San Mateo 25

Pa chiyovalheyjop atesha papi diez lhutsjayech

1“Ja lhanvacleyash ja Dios lhjunashjulh papi diez lhutsjayech. Papi lhech t'acum'e ts'ivee pava lhavitôtas pa yichjuulh pan tjayaay jayu jaspa nitônôycheelh.*xr* 2Cinco papi lhech papi ninatcajôyshaysha'ne ninvaclhitlhavach. Cinco shta papi tcajôyshaysha'ne yivaclhitlhavach. 3Papi ninatcajôyshaysha'ne yichaaj pava lhavitôtas, taj ti nincha'jesh pa t'i' ca nôtsiych'e ti yimshi'. 4Vooy papi tcajôyshaysha'ne yichaaj pava lhavitôtas, pa yicha'jesh shta pava t'ic. 5Pa cletc'oya ca nam pan tjayaay jayu, pa nimôjayuqu'esha'ne pa jaalhpa yimôqu'esha'ne. 6C'oya ti yama ti jonshajesh, pa chiypeya' ti yisitsenesh ti yit'esh: ‘¡Nam nan tjayaay jayu; istaa ca meelhjulh!’ 7Pa nitshamch'e lhacôm'a papi lhutsjayech pa yisclansha'ne pava lhavitôtas. 8Yit'esha papi cinco ninatcajôyshaysha'ne pap'elh cinco tcajôyshaysha'ne: ‘Anjuteelhyi vitsha pa tiqu'in t'i', lhayaash ti yimac nava yivitôtaselh.’ 9Taj ti yit'esh ti yicuulh papi lhutsjayech tcajôyshaysha'ne: ‘Am, ca yijutelh'ay pa tanca shtajulhsham. Istaa ca meelhey jan yie' ca acashayelha avaatsheelh.’ 10C'oya ti yich'in papi cinco lhutsjayech ninatcajôyshaysha'ne ti tcashayey pa itôtaj t'i', pa lhechesh pa nam pan tjayaay. Papi lhutsjayech, papin apis ti yivaclhitesh ti vataascalnsha'ne, pa yichelh'ôcji vatjuulh papin tjayaay, pa chiyp'oey pa lhashi. 11Pa lhechesh pa nam shta pap'elh lhutsjayech, pa yit'esha ts'ivee: ‘¡Lhcaanvacle, Lhcaanvacle, anc'at'eelhyic'oya!’ 12Taj ti yicuulh pa lhech pa yit'esh: ‘Yijô'taj teya ti ninastôfaclelh'ash.’#25.1 Lc 12.35.,#25.11-12 Lc 13.25.

13Pa lhechesh pa yit'esh ja Jesús:

—“Istaa ca avôntôyitelh'in, lhayaash ti ninatô'yelha pa nalhu shi' shta pa ca t'aplhutajac'oya ca namtaj jayu na Nivacle Lhô'sesh.

Pa chiyovalheyjop atesha pava tinshanjay ti uj ti tashaay

(Lc 19.11-27)

14“Ja lhanvacleyash ja Dios lhjunashjulh pa nivacle ti yichey peelh cotsjaat, pa tôney papi lhcavos pa yiclôvalhchiyinesh pava lhpesoc.

15Pa ve'lha lhcavo yijutey ve'lhanôjesh pava mil pesoc. Vooy peelh pava napu'qu'e mil; vooy peelh ve'lhach'e mil, lhayaash ti nilhjunashavatjulh pa lhcajôysha. Pa lhechesh pa yich. 16Pa vatcavo pan chiyjutey pava ve'lhanôjesh mil pesoc, yichesh pa yashjat'apeeen ti tcashayesh'in, pa ve'lheesh yaash pav'elh ve'lhanôjesh mil pesoc. 17Pa lhech lhjunashesh peelh vatcavo pan chiyjutey pava napu'qu'e mil, yaash shta pav'elh napuqu'e mil. 18Taj ti peelh vatcavo pan chiyjutey lhpa ve'lhach'e mil, yichesh pa tishc'oya pa yip'oe pa lhpeso pa lhcaanvacle.

19“Acloj pava nalhus pa tapecley pa lhanvacle papi lhcavos, pa yitsjulhch'e pava vancaclôvalhchiyinesh. 20Pa nam pa vatjutsa ti chiyjutey pava ve'lhanôjesh mil pesoc. Pa yijutey pa lhcaanvacle pava lhpesoc, pa yijutey shta pav'elh ve'lhanôjesh mil pavan chiyashjat'apee, pa yit'esha: ‘Lhcaanvacle, lhanjutyiy java ve'lhanôjesh mil, taj ti caaj shta nav'elh ve'lhanôjesh mil nava c'ashjat'am.’ 21Pa yit'esh pa lhcaanvacle: ‘Tajulhey ti a is yicavo; t'ôfisjach'eyam nava napu'qu'e, pa c'aclôvalhchiyinesh jav'elh aclojqu'e. Istaa ca anach'ôcji ca shtavatc'usinat'in.’ 22Pa nam shta pa vatcavo pan chiyjutey pava napu'qu'e mil pesoc, pa yit'esha: ‘Lhcaanvacle, lhanjutyiy java napu'qu'e mil, taj ti caaj shta nav'elh napu'qu'e mil nava c'ashjat'am.’ 23Pa yit'esh pa lhcaanvacle: ‘Tajulhey ti a is yicavo; t'ôfisjach'eyam nava napu'qu'e, pa c'aclôvalhchiyinesh jav'elh aclojqu'e. Istaa ca anach'ôcji ca shtavatc'usinat'in. 24Pa nam shta peelh vatcavo pan chiyjutey pa ve'lhach'e mil peso, pa yit'esha pa lhcaanvacle: ‘Lhcaanvacle, tsitôy'a ti nat'un'in, lht'ovôseshch'e na niacôvjiyanach'a lhant'ôqu'e nava niasichatch'e. 25Nôquen lhayaash jôquesh pa jatishc'oya lha apeso. Taj ti navôque natsôt'ajesh.’ 26Pa yicuulh pa lhcaanvacle pa yit'esh: ‘Av'ojey yicavo, naancumjayuin, natô'yish ti jat'ovôseshch'e na niycôvjiyanach'a, shi' ti jantôqu'e' nava niysichatch'e. 27Nôquen lhayaash tajulhtajey ca an'e' lha yipeso yiey pa chiyan'e'in pava pesoc. Nôqueesh jatpec jayeetajesh ca yi'van nava tsitsôt'ajesh pesoc shi' pav'elh ca ashjatyam.' 28Pa yit'esha papin lhech yie': ‘Anjôcleshelh lhja ve'lhach'e mil peso pa ajutelhey papu caajem pava diez mil. 29Lhayaash papu ti p'alha ti caajem pa chiyjutey jayu shta peelh; lhan'e vitsha papi amemc'oya pa chinjôclesh jayu pa tiqu'in yi'tajjop.*xt* 30Taj ti nôque yicavo ojey, achajelheyfach'ee na tulh'e', pa lhech nôv'e' ca nitafshiy'in pa nijuujvatjulh shta.'*xu* #25.29 Mt 13.12; Mr 4.25; Lc 8.18.,#25.30 Mt 8.12; 22;13; Lc 13.28.,#25.14-30 Lc 19.11-27.

Chiyisclanch'e jayu lhacôm'a papi yiey na cotsjaat

31“Meelh ca namtaj jayu na Nivacle Lhô'sesh jan lhjunash ja uj Lhcaanvacle, pa tanaôycheelh jayu lhacôm'a japi lh'ángeles, pa yiesha'ne jayu ja lhc'o'vat lhasnôyech.*xw* *xx* 32Pa lhacôm'a jayu papi yiey na cotsjaat ca tc'aeva'ne t'ajuyish. Pa lhecheesh pa nicatsônjat jayu lhacôm'a, jan lhjunash ja tashinshtaj lhavo' ti yivenchat java tashinshtas shi' java tashinshtaychey. 33Pa yiney lhfayish jayu pava tashinshtas, pa vooy pava tashinshtaychey pa yiney lhch'amiyish. 34Pa lhecheesh pa yit'esha jayu ja Lhcaanvacle japi yiey lhfayish: ‘Anachelhyiy napin yit'esha pa is ja Tata; pa acumelhjulh na lhanvacleyash nan yivenchatelh'am lhapesh ti nich'a yisnatesh na Dios nôque cotsjaat. 35Lhayaash ti ts'iyipcun lhapesh, pa lhanjuteelhyiy pa vatôc. Vooy ti ts'iyôjayu pa lhasyôjayanelh. Jayôtaysha'ne jan lhjunash papu ti nintôntôfacliy, taj ti lhanjuteelhyiy java jajo'e.*xy* 36Ampava yuyjatshiyisa, vooy avaatsheelh lhanjuteelhyiy. Ya aôytej'in, taj ti lhanjôchielhyiy. Tsitsicha'jey lhja vatvanc'ôcfajayte vooy avaatsheelh lhnachelhyiy pa lhasvaneelh.'*xz* 37Pa lhechesh pa yit'esh jayu papi yivo'yeshch'e: ‘Lhcaanvacle, ¿ta t'elhesh ti c'avanelh ti nayipcun, pa jajutelh'ay pa vatôc? ¿Ta t'elhesh ti c'avanelh ti lhanyôjayu, pa c'ayôjayanelh? 38¿Ta t'elhesh ti c'avanelh ti ajunashjulh papu nintôntôfacliy, pa jajutelh'ay pa lhjo'e, shi' ti ampava uyjatshiyisa, pa jajutelh'ay? 39¿Ta t'elhesh ti c'avanelh ti aaôytej'in, shi' ti chinacha'jey lhpa vatvanc'ôcfajayte ti jôquelh'ay ti c'avanelh?' 40Pa yicuulh jayu ja Lhcaanvacle pa yit'esh: ‘Yijô' ti jayeetshelhaam, lhacôm'a pava lhasnatshem papi yivelhavot ti ts'aclaaysha'ne pava lhech lhasnatshelhyam.’ #25.31 Mt 16.27.,#25.31 Mt 19.28.,#25.35-40 Ez 18.7.,#25.36 He 13.3.

41“Pa lhecheesh pa niteetsha jayu ja Lhcaanvacle japi yiey lhch'amiyish: ‘Meelh'in, lhayaash ti chinapofiyuelh; pa meelhey pa itôj ninmac pa cat'elheesh, jô lhech t'ajuya ja tsich'e' shi' japi lh'ángeles. 42Lhayaash ti ts'iyipcun, taj ti tanca anjuteelhyiy pa vatôc. Ts'iyôjayu, taj ti tanca asyôjayanelh. 43Jayôtaysha'ne jan lhjunash papu ti nintôntôfacliy, taj ti tanca anjuteelhyiy pava ca yijo'e. Ampava yuyjatshiyisa, taj ti avaatsheelh tanca anjuteelhyiy. Ya aôytej'in, pa jôv'e' shta lhja vatvanc'ôcfajayte, taj ti tanca anachelhyiy ca jaspa asvaneelh.' 44Pa lhecheesh pa yit'esha ts'ivee: ‘Lhcaanvacle, ¿ta t'elhesh ti c'avanelh ti nayipcun, shi' ti lhanyôjayu, shi' ti ajunashjulh papu nintôntôfacliy, shi' ti ampa uyjatshiyisa, shi' ti aôytej'in, shi' ti lhôv'ôcji lhpa vatvanc'ôcfajayte, pa tanca qu'efeneshelh?’ 45Pa yicuulh jayu ja Lhcaanvacle pa yit'esh: ‘Yijô' ti jayeetshelhaam, lhacôm'a pava niasnatshelhem napi yivelhavot ts'aclaaysha'ne, pava lhech tanca asnatshelhyam.’*xa* 46Vooy papu lhech yama jayu pa lhanclôyitsjayash ôyjôlhôyech. Vooy papi yivo'yeshch'e yamey jayu pa lhamônlhajayash ôyjôlhôyech.#25.45 1 Co 8.12.,#25.46 Dn 12.2.

Chiyasinôquivatam pa Jesús ca chinclôn

(Mr 14.1-2; Lc 22.1-2; Jn 11.45-53)

Currently Selected:

San Mateo 25: NIVA

Highlight

Copy