskiri nĩkakĩ dasibibũ xinã betsa wanibukiaki.

Dorcas mawa Pedrõ bestẽwanikiaki, na hãtxarã

36Ha bari haskaitiã mae betsa txaima Jope anushũ aĩbu betsã Jesus ikũwaĩ hawẽ kena Tabita, Grego hãtxawẽ hawẽ kena Dorcasrã, aĩbu duapatũ hawauma nuitapaibu hatuwẽ dabanã ikĩ hatu merabewakubaĩmis 37e iskaũ hawaira isĩ bitã mawakẽ hawẽ yura datxushũ manaũri hiwe keyatapa dĩtu anu iabaĩ mapemashũ datãtanabũ 38ha mae urama Lida anushũ Pedrõ hatu yusĩaĩ Jope anuabũ ikũwaĩbũ nĩkatã hau habũ ha yuishũtanũbũ huni dabe nitxĩkĩ hatũ hãtxa hatu yuikĩ:

—Pedro yuikinã, eska watãkãwẽ: “Menaã, hawairakiaki. Jope anu huriwe”, atãkãwẽ— hatu wa bushũ yuiabu

39hanua Pedro iyuabu hatube kai hikitanaya hanua Pedro ana uke merã iyukĩ hanu yura mawa datãbu anu hikimaibũ ha aĩbu beneuma nuitapaibũ keshebauna kashakĩ Dorcas hiweshũ hatu batxi washũmis Pedro uĩmai ana kashatxakayamaibũ 40hatuwẽ nuikĩ dasibi hatu kaĩmatã dãti ishũ Deus yukashũtã aĩbu mawa beiskĩ yuikĩ:

—Tabitaã, benirikirãwẽ— aka bepeshetã Pedro uĩtã tsauwaya 41Pedrõ metsũshũ benitã hanushũ aĩbu beneuma nuitapaibu inũ ikũwaĩbu betsabu hatu kena beshũ ma aĩbu ana hiwema uĩaĩbũ 42dasibi Jope mae ewapanu hiweabũ Pedrõ haska waxina nĩkaxĩshũ itxapabũ Shanẽ Ibu Jesus ikũwãnibukiaki. 43Hatu haska washũxina hanu hatũ ina awa bitxi payukĩ pewamis hawẽ kena Simãonẽ hiwe anu hiweyushũ Pedrõ hatu yusĩyukubainikiaki.

Currently Selected:

Atos 9: cbsBR

Highlight

Copy