San Mateo 24

1Meelh ti tay'ôcji ja uj vatishjanjavat ja Jesús pa yich, pa nachey japi t'eyjatsjanjas pa yasinôqui ja uj vatishjajavat. 2Taj ti yicuulh ja Jesús pa yit'esh:

—¿Lhavanelh lhacôm'a navôque? Yijô' ti jayeetshelhaam navôque utes tanca mônlhaa lhpa ca ve'lhaa ca nôv'apee lhap'elh. Lhacôm'a ti yofalhsha'ne jayu.

Pava chinôclit ca chintôyesha ca nôjtajeshch'e jayu pava nalhus

(Mr 13.3-23; Lc 21.7-24; 17.22-24)

3Pa lhechesh pa yichey ts'ivee lhja utiyuc yiey ja Olivochat. C'oya ti lhech yie' ja Jesús, pa nam japi t'eyjatsjanjas pa niyôsesh ts'am pa yit'esh:

—Jayeetajeshelh ca anfacleelhyam pa t'aplhuc'oya jayu cavôque ca navclan. ¿Ta t'e lhjunash jayu ca ninôôclheesha ca atpectaj shi' shta ca nôjtajeshch'e na cotsjaat?

4Pa lhechesh pa yit'esha ja Jesús:

—Anujumatsenelhjulh jaspa tanca nacôjôsjatelh papu. 5Lhayaash ti acloj jayu papi nam yit'eshlhavne jayu: ‘Yivaatsha ya Cristo’; pa acloj jayu papi yicôjôsjat. 6Lhatpeeycheyeshelh jayu pa vatvatclônjayash ca chinasinôquitaj shi' shta pa suych'e vatvatclônjayash. Taj ti ya aj ca natôyijatelh ca navclantaj cavôque; taj ti jôjjeclay ninôjeshch'e jayu. 7Lhayaash ti vatcôvfachi'apee jayu lhacôm'a pava yisnatesh shi' pava vatcootsjativshay; vaclan jayu pa yipcu' shi' shta pa vatayyasha lhanô'. Ujaesh jayu ca nayuuynayuya'ch'e na cotsjaat yiey pava chiyie'. 8Lhacôm'a jayu cavôque vaclan ca nich'a nitôôlhtajesham ca chinclôyitaj japi yiey na cotsjaat. 9Pa lhecheesh pa chinatcumelh'a pa chinac'ônelh'in pa jalhpa chinaclônelh jayu jô. Nacônitshielh jayu lhacôm'a japi yiey na cotsjaat, lhayaash ti lhnetôneshelh ca yey.*xd* 10Pava lhech nalhus acloj jayu papi vô'mesh pa nilhcacujayasha, pa tavacôyelhva'ne jayu pap'elh, pa yayjateshey jayu pap'elh ca nanfacleem. 11Nam jayu papi aclôj cuts'ajis, yit'eshlhavne jayu ca chintôyjata pava ti vaclan, pa yicôjôsjat jayu papi acloj nivacle. 12Pa vaclan jayu pava nicaavsusach'e, pa acloj jayu papi vômvach ti vanensha'ne. 13Vooy papi yivo'yeshch'e pa lhfanishlhavach ti vaniyitjulh pa yamjey ca nôjtajeshch'e na nalhu, pa chiyilhjen jayu.*xe* 14Pa chinfacleem jayu lhacôm'a japi yiey na cotsjaat java lhclishay ja lhanvacleyash ja Dios jaspa nitô'ya; pa lhecheesh pa ninôjeshch'e na nalhu. #24.9 Mt 10.22.,#24.13 Mt 10.22.

15“Ca avanchaytajeshelh jayu lhôn pava vancasasinatsha'ne, cava lhech yit'esha lhapesh ja nivacle Daniel, chiytôyjata pava ti vaclan, ca nivatsevataj'e jan chiyie'in lhasnôyech — papi yiclôvalhshi, pa yitôych'e—.*xf* 16Pa lhecheesh pa niclôtey pava uticuy papin yie' ja Judea. 17Papu ca nivooytajeshjulh pa lhech nalhu ca naôvtaj'apee pa lhajpôyich lhôtôjey pa ya aj ca nit'eclet'eysha'ne pa cotsjat'e lhtôvash ca nuyesh'ôcji pa'na. 18Pa vooy papi apis ti yamey pa joot, ya aj ca napeclelhach'e lhpa t'uyjatshiy.*xg* 19¡Yiya'lhavatsha'ne papi nivacche yitumasha'ne shi' papi vancafitsjansha'ne ca nivooytajesh pava lhech nalhus! 20Aalhshelha ja Dios ca ya aj ca navooyshelhsham pa cloop, ja't'ajesha pa nalhu ti chit'ichayshi pa aclôtsjayashelh jayu. 21Lhayaash ti pava lhech nalhus vaclan jayu pa uj vatclôyitsjayash, ninavclan'e pa ca t'elheesh nôque cotsjaat jan t'aplhuqu'e ti nich'a chiyisnatesh, jô'tajesh ti tanca ninôôc t'ôyish'e pa lhech lhjunash.*xh* 22Jech, lhan'e ca nintiqu'icclinitasha'ne ja Dios pava lhech nalhus, pa tanca chinalhjentaj jayu papu ca ve'lhaa. Taj ti teya ti yen papin vooyshilhatam ja Dios, pa jaspa yitiqu'icclinatsha'ne jô pava lhech nalhus. #24.15 Dn 9.27; 11.31; 12.11.,#24.17-18 Lc 17.31.,#24.21 Dn 12.1; Ap 7.14.

23“Ca niteetajeshelh'a jayu papu:

‘A'va, nôque Cristo’, ja't'ajesha ca niteetshelh'a, ‘A'va, naum ana’, pa ya aj ca ueshelha. 24Lhayaash ti caaj jayu papi tanôôlhjônchatesh jayu ca Cristocla, jô'tajesh papi nivacle ti tanôôlhjônchatesh jayu ca chintôyjata pava ti vaclan. Papu lhech nôclit jayu pava matas pa yisnatesh jayu shta pava ninvôôtôyesh jaspa yicôjôsjat jayu papu, yeneshch'een jayu papin vooyshilhatam ja Dios ca nicôjôsjatesh. 25Cavôque jatôtômjalheshelh'am nôqueesh ti janfaclelh'am. 26Ca nicaajtaj jayu papi yit'eshelh'a: ‘A'va, yiey ja ampapu ca nôv'e'’, istaa ca ya aj ca meelhey. Ja't'ajesha ca niteetshelh'a: ‘A'va, yiôcji ja jpôyich’, pa ya aj ca ueshelha. 27Lhayaash ti lhjunashjulh jayu ja tachinshi ti yitsemajshicham ti yiey na lhum'ôcjinuc ti yinalhuyan'in yamey na nuutch'e, lhech yijunash jayu meelh yivaatsha ya Nivacle Lhô'sesh, ca jatpectaj.*xi* 28Pan yie' pa vaf, pa lhech tayesh'eva'ne pava c'afoquis.#24.26-27 Lc 17.23-24.,#24.28 Lc 17.37.

Pan lhjunash ti tapec jayu pa Nivacle Lhô'sesh

(Mr 13.24-37; Lc 21.25-33; 17.26-30, 34-36)

29“Meelh ca namtajeyshi pava lhech nalhus ca nôjtajeshch'e pa uj vatclôyitsjayash, pa yie'jop jayu ca nimac na jumcuclaay shi' na jive'cla tanca pjumtseja t'ôyish'e, nava catiis nicôtch'esha'ne jayu, shi' pa t'unaj na vôôs yinayuuyjat'in jayu.*xk* *xl* *xm* *xn* 30Pa lhechesh pa chinvanjulh jayu na Nivacle Lhô'sesh, pa lhacôm'a jayu napi yiey na cotsjaat ca napvatshem'in. Pa yivanjulh jayu na Nivacle Lhô'sesh ca naôvtajshi lhpa vôse' ca natajeshicham pa uj t'unaj shi' pa lhasnôycheyash.*xñ* 31Pan yifuyuqu'e lhpa t'ônjanche pan sitsenesh jayu pa nanchen japi lh'ángeles, nicheney ts'ivee nava yitshatjulh lhavimis ca nivoomey pant'ajôôj papin vooyshilhatam nan tuc'ae na cotsjaat. #24.29 Is 13.10; Jl 2.10,31; 3.15; Ap 6.12.,#24.29 Is 13.10; Ez 32.7; Jl 2.10; 3.15.,#24.29 Is 34.4; Ap 6.13.,#24.29 Jl 2.10. #24.30 Dn 7.13; Ap 1.7.

32“Istaa ca aneyjatsjaneshelh na chiyovalhemeyjop atesha lhja higoyuc: Meelh ti tits'iysha'ne pava lht'oy pa isc'oya pava lhsashay ca nitôôlh, pa lhechesh pa natôyjatelha ti yujeey ca yincôp'eesh. 33Lhech lhjunash jayu shta, ca avantajelh cavôque matas ca navclantaj pa natôyjatelha ti shalhac'oya ca ninôjeshch'e. 34Yijô' ti jayeetshelhaam, ti vaclan jayu cavôque matas ti jôjjeclay ninôj'e' napuque nivacle. 35Na vôôs shi' na cotsjaat chiyvômjat jayu, taj cava yasinôc tanca chinvômjat.

36“Cavôque pa ca naôtaj'e pa lhnalhu ca navclantaj, ampapu ca nitô'ya, vena ti nintôya japi ángeles yiey ja vôôs, nintô'ya shta na Dios Lhaôs. Ve'lha ja Lhtata Dios ti yitô'ya pa t'aplhu' jayu.

37“Lhjunashjulh jayu lhapesh pava nalhus ti jôjjeclay mônlha pa Noé, pa lhech lhjunash jayu shta pava nalhus ca natpectaj jayu na Nivacle Lhô'sesh.*xo* 38Pava lhech nalhus ti jôjjeclay ninam pa uj tsha'nu, pa tsaccunch'e pa yiyôjane'en shta papi nivacle. Pa caaj papi vanijayachi lhavaatsha shi' papi chiyjayayansha'ne, lhech lhfanishlhavach pa jaalhpa yamjey pa nalhu ti yich'ôcji lhpa lhôvjatshi pa Noé; 39taj ninaychavalh cavôque papu lhech, pa nam pa uj tsha'nu pa yivômjatsha'ne lhacôm'a. Pa lhech lhjunash jayu shta ca natpectaj jayu na Nivacle Lhô'sesh.*xp* 40Pa lhech nalhu napu' papi nivacle yiey jayu pa joot; ve'lha pa chiychaaj vooy peelh mônlhee. 41Napu' papi ôcjeclôy napu'jop lhpa yimcôyanesh pa trigo; ve'lha lhpa chiychaaj vooy lhap'elh mônlhee. #24.37 Gn 6.5-8.,#24.39 Gn 7.6-24.

42“Istaa ca avôntôyitelh'in, lhayaash ti ninatô'yelha pa ca t'aplhuac'oya ca nam na Lhcaanvacle. 43Istaa ca aychavalhelhc'oya, ca nitôôytajesh pa yitsôt'ajesh jpôyich pan t'aplhuc'oya ti nam jayu pa cutsjanaj, pan vatjumtijulh, pa jaspa tanca chincat'e pa lhajpôyich pa tanca chinatcuteem. 44Nôquen lhayaash avaatsheelh shta, istaa ca avatjumteelhjulh shta; lhayaash ti nam jayu na Nivacle Lhô'sesh pan t'aplhu' ti niaychavalhelh'in.#24.43-44 Lc 12.39-40.

Pa vatcavo yivo'yeshch'e shi' pa vatcavo ninvo'yeshch'e

(Lc 12.41-48)

45¿She t'e pa vatcavo ti yivo'yeshch'e shi' ti tcajôyshay, pan yiclôvalhchiyinesh pa lhcaanvale papi yiey pa lhajpôyich ti jaspa tcufayesh pa vatôc ti yameyjop pan lhnônashesh? 46Yishamitjat pa lhcavo pa lhcaanvacle ti namey ti yi'van ti yisnatesh pa t'ônashem. 47Yijô' nava jayeetshelhaam, pa lhcaanvacle yinvacleyanesh pa lhcavo lhacôm'a pava yi'van. 48Taj ti ca naychavalhtajc'oya pa lhech lhcavo ojey, pa lhcaanvacle ti tanca ninam jayu tatsha. 49Pa lhechesh pa yicômclôquisha'ne pap'elh lhancavos. Vooy lhavaatsha tsaccun shi' ti yiyô'elh pap'elh yetsessha'ne. 50Pa lhechesh pa tapecshi jayu pa lhcaanvacle pa nalhu ti ninvatjumtic'oya pa lhcavo, pan t'elhesh ti nintô'ya. 51Pa lhechesh pa uj ti yiclôyit jayu, pan lhjunash papi jôtsôclônjanjas. Pa lhechesh pa yip'in jayu pa yijuujvatjulh jayu shta.

Currently Selected:

San Mateo 24: NIVA

Highlight

Copy