Matie 8

Zhezü kɔrɛ kokove-lɔẅiɛ-wrɔn tɔ̀n

(Nyɛ́n nyan Markɛ̀n 1:40-45; mán Lükɛ̀n 5:12-16 wrú lɔ mɛ̀n)

1Zhezü dú ɛnkpò cɛ wú kakɛ kɩ fɛcüè bobrebe kɛ kɛ́n nɛ̀n ɛsɛ̀n. 2Zɛtɛn kokove-lɔẅiɛ-wrɔn tɔ̀n sɔnba ɛtɛ̀sɛ̀n, shɛ́n Zhezü ɛzìwú annankruemɛ̀n kɩ kɛ dɔ̀ le: “Ankà-yé-wrɔn, ke dú kɛ ɛ cüɛ̀n hô, ɛ lɛ hán mɛ̀n me le fì.” 3Zhezü trɛ́n ɛkɔrɛ̀ tɛ́ nɛ̀n, kɩ kɛ dɔ̀ le: “Mɛ́n cüɛ̀n, è fì!” Ɛnvra zri lɔ, ɔwrɔn lɔ ɛnlɔẅiɛ cɔhɔ́ edomɛ̀n kɩ nɛ́n fì. 4Zɛtɛn Zhezü kɛ dɔ́ nɛ̀n le: “È die nukù anvrɛnvrɛn: e bɩ́ dɔ́ ɔwrɔn zriɛmɛ́n ankà lɔ. Tɛ́n ɛ̀ hɔ̀n yé Ɔwɔ-wrɔn ɔmu le ɛ̀ kɔrɛ̀ e dù nɔn, zɛtɛn è ce eci kɛ̀ hán ɔmu le Mohizì wá tán, ô ye nyrì le ɛ kɔrɛ̀a.”

Zhezü kɔrɛ gɔliɛ-wrɔn tɔ̀n ci-bɩtan-wrɔn

(Nyɛ́n nyan Lükɛ̀n 7:1-10 wrú lɔ mɛ̀n)

5Ɛnvra léyi Zhezü bru Kapɛrnahümɛ̀n anmàn nɔn, Rɔmɛ̀n gɔliɛ-wrɔn cüìcüì tɔ̀n sɔnba Zhezü ɛtɛ̀sɛ̀n kɛ sán nɛ̀n ɛkɔrɛ̀-wá 6kɩ kɛ dɔ̀ le: “Ankà-yé-wrɔn, m'eci-bɩtan-wrɔn dɛ́ ɛbemɛ̀n, nɛ̀n dú ɔkpɔ̀cɔ mɛ̀n kɩ nɛ kán ɛgbàn bobrebe.” 7Zhezü kɛ dɔ́ nɛ̀n le: “Mɛ lɛ hɔ̀n mɛ̀n kɔrɛ nɛ̀n.” 8Tɛ́n gɔliɛ-wrɔn cüìcüì lɔ mrɛ́n ɔmùan le: “Ankà-yé-wrɔn, kè sɩ̀ krɔ̀n ɔmu le è bru m'ebɩ́ lɔ mɛ̀n. Tɛ́n ɛ̀ wá tán kɩ m'eci-bɩtan-wrɔn kɛ lɛ kɔrɛ̀. 9Mɛ́n mumù mán anwrɔn ẅɛn mɛ̀n kɩ mɛ̀n ẅɛn gɔliɛ-bɔ̀ dú m'ɛkɔrɛ̀levri wú. Mɛ dɔ́ ɛnzri le: ‘Hɔ̀n!’ Kɩ nɛ hɔ̀n; mɛ dɔ́ ɛnyàntɛn le: ‘Và!’ Kɩ nɛ và; kɩ mɛ dɔ́ m'eci-bɩtan-wrɔn le: ‘Ɛ̀ hán eci ndɔ lɔ!’ Kɩ nɛ hán.” 10Ɛnvra léyi Zhezü yá ankà ndɔ lɔ nɔn, nɛ̀n dú pɔ̀püɛ̀ mɛ̀n kɩ nɛ dɔ́ anwrɔn hɔ̀n léyi kɛ kɛ́n nɛ̀n ɛsɛ̀n nɔn le: “Mɛ dɔ́ nyɛ̀n annànwɔrɛ mɛ̀n le: mɛ vá cɔ́ ankàẅì-bùtan ẅɛ̀n ndɔ lɔ Izraɛlɛ̀n ɛnhi wú. 11Mɛ dɔ́ nyɛ̀n annànwɔrɛ mɛ̀n le, anwrɔn bobrebe ke le dú ɛmɛẅiemɛ̀n mán ezì kɛ lɛ và bɩ́ ɛyri tɛbrɛ̀ wú Anhobɩ́ nɛ̀ncüì-dúyri, yɔ mán Abrahamɛ̀n, Izaakɛ̀n mán Zhakɔbɛ̀n mɛhi. 12Tɛ́n anwrɔn léyi dú Anhobɩ́ nɛ̀ncüì-dúyri-bɔ̀ nɔn, yɛ lɛ kɔ́n yɔ cüe ɛntrɛa, ɛyri yɔwɔ mɛ̀n, nanvrɛn lɔ de yɔ le dú eyuwúemɛ̀n mán ɛnnyî-rá mɛ̀n nɔn.”

13Zɛtɛn Zhezü kɛ dɔ́ gɔliɛ-wrɔn cüìcüì lɔ le: “Ɛ̀ hɔ́n ɛbemɛ̀n, ankàẅì-bùtan léyi ɛ̀ ẅɛ̀n nɔn, kɛ lɛ tán mɛ́n eci léyi e ji nɔn.” Kɩ gɔliɛ-wrɔn ci-bɩtan-wrɔn lɔ cɔ́ ɔkɔrɛ̀ ɛnvra zri lɔ mɛ̀n.

Zhezü kɔrɛ ɛnlɔẅiɛ-bɔ̀ bobrebe

(Nyɛ́n nyan Markɛ̀n 1:29-34; mán Lükɛ̀n 4:38-41 wrú lɔ mɛ̀n)

14Zhezü hɔ́n Piɛrɛ̀n nanvrɛn ɛbemɛ̀n. Nɛ̀n cɔ́ Piɛrɛ̀n nɛ́n nɛnhi dɛ́ sofà wú, ɔwrɔ̀ dú edomɛ̀n. 15Zhezü ẅɛn ɛnnyɔnwrɔn lɔ ɛkɔrɛ̀ kɩ ɔwrɔ̀ cɔhɔ́ nɛ̀n edomɛ̀n; ɛnnyɔnwrɔn lɔ tɔhú, kɩ hán ɛci tán yɔ, yɔ zî.

16Ɛnvra léyi ɔwɔɛmɛ̀n ncɔ̀ nɔn, yɛ vá sɩ́ Zhezü anwrɔn bobrebe hɔ̀n léyi anhɛ́n gbàngbàn ke di ejüe edomɛ̀n nɔn. N'ankà-dɔ́ mɛ̀n Zhezü wrɔ́ anhɛ́n gbàngbàn ndɔ hɔ̀n lɔ kɩ nɛ̀n vru nɛ̀n kɔrɛ ɛnlɔẅiɛ-bɔ̀ lɔ fɛn. 17Zhezü hán eci ndɔ lɔ, ô Ɔwɔ-mùanwú-ankà-dɔ́-wrɔn Ezàhi ankà-dɔ̀ lɔ kɛ̀ sá nmù: “Nɛ̀n bɩ́ bɔ́ edomɛ̀n gbànkàn lɔ fɛn kɩ nɛ̀n bɩ́ bɔ́ ɛnlɔẅiɛ hɔ̀n lɔ fɛn nɛ̀n wɔrɔ.”

Anwrɔn hɔ̀n léyi ke ji kɛ̀ kɛ́n Zhezü ɛsɛ̀n nɔn

(Nyɛ́n nyan Lükɛ̀n 9:57-62 wrú lɔ mɛ̀n)

18Zhezü kán fɛcüè gbrɛnkɛn nɛ̀n ɔmùan; zɛtɛn nɛ̀n wá tán ye ci nɛnbà mɛẅi. 19Ɛnyànmàn-gbànvri-ankà-yé-wrɔn tɔ̀n sɔnba ɛtɛ̀sɛ̀n kɩ kɛ dɔ́ nɛ̀n le: “Ankà-yé-wrɔn, ɛyri lɔ fɛn léyi ɛ lɛ hɔ̀n nɔn, mɛ lɛ kɛ́n mɛ́n ɛsɛ̀n.” 20Zhezü mrɛ́n nɛ̀n ɔmùan le: “Kpekpe hɔ̀n ẅɛn ɛnnànmàn kɛ dɛ́ ɛmɛ̀n, kɩ annrɛn hɔ̀n ẅɛn anwɔn kɛ dɛ́ ɛmɛ̀n, tɛ́n ɔwrɔnẅì Ẅì kè sɩ̀ ẅɛ̀n ɛyri léyi nɛ lɛ dɛ́ ô nɛ̀n wrɔncüe nɔn.”

21Ɔwrɔn nyàntɛn tɔ̀n, léyi dú n'ɛsɛ̀nkɛn-wrɔn tɔ̀n nɔn, kɛ dɔ́ nɛ̀n le: “Ankà-yé-wrɔn, ɛ̀ tán mɛ̀n ɛkɔrɛ̀levri mɛ̀n hɔ̀n mɛ̀n bɩ́ dade léyi nwù nɔn.” 22Zhezü mrɛ́n nɛ̀n ɔmùan le: “Kɛ́n mɛ̀n ɛsɛ̀n ô è teze owú-bɔ̀ kè bɩ́ y'owú-bɔ̀.”

Zhezü kɛ́n ɔwràn tɔ̀n hɛ́n

(Nyɛ́n nyan Markɛ̀n 4:35-41; mán Lükɛ̀n 8:22-25 wrú lɔ mɛ̀n)

23Zhezü bru anhàka mɛ̀n kɩ n'ɛsɛ̀nkɛn-bɔ̀ hɔ́n sɩ́ nɛ̀n. 24Kpatakpata lɔ ɔwràn vri tɔ̀n tɔhú ke bɩ́ nɛnbà-cɛ wú, kɛ hán nɛnbà-fù ke ku anhàka lɔ mɛ̀n. Tɛ́n Zhezü kɛ di ndà. 25N'ɛsɛ̀nkɛn-bɔ̀ sɔnba nɛ̀n ɛtɛ̀sɛ̀n, fri nɛ̀n kɩ kɛ dɔ́ nɛ̀n le: “Ɛẅɛnwrɔn, bɩ́ bɔ̀ die! Bɔ́ le wù!” 26Zhezü mrɛ́n yɔ ɔmùan le: “Ecitan kruhú kɛ ɛnjansù ke zeze kɛ ẅɛn nyɛ̀n hàn? Nyàn ɔmuhi ankàẅì-bùtan cɛ nyɛ̀n ɛcɛ nɔn!” Zɛtɛn Zhezü tɔhú, ke fe ɔwràn mán nɛnbà-cɛ shi lɔ ɛshishiemɛ̀n, kɩ ɛyri lɔ fɛn sannyɔn. 27Yɔ lɔ fɛn yɔ dú anvɛmɛ̀n-frɛ́n-mɛ̀n kɩ yɔ dɔ̀ le: “Antɔn dú ɔwrɔn ndɔ léyi ɛndɔ̀nwrɔ̀n mán nɛnbà-cɛ-shi kɛ wá nɛ́n?”

Zhezü kɔrɛ anwrɔn anhyrɛ̀ léyi anhɛ́n gbàngbàn ke di ejüe nɔn

(Nyɛ́n nyan Markɛ̀n 5:1-20; mán Lükɛ̀n 8:26-39 wrú lɔ mɛ̀n)

28Ɛnvra léyi Zhezü cɔ́ nɛnbà-cɛ mɛẅi, Gadara kpɔsɔ wú nɔn, anwrɔn anhyrɛ̀ dú ezhe-nànmàn mɛ̀n srɔ ɛntrɛ kɩ ke ji nɛ̀n nvà. Anwrɔn anhyrɛ̀ ndɔ hɔ̀n lɔ anhɛ́n gbàngbàn ke di yɔ ejüe kɩ yɔ dú eci-gbàngbàn-hán-bɔ̀, hán tán kɩ ɔwrɔn zriɛmɛ́n ke sɩ́ ji kè ci ɛnlevri ndɔ lɔ wú. 29Anhɛ́n gbàngbàn hɔ̀n lɔ bukru ke di bobo kɛ dɔ̀ le: “Ankà tán e sɩ́ bɔ̀a, Ɔwɔ Ẅì? Ɛ vá ɛnu lɔ, ô ɛ̀ hán bɔ̀ ɛgbàn yakɛ ɛnvra léyi yɛ wá nɔn kɛ̀ cɔ̀a?”

30Nanvrɛn lɔ, gbrokò kà vri tɔ̀n nyɔn ɛyri buri, ke ji y'ɛci-zî. 31Anhɛ́n gbàngbàn hɔ̀n lɔ kɛ sɛ́n Zhezü, kɛ dɔ́ nɛ̀n le: “Ke dú kɛ e ji ɛ̀ wrɔ́ bɔ̀ hô, ɛ̀ hán bɔ̀ bɔ́ bru gbrokò kà ndɔ lɔ mɛ̀n.” 32Zhezü tán yɔ ɛkɔrɛ̀levri. Yɔ dú anwrɔn anhyrɛ̀ lɔ mɛ̀n kɩ yɔ srɔ ɛntrɛ. Yɔ ku gbrokò hɔ̀n lɔ mɛ̀n. Kpatakpata lɔ gbrokò kà lɔ fɛn dú ɛnkpò wú trɛ́n ku nɛnbà-cɛ lɔ mɛ̀n, kɩ yɔ wù. 33Anwrɔn léyi kɛ nán gbrokò hɔ̀n lɔ nɔn srɛ́; yɔ hɔ́n anmàn kɩ yɔ dɔ́ anwrɔn, eci léyi yɔ kàn mán eci léyi wɔɛ́n anwrɔn anhyrɛ̀ léyi anhɛ́n gbàngbàn ke di ejüe nɔn. 34Zɛtɛn anmàn-bɔ̀ lɔ fɛn srɔ ɛntrɛ ke ji Zhezü hɔ̀n; ɛnvra léyi yɔ kán nɛ̀n nɔn, yɔ sɛ́n nɛ̀n, nɛ̀n cɔhɔ́ yɔ kpɔsɔ lɔ wú.

Currently Selected:

Matie 8: ƐAA03

Highlight

Copy