Atos 11

Judeubumã ikũwãxinabukiri Jerusalém anushũ Pedrõ hatu banabimanikiaki, na hãtxarã

1Hanua nawã mae anushũ judeubumabiabũ Jesuskiri Deusũ hãtxa nĩkatã ikũwãxinabũ kakaibu Judéia anushũ Jesusũ kuxipayabu inũ ikũwaĩ betsabũ nĩkaxinabũ 2hanua Pedro Jerusalém anu txĩtũkirani hikixĩkẽ ikũwaĩbu betsa betsapabũ judeubũ beya abuhairamisbu haki ha ikĩ txitekĩ 3yukakĩ:

—Haskai judeubuma anu hatu uĩ kashũ mĩ hatubetã pixiãmẽ, nukũ beya ana txibãma kanekinã?— akabu

4hanushũ Pedrõ hatu kemakĩ haska iki taekaĩxina dasibi hatu yuikĩ:

5—Ha mae Jope anua Deusbe hãtxai usha namai keskakĩ ẽ uĩayã nai bepẽmanaya tari keshema ewapa dabe inũ dabe deshũ tibi dispiwẽ neshabauna ea anu buteaya 6habia tariki uke merã yuinaka tae dabe inũ dabeya betsa pianãbu inũ, maĩ sharamisbu inũ, peiyabu mata judeubũ pisbuma ẽ uĩayã 7hanushũ nai anua hui tashnikĩ ea yuikĩ: “Pedroõ, benitã haratura ha yuinaka mĩ uĩaĩ betsa deteshũ piwe”, ea waya 8eã kemakĩ: “Shanẽ Ibuũ, ea haska wayamawe. Nukũ shenipabũ beya txibãkĩ yuinaka betsa betsapa atimapa haska nũ pitirumahaira Moisés nuku nemani ẽ pismahairaki”, ẽ aka 9hanushũ nai anua hawẽ hui tashnikĩ ana ea hãtxa wakĩ xinã tapĩmakĩ ea yuikĩ: “Deusũ hawara dasibi na mia pewashũshuwẽ taeshũ ana: ‘Deusũ mia nemamis’, yuikĩ ana danãyamawe”, ea watã 10ana dabeki habiaskari ea yuikĩ nemaya ana hawẽri naiuri ana ainikĩ buaya 11ẽ haska uĩayã huni dabe inũ bestitũ Cesaréia anushũ hatu yunua bexĩshũ ẽ hanu ikanu ea benaibũ 12hanushũ Deusũ Yushĩ Pepatũ ea yunua hawa teama ẽ hatube kaya na seis nukubetã Jesus ikũwaĩbu ebe mapuabu ebe buriatãxinabuki. Hatube kai nawã hiwe anu nũ hikiaya 13hanushũ nawã nuku yuikĩ: “Ẽ hiwe anu ẽ hiwekẽ Deusũ nai tsuma betsa hushũ ea yuikĩ: ‘Ha mae Jope anu tsuara yunuwe, hau Simão Pedro mia ishũtanunã. 14Ha huni hushũ kakape mĩ hawẽ pashashanai mia inũ minabuya mia yusĩshanikiki’, ea wa ẽ mia kenaxinaki”, ea waya 15hanushũ Jesuskiri kakape ẽ hatu yusĩ taewaya Deusũ Yushĩ Pepa ha dukũ nuku anu huyama keskai habu anuri hushũ hatuki dasikĩ hatu atxixinaki. 16Hanushũ hatu haska waya haska bebũkiri nukũ Shanẽ Ibũ nuku yuibaini ẽ xinãxinaki: “Txanima Naximanika Joãonẽ henewẽ hatu naximakubaĩxinaki. Hakia Deusũ Yushĩ Pepatũ matu naxima keska wakĩ matu kuxipa washanikiki”, akĩ Jesusũ nuku yuibaini ikai ẽ uĩxinaki. 17Hanushũ nukũ Shanẽ Ibu Jesus Cristo nũ ikũwãyã hawẽ kuxipa nuku inãyama keska wakĩ ha nawabũri ikũwaĩbu Deusũ habiaskari waya eã haska washũ Deus ẽ nematiruma ixiãki— hatu wa

18Deusũ hatu haska waxina Jerusalém anua ikũwaĩbũ nĩkatã ana Pedro ha akama nesetã Deus kẽwãkĩ yuikĩ:

—Judeubuma dikabiwẽ nuikĩ hatu xinã betsa wamakĩ txanima Deusũ hatu hiwekuĩa inãriaikiki, ikibi imakinã. Pehairaki— anibukiaki.

Antioquia anushũ kaka pepa nĩkakĩ ikũwãnibukiaki, na hãtxarã

19Ha shabatiã Estêvão tenãtã habiatiãri dasibi Jesus ikũwaĩburi hatu itxakawai berukubaunaibuwẽ taea datei Fenícia mai pakea anu inũ, Chipre natukã anu inũ, Antioquia mae ewapanu pashai buimashũ judeubuma yusĩama hatunabu judeubu besti Jesuskiri kakape hatu yusĩaĩbũ 20hakia ha haskaibũ ikũwaĩ betsabu Chipre anuabu inũ Cirene mai pakea anuabu Antioquia anu bushũ Gregoburi Deusũ kakape Shanẽ Ibu Jesuskiri hatu yusĩrianibukiaki. 21Hanua habu Deusũ Yushĩ Pepatũ hatu kuxipa waya hatũ yusĩawẽ taeshũ Gregobu itxapabũ hatũ xinã sheni henetã hiwea bena nukũ Shanẽ Ibu Jesuskiri ikũwãnibukiaki.

22Hanua Antioquia anushũ judeubumã ikũwaĩbukiri Jerusalém anushũ ikũwaĩbũ hatu nĩkatã Barnabẽ hau hatu merabewatanũ yunuabu 23Barnabé kai hikixĩshũ habu Deusũ hatu duawakĩ hatu kuxipa wakĩ pepawai uĩ benimahairakĩ hatu ana yusĩ pewakĩ hau dasibi hawa txakabuyabi husiama nukũ Shanẽ Ibu Jesus ikũwaĩ txĩtuãma txibãkubaĩkĩ apakenũbũ hatu yusĩaĩ 24Barnabé huni pepa duapa Jesus ikũhairawamis Deusũ Yushĩ Pepatũ kuxipa hayakẽ hawẽ yusĩa nĩkai itxapabu nukũ Shanẽ Ibuki dasikubainibukiaki.

25Hatu haska watã tsube merabetima: “Hau Saulõ ea merabewayunũ”, ika Barnabé Tarso anu benai kaxiã 26Sauloki nukutã Antioquia anu iyui habe hari kaimashũ hatu yusĩkĩ ano bestitxai nitxĩkĩ yura itxapabu kaka pepa Jesus Cristokiri hatu yusĩkubainaibũ ha mae anushũ nawabũ Jesus ikũwaĩbu hatukiri xinãkĩ kenakĩ: “Naburã, habũ Cristo txibaĩbuki”, iwanã, hatu kena taewanibukiaki, nawã hãtxawẽ kenakinã, “Cristãos”, hatu wakinã.

27Ha haskaibutiã Deusũ hãtxa yuishunika betsabu Jerusalémkiria Antioquia anu bushũ 28betsa hawẽ kena Ágabo ikũwaĩbu itxabu anu hatu yuinũ ika benishũ Deusũ Yushĩ Pepatũ merabewakĩ hãtxamaya bebũkiri haskashanai hatu yuikĩ: “Mai hirabi anu piti hayama dasibibu bunihairashãkanikiki”, hatu wayama Roma maiwã anua Cláudio César shanẽ ibuhairaya haska Ágabõ hatu bebũkiri yuiyama haskanibuki. 29Haskaibũ Judéia anushũ ikũwaĩ nuitapaibu hatu merabewanũ, ishũ, yuinametã hatu pei itxawashũkĩ pei itxapayabũ itxapa inãkĩ eskarabes hayabũ eskarabes inãkĩ hatu itxawashũtã hanua 30Judéia anushũ ikũwaĩbu mekenikabu hau pei hatu habũ inãtanũbũ Antioquia anushũ ikũwaĩbũ Barnabé inũ Saulo katutã yununibukiaki.

Currently Selected:

Atos 11: cbsBR

Highlight

Copy