San Marcos 3
3
1Pa yich'ôcji shta ja vatvanqu'eyjatsjanjavat ja Jesús; pa lhech yie' ja nivacle t'unch'e ja t'ituuc. 2Chiyclôvalhtajesh pa nalhu ti chit'ichay ca nivatsjanchat shta jô lhech nivacle, lhayaash ti chi'vo'taje'meyjop pa ca natmeneshlhavach ja Jesús. 3Pa yiyôjaa ja Jesús jô lhech nivacle t'unch'e ja t'ituuc pa yit'esh:
—Aneetsham ca avatsavatyijop.
4Pa t'ajuya japi yicôfachi pa niyôsesh ti yit'esh:
—¿She t'e pa chiyvashanem ca nalhu ti chit'ichay, pa is ja't'ajesha pa niysa'? ¿Ca chinalhjeneem t'e papu pa lhamônlhajayash, ja't'ajesha t'e ca chinclôn?
Pa ninculhch'e japuqueey. 5Pa lhechesh pa vanut ja Jesús ti yovalhsha'ne pa ninc'usinat'in shta ti nintôyc'oya ts'ivee ti lhech lhfanishesh, pa yiyôjaa jô lhech nivacle:
—Atsôôtjat na atuuc.
Pa lhet lhfanishesh pa vatsjan ja t'ituuc pa lhjunashvatjulh java t'itjuy. 6Meelh ti tay'ôcji japi fariseos ja vatvanqu'eyjatsjanjavat pa yichey japi tatvenchatesh ja Herodes, pa vatpeya'tajesh pa ca lhfanisheesh ca niclôn ts'ivee.
Acloj papi nivacle yie' lhavôôj pa uj lhjôvcha
7Lhan'e ja Jesús shi' japi t'eyjatsjanjas vapecleylhach'e ja uj lhjôvcha, pa acloj japi voqu'e' vatich'e tô'lha ja Galilea. 8Jap'elh tôlhey shta ja Judea, ja Jerusalén shi' ja Idomea, jô'tajesh japi tôlheypacham ja Jordán shi' japi nashch'elhavôôj ja Tiro shi' ja Sidón. Acloj japi lhech nacheyvatich'e ja Jesús, lhayaash ti yaya'esh pa lhfanishlhavach. 9Pa yiyôjaa ja Jesús japi t'eyjatsjanjas pa yit'esh:
—Atatômjalheshelh lha ôvjatshi ama lhapesh ca nascôt'at napi nivacle. 10Lhayaash ti lhapa acloj japi yivatsjanchat, vatjucjeeyshi lhacôm'a japi nicha'vaylhataysha'ne ca nit'ajaya atesha ja Jesús.#3.9-10 Mr 4.1; Lc 5.1-3.
11Meelh ti yi'van japin yi'shi' pava tsich'es pa nicôt'ey t'ajuyish pa tafshiych'e pa yit'esh:
¡A'lhech a Dios Lhaôs!
12Jô'lhaa ti nijovatsjan jum ja Jesús pava lhech tsich'es ca ya aj ca ninôôclhanita.
Pa Jesús vooyshi papi doce t'eyjatsjanjas
(Mt 4.1-4; Lc 6.12-16)
13Pa nijooylha ti yich'apee lhja utiyuc pa tôney jant'ajôôj japi vooyshilhatam, pa yicheyvatich'e ts'ivee. 14Pa lhechesh pa yivenchat japi doce, japi lhech yit'esha ca mônlhaajop jayu nava nalhus, secl'esh ca'na nicheneshi cava Dios lhasinôc ca nivanqu'eyjatsjanesh; 15jô'tajesh shta ca nicaajop pa t'unaj ca nivatsjanchatsha'ne papi aôytesvatsham'in shi' shta ca nisa'semfach'ee pava tsich'es. 16Lhech japuque doce vooyshilhatam: Vooy ja Simón, lhqueyesh shta Pedro; 17vooy ja Jacobo, ja lhaôs ja Zebedeo, shi' ja lhch'inish Juan, japi lhech lhqueyesh Boanerges, (côque lhanquey “Cuucten Lhcles”); 18vooy ja Andrés, ja Felipe, ja Bartolome, ja Mateo, ja Tomas, ja Jacobo ja lhaôs ja Alfeo, ja Tadeo, ja Simón Cana lhavo', 19pa nôquee ja Judás Iscariote, jô lhech ti vanc'ôyanjaney ja Jesús.
Chinôôlhjônchatesh pa Jesús ca nicaajem pa t'unaj pa tsich'e'
(Mt 12.22-32; Lc 11.14-23; 12.10)
Meelh ti yamelhey ja Jesús japi t'eyjatsjanjas ja lhajpôyich, 20pa tayeshva'ne shta japi acloj nivacle, pa ni'nan'ateesh cum ts'ivee ca natsaccun. 21Meelh ti tpeeycheyesh japi lhavelhavot ja Jesús, pa yichey pa yayjatajop, lhayaash ti yilheclôjtajesh ca coccheyech'eesh.
22Japi vanqu'eyjatsjanesh pava lhfanishlhavach, tôlhey ja Jerusalén, yit'eshvatsham'in:
—“Yi'shi' jayu pa Belzebú, lhech tôlhesha pa t'unaj pa lhanvacle pava tsich'es, lhe'naa ca nisa'seshfach'ee pav'elh tsich'es.”#3.22 Mt 9.34; 10.25.
23Pa lhechesh pa tôney ja Jesús pa yit'eshajop pava yovalhemeyjop atesha pa yit'esh:
—¿Ta t'e lhjunash jayu ca nisaasfach'ee ja Satanás jaelh Satanás? 24Nan lhjunash pa ve'lha lhcaanvacle ti yicatsônjat papi lhcavos pa t'ajuyvatjulh ti vatclônsha'ne, pa lhechesh pa ampa t'unaja pa lhcaanvacle. 25Nan lhjunash shta papi yishan'ôcji pa lhajpôyich ti ve'lhatajsham ti vanicats'ônjat pa ampa t'unaja shta. 26Nanlhjunash shta ja Satanás ca nic'aclaneshlhatam pa t'unaj, pa nôque lhjunashtaja ca nivatvômjatshi jô lhech.
27“Ampapu ca isaemjop ca nuy'ôcji pa lhajpôyich pa nivacle t'un'in ca chinanjôclesh pava lhavanjas, ca nichinôcfaac'oya cum, ca lhech lhanfanasha pa isjop ca chinanjôclesh.
28“Yijô' ti jayeetshelh'a ti isjop ca chinvômjatemch'e pava lhsasch'e napi nivacle, lhacôm'a shta pava yit'esh'in niysisa; 29taj ti ca neyimatantaj na Espíritu Santo tanca ve'lhaaesh ca chinvômjatemch'e, lhayaash ti yanlhatam ti ôyjôlhôyech'esh ti lhsasch'eesh.”#3.29 Lc 12.10.
30Lhech t'ônasha ja Jesús, lhayaash ti yit'esh ts'ivee ca nôvji' pa tsich'e'.
Lhpa lhamimi pa Jesús shi' papi lhch'injavot
(Mt 12.46-50; Lc 8.19-21)
31Pa nijooylha ti yamey shta lhja lhamimi shi' japi lhch'injavot, japi lhech tayôjijanesh ja Jesús ca ninacheyfach'ee cum. 32Pa nifaclem japi nivacle t'afaych'elhavôôj ja Jesús pa yit'esh:
—Yi'fach'ee lhôn lhja amimi shi' japi ach'injavot, tay'ôtsjan'ash'in lhôn.
33Pa yicuulh ja Jesús pa yit'esh:
—¿She t'e lhpa mimiesh shi' papi yich'injavot'esh?
34Pa lhechesh pa yovalhsham japi t'afaych'elhavôôj pa yit'esha:
—Napuque mimiesh, napuque yich'injavot'esh shta. 35Lhayaash pan yie' papu ti t'ujanesh ja Dios, lhech ti yich'inishesh, yich'injôesh, mimiesh shta.
Chiyovalheyjop atesha papu tcôvjiyanjan
(Mt 13.1-9; Lc 8.4-8)
Currently Selected:
San Marcos 3: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
