Lükɛ̀n 15

Kɔ̀kɔ̀sɛ̀ léyi zrɛ́n, hɩ yɛ cɔ̀ nɔn, nɛ̀n nyandrɛn mɛ̀n ankà-dɔ̀

(Nyɛ́n nyan Matie 18:12-14 wrú lɔ mɛ̀n)

1Anmàn-wɔɛ̀n-yrɛ-bɔ̀ mán anwrɔn hɔ̀n léyi yɛ krɛ́ eci-gbangbàn-hán-bɔ̀ nɔn, kɛ vá yɔ lɔ fɛn Zhezü ɛtɛ̀sɛ̀n ô kè die nɛ̀n nukùɛ. 2Ɔwɔ-nyanmàn-sùva-wá-bɔ̀, mán ɛnyanmàn-gbànvri-ankà-yé-bɔ̀ ke bɩ́ ɛmɛ̀nhyì kɩ kɛ dɔ́ y'edomɛ̀n le: “Ɔwrɔn ndɔ lɔ kɛ cüɛn ɛci gbangàn-hán-bɔ̀, kɩ yɔ mɛhi yɔ zî ɛci!” 3Zɛtɛn Zhezü ci nyandrɛn ndɔ lɔ mɛ̀n kɛ dɔ́ yɔ le: 4“Ke dú kɛ ny'ɛmɛ̀n lɔ ɔwrɔn tɔ̀n kɛ ẅɛn kɔ̀kɔ̀sɛ̀ ɛkoẅi-ɛnrì, kɩ nzri ke dú ɛmɛ̀n kɛ zrɛ́n, nɛ́n sɩ̀ teze kɔ̀kɔ̀sɛ̀ ndɔ hɔ̀n lɔ, ɔkɔ̀ mɛ̀n, ô nɛ̀n hɔ̀n nɛ́n ji nzri léyi zrɛ́n nɔn, hàn mán kɛ krɔn ɛnvra léyi nɛ lɛ cɔ́ yi nɛ́n? 5Kɩ ɛnvra léyi nɛ cɔ́ yi nɔn ne dú pɔ̀püɛ̀ mɛ̀n, ne di yi anbɔ̀n. 6Ne bru ɛbemɛ̀n, kɩ ne bi nɛ́n nyrán hɔ̀n nɛ dɔ́ yɔ le: ‘Nyɛ́n brá pɔpüɛ̀, ɔmuhi mɛ̀n cɔ́ mɛ́n kɔ̀kɔ̀sɛ̀ zri léyi zrɛ́n nɔn!’ 7Ɔmu zri lɔ mɛ dɔ́ nyɛ̀n, pɔpüɛ̀-brà ke le dú anhobɩ́ ke le sevri kɛ̀ tán ɛgbàn-hán-wrɔn zri léyi bú ɛwúvà ɛnkru, kɛ lɛ vrán anwrɔn ɛkoẅi-anzɔ̀ mán ɛẅì ɔmɔ̀rɔ̀ léyi zrɔ ndù nɔn.”

Ɔkùa ẅì léyi zrɛ́n, hɩ yɛ cɔ̀ nɔn

8“Kale, ke dú kɛ ɛnnyɔnwrɔn tɔ̀n kɛ ẅɛn ɔkùa ẅì ɛvà, kɩ nzri ke dú ɛmɛ̀n kɛ zrɛ́n, nɛ́n sɩ̀ dɔ́n kɛniɛn, nɛ̀n taka anwɔn mɛ̀n, nɛ̀n ji ɔkùa ẅì lɔ hàn mán nɛ̀n cɔ̀a? 9Kɩ hɩ vra léyi nɛ cɔ́ ɔkùa ẅì lɔ nɔn, ne bi nɛ́n nyrán hɔ̀n kɩ nɛ dɔ́ yɔ le: ‘Bɔ̀ brá nyɛ̀n pɔpüɛ̀, ɔmuhi mɛ̀n cɔ́ m'ɔkùa ẅì léyi zrɛ́n nɔn!’ 10Ɔmu zri lɔ, mɛ dɔ́ nyɛ̀n, pɔpüɛ̀-brà dú Ɔwɔ-kuyüre-bɔ̀ mɛ̀n, ɛgbàn-hán-wrɔn zri léyi bú ɛwúvà wrù ɛnkrú nɔn n'ɛkruhú.”

Ɛnẅì léyi zrɛ́n hɩ yɛ cɔ̀ nɔn

11Zhezü vru kɛ dɔ̀ le: “Ɔwrɔn tɔ̀n ẅɛn wúcɔ̀-ẅì hɔ̀n anhyrɛ̀. 12Ɛcɛ lɔ kɛ dɔ́ nɛ́n zi le: ‘Dade, tán mɛ̀n ɛci léyi dú m'anja-ci nɔn.’ Kɩ ɛnẅì-nɛ́n-zi dɛ́ ɛci tán n'ɛẅì hɔ̀n anhyrɛ̀ lɔ. 13Ɛnvra cá mɛ̀n kɩ ɛnẅì cɛ lɔ, hɛ́ n'ɛkɛtɛ̀ lɔ, bɩ́ n'ɔkùa hɔ́n ɛyri she ɛnhi wú anmàn tɔ̀n. Nanvrɛn lɔ, nɛ̀n dú ɛwúvà gbàngbàn-ẅɛn mɛ̀n kɩ nɛ̀n jrɛ́ n'ɔkùa lɔ fɛn. 14Ɛnvra léyi, ɔkùa trɔ nɛ̀n antamɛ̀n nɔn, ebrè vri tɔ̀n kɛ́ anmàn léyi nɛ́n dù nɔn, kɩ ɛci bukru kɛ ẅɛn nɛ̀n ɛmiàn. 15Nɛ́n hɔ̀n nɛ́n bru anmàn-wrɔn tɔ̀n kɔhɔ́n mɛ̀n, kɩ ye sɩ́ nɛ̀n ankɛ̀tɛmɛ̀n, nɛ nán gbrokò. 16Nɛ cüɛ́n ɔmu le, nɛ̀n zî antɛ̀-ẅì léyi gbrokò hɔ̀n kɛ rá nɔn, kɩ ɔwrɔn zriɛmɛ́n ke sɩ́ tán nɛ̀n yi ci lɔ. 17Zɛtɛn nɛ̀n bukru ne tro ankà n'ɛwúvà lɔ wú kɩ nɛ dɔ́ n'edomɛ̀n le: ‘Dade kɔhɔ̀n-hán-bɔ̀ lɔ fɛn ẅɛn ɛci zî fɛ ɛwú. Kɩ mɛ tɛn, ɛnu lɔ ɔmùanwù ke ji kè wri mɛ̀n. 18Me le vru ɛmɛẅi mɛ̀n hɔ̀n cɔ́ Dade, kɩ mɛ lɛ dɔ́ nɛ̀n le: Dade, mɛ̀n hán ɛgbàn Ɔwɔ yri mán v'eyri. 19Mɛ̀n sɩ̀ krɔn ɔmu le, á bɩ́ mɛ̀n ɛ̀ hán v'ɛnẅì, tɛ́n è bɩ́ mɛ̀n ɛ̀ srɔ v'ɔkɔhɔ̀n-hán-wrɔn tɔ̀n.’ 20Kɩ nɛ̀n bru ɛnlevri nɛ wrɔ́ nɛ́n zi hɔ̀n. Nɛ̀n dú esù she kɩ nɛ́n zi kán nɛ̀n, ɛnhyɔ̀bɔ̀ cɔ́ nɛ́n zi; nɛ́n zi srɛ́ hɔ́n brɛ́ nɛ̀n nmù, wá nɛ̀n angbàmɛ̀n. 21Zɛtɛn ɛnẅì lɔ kɛ dɔ́ nɛ́n zi le: ‘Dade, mɛ́n hán ɛgbàn Ɔwɔ yri mán v'eyri, mɛ̀n sɩ̀ krɔn ɔmu le á bɩ́ mɛ̀n ɛ̀ hán v'ɛnẅì nɔn.’ 22Tɛ́n ɛnẅì-nɛ́n-zi kɛ dɔ́ n'eci-bɩtan-bɔ̀ le: ‘Nyɛ́n kpramàn nyɛ́n bɩ́ ɛceci fifi nyɛ́n cɔ́ nɛ̀n; nyɛ́n wá nɛ̀n kpɛ̀trɛva ɛtiɛ, nyɛ́n wá nɛ̀n annanwrú. 23Nyɛ́n bɩ́ ɛnzhi-wá-nanmán lɔ nyɛ́n wrì, bɔ̀ koran, 24ɔmuhi, m'ɛnẅì léyi nyɛ kàn nɔn nwù, kɩ nɛ̀n vru nɛ̀n vá ɔkɔrɛ-bɔ̀ mɛ̀n, nɛ̀n zrɛ́n kɩ mɛ̀n cɔ́ nɛ̀n.’ Kɩ ɔkoran bukru. 25Hɩ vra lɔ, ɛnẅì cüìcüì lɔ dú ankɛ̀tɛmɛ̀n. Ɛnvra léyi nɛ̀n dú ovomɛ̀n nɛ vá ɛbemɛ̀n nɔn, nɛ̀n cɔ́ ɔwɔn tɛsɛ̀n kɩ nɛ yá ɛcɔ̀-krɛ̀ bobo mán ɛmràn-brì. 26Nɛ̀n bi eci-bɩtan-wrɔn tɔ̀n kɩ ne yrɛ yi eci léyi yɛ hán ɛbemɛ̀n nɔn. 27Eci-bɩtan-wrɔn lɔ mrɛ́n nɛ̀n ɔmùan le: ‘Ɔmuan-ẅì vru và, kɩ e zi hán yɔ ye wri ɛnzhi-wá-nɔn lɔ, ɔmuhi ɔmuan-ẅì dú ɔkɔrɛ-bɔ̀ mɛ̀n nɔn.’ 28Zɛtɛn ɛnẅì cüìcüì lɔ bɩ́ ɛmɛ̀nhyì, kɩ ke sɩ́ ji kè bru ɛbemɛ̀n. Nɛ́n zi srɔ ɛntrɛ ô kɛ̀ hán nɛ̀n nɛ̀n bru ɛbemɛ̀n. 29Tɛ́n ɛnẅì lɔ kɛ dɔ́ nɛ́n zi le: ‘È die Nukùɛ! Ɛnnànwàn bobrebe de me bɩ́ eci tán mɛ́n, kɩ mɛ vá fɔndɔ̀n v'ɛnyanmàn zriɛmɛ́n mrìmrì. Ɔmu tɛ̀kɩ è sɩ̀ tán mɛ̀n, ɔnɔn-ẅì zriɛmɛ́n, ô mɛ̀n mán annyran hɔ̀n mɛhi bɔ̀ koran. 30Tɛ́n ɛnvra léyi, v'ɛnẅì léyi nyɔn nɔn, vru và nɔn, nɛ́n léyi nɛ̀n jrɛ́ v'ɔkùa lɔ fɛn, nɛ́n mán wɔẅíe-wúyɔ̀ mɛhi, n'ɛkruhú, ɛ̀ hán yɔ ye wri ɛnzhì-wa-nɔ̀n léyi bɔ̀ hɛ́n nɔn.’ 31Nɛ́n zi kɛ dɔ́ nɛ̀n le: ‘M'ɛnẅì, è dú mɛ̀n ɛtɛsɛ̀n ɛnvra lɔ fɛn, kɩ ɛci hɔ̀n lɔ fɛn léyi mɛ́n ẅɛ̀n nɔn, dú vɛ́n mán vɛ tɛn. 32Tɛ́n, ke ji le bɔ̀ brá pɔ̀püɛ̀, bɔ̀ koran, ɔmuhi ɔmuan-ẅì léyi nyɔn nɔn, nwù kɩ nɛ̀n vru nɛ̀n vá ɔkɔrɛ-bɔ̀ mɛ̀n, nɛ̀n zrɛ́n kɩ mɛ̀n cɔ́ nɛ̀n!’ ”

Currently Selected:

Lükɛ̀n 15: ƐAA03

Highlight

Copy