Markɛ̀n 2

Zhezü kɔrɛ ɔkpɔ̀cɔ-wrɔn tɔ̀n

(Nyɛ́n nyan Matie 9:1-8; mán Lükɛ̀n 5:17-26 wrú lɔ mɛ̀n)

1Ɛnvra jan vacì, Zhezü vru vá Kapɛrnahümɛ̀n, anwrɔn yá le nɛ̀n dú ɛbemɛ̀n. 2Fɛcüè vri tɔ̀n borɛkru kɩ ɛyri bàdà, ɛntrɛ mán eci-yri bàdà angbàtà-mùan. Zhezü ke yé yɔ Ɔwɔ ankà. 3Anwrɔn janbɔ̀ bɩ́ ɔkpɔ̀cɔ-wrɔn tɔ̀n léyi y'ɛmɛ̀n lɔ, anwrɔn anzɔ̀ wɔrɔ vá sɩ́ Zhezü. 4Tɛ́n yɔ sɩ́ cɔ́ ɛyri yá bɩ́ nɛ̀n yɔ yé Zhezü, fɛcüè kruhú. Zɛtɛn yɔ mrɛ́n ɛnlevri ɔwɔn wú, krɔn anwɔn mɛ̀n ɛyri léyi Zhezü yɛ́ nɔn; yɔ ci ɛnlevri lɔ, yɔ bɩ́ ɛhɛ́ yɔ mú ɛnkpà léyi ɛnlɔẅiɛ-wrɔn lɔ dɛ́ ɛwúɛ nɔn, yɔ hán nɛ̀n nɛ́n kàkɛ anwɔn mɛ̀n Zhezü zìwú. 5Ɛnvra léyi Zhezü kán anwrɔn ndɔ hɔ̀n lɔ y'ankàẅì-bùtan lɔ nɔn, nɛ dɔ́ ɛnlɔẅiɛ-wrɔn lɔ le: “M'ɛnẅì, v'ɛgbàn hɔ̀n lɔ bɩce mɛ́n.” 6Ɛnyànmàn-gbànvri-ankà-yé-bɔ̀ zrizri léyi dú nanvrɛn lɔ nɔn, ke tro y'ɛnbɔrɛmɛ̀n le: 7“Anhɔntan kɛ̂ ɔwrɔn ndɔ lɔ kɛ dɔ́ ankà kɛ́n Ɔwɔ ezìɛ? Antɔn de ẅɛn ɛgbàn-bɩce kɔrɛ̀levri nɛ́n? Ɔwɔ zri kɩ ẅɛn hɩ kɔrɛ̀levri lɔ!” 8Ɛnvra zri lɔ Zhezü nyri y'ankà-tro lɔ kɩ kɛ dɔ́ yɔ le: “Cɛci kruhú kɛ nyɛ ẅɛn ankà-tro ndɔ hɔ̀n lɔa? 9Ɛnjrɔ tán yɛ dɔ́ ɔkpɔcɔ-wrɔn lɔ le: ‘M'ɛnẅì v'ɛgbàn hɔ̀n lɔ bɩce mɛ́n’ kàle yɛ dɔ̀ le: ‘Tɔhú, bɩ v'ɛnkpà lɔ, nán esù hɛ̀’? 10Tɛ́n me ji nyɛ́n nyrì le Ɔwrɔnẅì ẅì ẅɛn ɛkɔrɛ̀srɔn, ɛnhibù wú ke le bɩ́ ɛgbàn kè ce.” Zɛtɛn Zhezü kɛ dɔ́ ɔkpɔcɔ-wrɔn lɔ le: 11“Mɛ dɔ́ mɛ́n, tɔhú, bɩ v'ɛnkpà lɔ hɔ̀n ɛbemɛ̀n!” 12Kpatakpata lɔ, tɛ́n anwrɔn lɔ fɛn kɛ nyan nɛ̀n, kɩ ɛnlɔẅiɛ-wrɔn lɔ tɔhú bɩ́ n'ɛnkpà kɩ hɔ̀n. Yɔ lɔ fɛn yɔ dú anvɛmɛ̀n-frɛ́n-mɛ̀n. Yɔ mrɛ́n Ɔwɔ kɩ yɔ dɔ̀ le: “Ɛnbì zriɛmɛ́n bɔ́ vá kán eci ndɔ ɔmu lɔ!”

Zhezü ke bi Levi

(Nyɛ́n nyan Matie 9:9-13; mán Lükɛ̀n 5:27-32 wrú lɔ mɛ̀n)

13Zhezü vru ɛmɛẅi hɔ́n Galile nɛnbà cɛ gbàtà mùan. Anwrɔn fɛcüè tɔ̀n hɔ́n cɔ́ nɛ̀n kɩ ne yé yɔ Ɔwɔ ankà. 14N'eciemɛ̀n lɔ, Zhezü kán Alfe ẅì, Levi, yɛ́ anmàn-wɔɛ̀n-yrɛ-wɔn mɛ̀n. Zhezü kɛ dɔ́ nɛ̀n le: “Kɛ́n mɛ̀n ɛsɛ̀n!” Levi tɔhú kɩ kɛ́n nɛ̀n ɛsɛ̀n. 15Zɛtɛn Zhezü zî ɛci Levi wɔn lɔ mɛ̀n. Anmàn wɔɛ̀n-yrɛ-bɔ̀ bobrebe mán anwrɔn hɔ̀n léyi yɛ krɛ́ ɛci-gbàngbàn-hán-bɔ̀, mán n'ɛsɛ̀nkɛn-bɔ̀ mɛhi yɔ yɛ́ tɛbrɛ̀ wú, Levi nanvrɛn ɛbemɛ̀n, yɔ zî ɛci; ɔmuhi anwrɔn ɔmu hɔ̀n léyi kɛ kɛ́n Zhezü ɛsɛ̀n nɔn, yɔ cüɛn. 16Kɩ ɛnyànmàn-gbànvri-ankà-yé-bɔ̀ léyi dú Ɔwɔ-nyànmàn-sùva-wá-bɔ̀ ɛmɛẅi nɔn, kán ɔmu le Zhezü mán ɛci-gbàngbàn-hán-bɔ̀ ke zî ɛci; yɔ dɔ́ n'ɛsɛ̀nkɛn-bɔ̀ le: “Cɛci kruhú kɛ Zhezü mán anmàn wɔɛ̀n-yrɛ-bɔ̀ mán anwrɔn hɔ̀n léyi yɛ krɛ́ ɛci-gbàngbàn-hán-bɔ̀ mɛhi ke zî ɛci ɛyri zriɛ?” 17Zhezü yá yɔ ɔmùan, kɩ nɛ dɔ́ yɔ le: “Anwrɔn hɔ̀n léyi ɛnlɔẅiɛ bàdà edomɛ̀n nɔn ke sɩ́ ji anháẅi-hán-wrɔn; ɛnlɔẅiɛ-bɔ̀ de ke ji anháẅi-hán-wrɔn nɔn. Mɛ̀n sɩ̀ và ɛnyrɔnnan-bɔ̀ kruhú, tɛ́n ɛgbàn-hán-bɔ̀ kruhú de mɛ́n và nɔn.”

Zhezü kɛ dɔ́ kìshe bɩ́ ankà

(Nyɛ́n nyan Matie 9:14-17; mán Lükɛ̀n 5:33-39 wrú lɔ mɛ̀n)

18Ɛnbì tɔ̀n Zhan Batisì sɛ̀nkɛn-bɔ̀ mán Ɔwɔ-nyànmàn-sùva-wá-bɔ̀ sɛ̀nkɛn-bɔ̀ ke bɩ́ kìshe. Zɛtɛn anwrɔn và ke yrɛ Zhezü le: “Ecitan kruhú kɛ Zhan Batisì sɛ̀nkɛn-bɔ̀ mán Ɔwɔ-nyànmàn-sùva-wá-bɔ̀ sɛ̀nkɛn-bɔ̀ ke bɩ́ kìshe, tɛ́n v'ɛsɛ̀nkɛn-bɔ̀ tɛn ke sɩ́ bɩ́ kìshe hɛ̀?” 19Zhezü mrɛ́n yɔ ɔmùan le: “Nye tro le anwrɔn hɔ̀n léyi ye bi eyrì ci-zîemɛ̀n nɔn ke le dú ɔmùanwúemɛ̀n ɛnvra léyi ɛnnyɔnwrɔn-nɛ́n-cüì mɛhi yɔ yɛ́ ɛci-zî tɛbrɛ̀ wúɛ nɛ́n? Annànwɔrɛ mɛ̀n lɔ hô! Ɛnvra lɔ fɛn léyi ɛnnyɔnwrɔn-nɛ́n-cüì mɛhi yɔ yɛ́ nɔn, yɔ sɩ̀ dú ɔmùanwúemɛ̀n. 20Tɛ́n ɛnvra kɛ lɛ và, ye le bɩ́ ɛnnyɔnwrɔn nɛ́n cüì yɛ sɔhɔ́; ɛnvra léyi ɛnbì ndɔ lɔ kɛ lɛ cɔ̀ nɔn, ɛnnyɔnwrɔn nɛ́n cüì sɛ̀nkɛn-bɔ̀ ke le bɩ́ kìshe.”

21“Ɔwrɔn zriɛmɛ́n ke sɩ̀ bɩ́ ɛcasa wrù kɛ wá ɛcasa gbànvri mɛ̀n kɛ̀ brɛ̀; ke dú kɛ nɛ hán ɔmu lɔ hô, ɛcasa wrù hɔ́ lɔ kɛ lɛ sàn shá ɛcasa gbànvri lɔ ke le sevri. 22Ɛnnyɔnwrɔn zriɛmɛ́n ke sɩ̀ bɩ́ ankùa wrù ke gboro ankùa cüɛ̀ mɛ̀n kɛ̀ gbrɛ̀. Ke dú kɛ nɛ hán ɔmu lɔ hô, ankùa lɔ ke sɩ̀ zrɔ. Ke ji le yɛ gbrɛ́ ankùa wrù lɔ ɔhɔnán, ô yɛ gbrɛ́ ankùa cüɛ̀ mán ɔhɔnán.”

Zhezü kɛ dɔ́ Ɔwɔ nyànmán-bì ankà

(Nyɛ́n nyan Matie 12:1-8; mán Lükɛ̀n 6:1-5 wrú lɔ mɛ̀n)

23Ɛnyanmánbì tɔ̀n de Zhezü mán n'ɛsɛ̀nkɛn-bɔ̀ ke ci dùdú kɛ̀tɛ̀ mɛ̀n. N'ɛsɛ̀nkɛn-bɔ̀ bukru kɛ voyan dùdú ɛnlevri mùan. 24Zɛtɛn ɛnyànmàn-sùva-wá-bɔ̀ kɛ dɔ́ Zhezü le: “Ɛ̀ nyan ecitan kruhú kɛ v'ɛsɛ̀nkɛn-bɔ̀ kɛ hán eci léyi ɛnyànmán-bì ke sɩ̀ nɛ́n?” 25Zhezü mrɛ́n yɔ ɔmùan le: “Nyɛ́n sɩ̀ krɛ̀ mrìmrì owrú léyi ye merɛ́n yɛ dɔ́ Davidɛ̀n mán n'anwrɔn hɔ̀n ankà, ɛnbì tɔ̀n léyi Davidɛ̀n ke ji ɛci-zî, ɔmuhi nɛ́n mumù mán n'anwrɔn hɔ̀n mɛhi ɔmùanwú kɛ ẅɛn yɔ nɛ́n? 26Davidɛ̀n bru Ɔwɔ-wɔn mɛ̀n kɩ rá ecice abùtùkumɛ́n lɔ. Hɩ vra lɔ Abiatarɛ̀n dú Ɔwɔ-cice-wrɔn cüìcüì. Bɔ́ ɛnyànmàn lɔ kɛ wá tán le ecice-bɔ̀ zri kɩ kɛ rá abùtùkumɛ́n ndɔ lɔ. Tɛ́n Davidɛ̀n bɩ́ abùtùkumɛ́n lɔ tán n'anwrɔn hɔ̀n rá.” 27Zhezü vru kɛ dɔ́ yɔ le: “Ɔwrɔnẅì anvrɛn kruhú de yɛ hán ɛnyànmánbì; ke sɩ̀ dù ɛnyànmánbì kruhú de yɛ hàn ɔwrɔnẅì nɔn. 28Hɩ le kruhú de Ɔwrɔnẅì ẅì dú ɛnyànmánbì nɛ́n zi nɔn.”

Currently Selected:

Markɛ̀n 2: ƐAA03

Highlight

Copy