Atos 2

Deusũ Yushĩ Pepa hatu anu hunikiaki, na hãtxarã

1Hanua ana betsatiã judeubu Pentecostes nawai besiaibũ Jesus ikũwaĩbu dasibi hanus itxabũ 2hawaira nai anua hawẽ bana niwe kuxipa bei dãka imis keska shũku ibirani hanu maniabu anu kerũ kerũ ikĩ 3haskakĩ Jesus ikũwaĩbu tibi txi here keska shawakeakei hatu mamaki maratamea hi ibauni hatuki hikiakeakeaya 4haskakĩ dasibi hatu atximakĩ keyuaya haska hãtxatirubumabiakẽ nawa betsa betsapabũ hãtxa tibiwẽ Deusũ Yushĩ Pepatũ yuimakĩ hatu hãtxamakĩ taewaya

5mai pakea betsa betsapa anua judeubu Jerusalém anu hiwei benibu hiweabũ habu pepakĩ Deusũ hãtxa txibãkĩ menekĩ heneisbuma 6hawẽ bana nĩkabirani hanu mirima itxashũ ikũwaĩbu anu hãtxa betsa betsapawẽ hãtxabaunaibũ harakiri xinãtima hatu wakeakeabu huni tibitũ mai kesua anua habũ hãtxawẽ hãtxaibu nĩkai haskawẽ hãtxaisbuma nĩkai 7haskakaĩmaibu nĩkai e iki teku iake iakei hãtxanamebaũkĩ yuikĩ:

—Narã, Galiléia anuabumamẽ, na haska dasibi hãtxabaũkanairã? 8Nukũ hãtxa tibiwẽ hãtxabaunaibubĩ! Nũ nĩkai? Haskai ha hunibu haska hãtxakanimẽkaĩ? 9Na nũ nukuburã, Partos anuabu inũ, Média anubu inũ, Elão anuabu inũ, Mesopotâmia anuabu inũ, Judéia anuabu inũ, Capadócia anuabu inũ, Ponto anuabu inũ, mai pakea Ásia anuabu inũ, 10Frígia anuabu inũ, Panfília anubu inũ, Egito anuabu inũ, Líbia mai pakea Cirene dapi anuabu inũ, Roma anuabu inũ, 11betsa judeu kainibu inũ, betsabũ judeubũ beya txibãmisbu inũ, Creta anuabu inũ, Arábia anuabu beimabu nukũ hãtxa tibiwẽ Deusũ kuxipawẽ e imatikiri yuiaibu nũ hatu nĩkaii— iake iakeaibũ

12haskaibu hatu nĩkatã dasibi harakiri xinãtima e iki keyutã yuka iki:

—Na eska txani hãtxaiburã, hawamẽ?— ikaibũ

13hakia huni betsabũ hawa xinãmari hatu kashe wakĩ ikaibukiri hatu yuikĩ:

—Paẽa daki hãtxai ikanikika!— ikaibũ

Pedrõ hatu tapĩmai hãtxanikiaki, na hãtxarã

14hanua Jesusũ 11 tsuma kuxipaya betsabube Pedrõ hatũ hãtxa nĩkai benia nishũ hui kuxipawẽ hatu yuikĩ:

—Judeubu inũ dasibi Jerusalém anu hiweabuũ, eska ẽ matu yuiai nĩka peirawakãwẽ, haska mã nĩkai hãtxairã. 15Na yuraburã, paẽabumaki, haska mã xinãkĩ ikũwaĩ keskamarã. Haskai e iskaũ bari keyariamabiakẽ 9:00 hora paẽtirubumaki. 16Hakia natiã haska tashniai nĩkakĩ mã uĩaĩnã, haska bebũkiri Deus yubakanishũ akikiki. Hawẽ hãtxa yuishunika Joel Deusũ hatu yuimakĩ:

17Deus txanii:

‘Ma bari hawẽ henei kaya ẽ Yushĩ Pepa yurabu anu ẽ hatu yunua

hatuki dasikẽ matũ huni bakebu inũ matũ aĩbu bakebũ ekiri yusĩaĩbũ

berunãbu usha keskashũ

dami betsa betsapa uĩaĩbũ

anibubu usha ekiri namariashãkanikiki.

18Habiatiãri ẽ tsumabu hunibu inũ aĩbuaibu ẽ Yushĩ ẽ hatu inã

ekiri yusĩbaũshãkanikiki.

19Haska inũ, nai anua hawẽ e imai kuxipa wakĩ

mai anuari dami betsa betsapari ẽ washanaii.

Himi habamakinã, txi wakinã, basnũ bai kua hawẽ kuĩ keska wakĩ

ẽ hatu uĩmashanaii.

20Ẽ bake kuxipahairai txashakapai shanẽ ibui hua kemariamakẽ

shaba betsa betsapashanikiki.

Ha haskaitiã bari ana txashama mexu wakĩ inũ ushe ana txashamari himi keska ishanikiki.

21Hanushũ tsuabũra: Ẽ Shanẽ Ibu Yavé Deus kuxipaki, ikĩ

ea yuiaibu habu besti pashakĩ hatũ hiwea ikibi ika bishãkanikiki’,

aka Joelĩ yusĩtã nuku keneshuniki— iwanã, Pedrõ ana hatu yuikĩ:

22—Israelbuũ, ẽ matu yuiai ea nĩkakãwẽ. Matunã, mã unãhairaii. Jesus Nazaré anua hua Deusũ kuxipa watã hawẽ e imati inũ hawẽ unãti wamakĩ dami itimaska tsuã atiruma wamakĩ hawẽ kuxipa matu uĩmakĩ Deusũ amakeakekĩ shabakabi matu uĩmakubainimaki. 23Haska yubakani Deusũ ha huniwẽ abainai xinãma haska wai beshtenũ, iwanã, matũ hawẽ bake danãkĩ haki yubakatã hatu atximatã tenãmanũ, iwanã, huni txakabu mã hatu mastamaimaki. 24Hakia mawabiakẽ Jesus Deusũ ana bestẽwaĩmaki, mawamamistũ isĩ tenemakĩ baxitirubia hawẽ hiwea yabutiruma binumakinã. 25Hamẽ shanẽ ibuhaira Davĩ Jesus iki kaikiri yuikĩ:

‘Ẽ shanẽ ibũ ea mekekĩ

ẽ yusiuri hawẽ kuxipawẽ ea merabewai ẽ uĩkubainaya

hawa tsuã ea maematã binũtirumaki.

26Haskawẽ taea huĩti xinã txãkaĩ benimai nawakĩ kẽwãkĩ heneama

ẽ hiwea dasibiwẽ ikũwaĩ hawa dateama ẽ ikũkaĩshanaii.

27Mawabu hanu dasibi bumisbu anu ka

mĩ meribi mĩ tsumapã yura maiwati tãpe anu

hau dakai txapuyamashanũ mĩ nemashanaii.

28Haska watã hanu hiwekuĩ kati bai ea unãmatã

mia anu hiwemakĩ mĩ ea benimawakubaĩshanaii’,

akĩ nuku keneshuniki— iwanã, ana Pedrõ hatu yuikĩ:

29—Ẽ betsabu inũ ẽ puibuũ, nukũ shenipabu kayabi Davikiri txanima shabakabi matu yuinũ ea nĩkakãwẽ. Davi mawa hanu maiwakĩ hawẽ yura hananibu nũ uĩmiski. 30Habias Davi Deusũ hãtxa yuishunika hawẽ yurakiri hamebi hãtxama hakia hawẽ baba betsa kaĩriamakiri Deusũ yubakĩ shanẽ ibuhaira ishanai unãmakĩ yuimaniki. 31Deusũ hãtxa yuishunika Davi bebũkiri Deusũ xinãmakĩ Messiaskiri hãtxamakĩ hatu yuimakĩ: “Messias Cristo mawa hawẽ yura txapuama inũ mawabu anu hawẽ yura baxiama ana bestẽwãshanikiki”, ika hakiri hãtxaniki. 32Hamẽ Deusũ haskakiri hãtxamanirã, ha Jesus mawa bestẽwãxina txanima ibubis dasibibũ nũ uĩkubaĩxina nũ unãkanaii. 33Hanushũ ana bestẽwãtã Deus hau habe shanẽ ibunũ, iwanã, hawẽ yusiuri tsaũtã haska yubakani hawẽ Yushĩ Pepa hawẽ Epã Jesus inã hatũ nuku inãkeakekĩ nuku kuxipa waikiki, na habia nĩkakĩ mã uĩanã. 34Haska inũ, Davikirima tsuara nai anu kashanaikiri habias Davĩ hamebi yuikĩ:

‘Deusũ ẽ shanẽ ibu yuikĩ: Ẽ yusiuri tsauyuwe.

35Hanu miki sinataibu ẽ mia yamawashũriama

ebe shanẽ ibukĩ manayuwe’,

aka hatu yusĩtã nuku keneshuniki— iwanã,

36—Israelbu dasibibuũ, txanima matu shabakabi xinãmanũ ea nĩkakãwẽ. Ha habias Jesus cruz anu mã hatu mastamaimarã, Deusũ bestẽwãtã nukũ Shanẽ Ibu kayabi nuku washuĩmaki, hawẽ Messias Cristorã— hatu wa

37hanu hatube itxabũ nĩkai haskatimẽ? ika hatũ huĩti nixmahairai bika tenekĩ xinãkĩ Pedro inũ Jesusũ tsuma kuxipaya betsabu hatu yukakĩ:

—Betsabuũ, haskatã nũ haskatirumẽ?— hatu wabu

38Pedrõ hatu kemakĩ:

—Deus mã txibãkatsis ikairã, matũ txakabu henetã matũ xinã betsa watã Deus anu berikãwẽ. Haska watã mã Jesus Cristo ikũwaĩwẽ taeshũ hawẽ kenawẽ matu tibi nũ matu naximaya matũ txakabu buatã hawẽ Yushĩ Pepa Deusũ matu inã mã bishanairã. 39Nukuna bestimaki. Haska Deus yubakani ma akikiki. Matu dasibibu inũ matũ bakebu inũ txaihaira manibaunabu nukũ Shanẽ Ibu Deus haska matukiri yubakairã, dasibi matukiri iniki. Haskawẽ taeshũ hatira hawenabu wakĩ katukĩ kenakatsis ikikiki— iwanã,

40ana hãtxa itxapawẽ Jesus mekenãkiri shabakabi yusĩ pewatã Pedrõ hatu yusĩkĩ yuikĩ:

—Ha yurabu hiwe txakabu anua pasharikãwẽ— hatu wa

41hanushũ ha shabatiã hawẽ hãtxa nĩkakĩ ikũwãkĩ xinã betsa waibu 3.000 yurabu naximabu hati ana hatubetã ikũwaĩ hatuki dasinibukiaki. 42Hanushũ Jesusũ kuxipayabũ hatu yusĩaĩbu habũ hatũ yusĩa tapĩkĩ txĩtuãma hawara hatũ hamapai pashkai merabenaĩ inũ, itxashũ hatubetã Jesus hatu mawashunima xinãkĩ misi pikĩ inũ, habubetã Deus kuxipa yukakubainibukiaki.

Habũ dukũ ikũwãtã eskai hiwekubainibukiaki, na hãtxarã

43Habiatiãri Jesusũ tsuma kuxipayabũ Deusũ hatuwẽ dami atimaska itxapa akĩ hawẽ unãmati betsa betsapa akaibũ dasibi Jerusalém anu hiweabu e iki Habaa! ikubainaibũ 44ikũwaĩbu dasibi pashkama merabenaĩ hatũ hamapai yauxiama inãnanãkĩ 45betsabu mabuyabu inũ baiyabũ hawẽ pei bikatsi huni betsabu inãtã hawẽ pei bitã ikũwaĩbu nuitapaibu hawa hayama pei hatu pashkashũkĩ merabewakubainibukiaki. 46Hanua shaba tibi Templo hemaĩtĩ anushũ kuxipa yukakĩ hiwe anushũri itxashũ hawa txĩtuãma xinã txãkãbetanã hatubetã pikĩ Jesus hatu mawashunima xinãmati misi pikĩ 47Deus kẽwaĩbũ dasibibũ hatukiri pe xinãkubainaibũ shaba tibi betsabũ Jesus ikũwaĩ yurã kaiã itxai hatuki dasiaibu Deusũ hawenabu hatu wakĩ kenakubainikiaki, habu hiwei mekekatsi ikaiburã.

Currently Selected:

Atos 2: cbsBR

Highlight

Copy