San Mateo 15

1Pa lhechesh pa nachey ja Jesús japi fariseos shi' japi vanqu'eyjatsjanesh pava lhfanishlhavach japin tôlhey ja Jerusalén, pa niyôsesh ts'ivee pa yit'esh:

2—¿Ta lhayash ti ninanc'ashamem napi eyjatsjanjas nava niyôjeeshjooy capi vatcasinôc? lhayaash ti ninvôômcôjop ti tsaccun.

3Pa niyôsesh vitsha ja Jesús pa yit'esh:

—¿Ta t'e lhayaash vitsha ti naanc'ashamelhem nava niyôjeeshelh'ay ja Dios, tsi'sha nava ayôjijateselh lhanc'ashamelhem? 4Lhayaash ti yit'esh ja Dios: ‘Ya aj ca atsopeesh pa atata shi' lhpa amimi', lhan'e ‘Papi yapun pa lhtata shi' lhpa lhamimi pa chiyclôn jayu.’*xc* *xd* 5Taj ti vooy avaatsheelh tajulhelhey'am ti yit'esha pa nich'ayech pa lhtata shi' lhpa lhamimi: ‘Tanca qu'efeneshelh, lhayaash ti lhacôm'a nava caajyam apis ti jatisesh pa Dios.’ 6Lhteetshelha papu ti lhech lhfanishlhavach ca nisuyeeshi t'ôyish'e ca nefen pa lhtata shi' lhpa lhamimi. Lhech cavôque ti navômjateshelh cava Dios lhayôjijates, tôlh'ejop cava lhasnatshelh ayôjijateselh. 7¡Ajôts'ôclônjanjaselh! Yivo'yeshch'e ca Isaías, chiytôyjata pava ti vaclan ti yit'eshelh'a ti yi'sesh'e cavôque lhclishay: #15.4 Ex 20.12; Dt 5.16.,#15.4 Ex 21.17; Lv 20.9.

8Papuque judíos vooy pava

lhashic tsôclôjesh,

lhan'e pava lhiivtec toseyam.

9Cha'lheesh ti tsôclôjtajesh,

ca vanqu'eyjatsjanesh cava judíos

lhayôjijates, nintôlhyi ca yiyôjijatesa.#15.8-9 Is 29.13.

10Pa tôney japi nivacle pa yit'esh:

—Ach'anshelhyi, pa avôntôyitelhch'e shta: 11Nilhecha pa ti tim pa nivacle ca nisasiyan. Vooy pava tôlhch'e lhashi pa nivacle lhech pava lhech yisasiyan.

12Pa lhechesh pa nacheyts'ivee japi t'eyjatsjanjas ja Jesús pa yit'esh:

—¿Natô'yish na japi fariseos ti nayôytanesh cava lhteesh?

13Jô lhech yit'esh ti yicuulh:

—Pant'ajôôj pava vatcôvjiyanchey, pavan nincôvjiyan ja Tata yi'shi' ja vôôs, chintsojesh jayu pava lhfetatsiy. 14Istaa ca an'ateelh; taclujuyesh japu lhech yitojôn pap'elh taclujuy. Ca nitojôntaj pa ve'lha tacluuc peelh tacluuc pa natelhch'evatam jayu lhpa tinjôque'.#15.14 Lc 6.39.

15Pa lhechesh pa yit'esha ja Pedro ja Jesús:

—Anôôclhinitelhch'eyam côque chiyovalheyjop atesha.

16Pa yit'esh ja Jesús:

— ¿Mônlheesh ti ninatô'yelhc'oya shta? 17¿Tanca natô'yelhc'oya pa ti tim pa nivacle ti yicheyshi lhpa lhavts'e' pa vatsha'shi pa nivacle? 18Vooy pava tôlhch'e lhashi tôlhshaam pa lhcachi'; navôque yisasiyan lhavaatsha pa nivacle.*xg* 19Lhayaash ti tôlhshaam pa vatacachi pa vataychavalhjayash niysa', nan lhjunash pa vatvôncaclônjayash, pa vatvômcavômjayash, pa vatcunjatayash, pa vatcutsjayash, pa vatcuts'aji shi' pa vachayjayash. 20Navôque matas yisasiyan pa nivacle; taj ti ca nitujtaj papu pa'na ti jôjjeclay ninvôômcôc'oya, pa tanca nisasiyan cavôque. #15.18 Mt 12.34.

Pa nilhcacujayasha lhpa nivacche nijudiochea

(Mr 7.24-30)

21Pa lhechesh pa yich ja Jesús, t'ajuyey ja cotsjaat yie' java yitsates ve'lha ja lhey Tiro, vooy jeelh Sidón. 22Pa namey ja Jesús lhja ve'lha ôcjeclô lhech lha tsitenaj'e, pa yit'esh ti tônesh'in:

— ¡Lhcaanvacle, David Lhaôs, acavts'aclayish! Caaj lha yôse yi'shi' pa tsich'e' uj ti yiclôyit jum.

23Taj ti nincuulh ja Jesús. Pa lhechesh pa namey japi t'eyjatsjanjas pa vatants'aclansha ja Jesús ti yit'esha:

—Istaa ca efenesh, lhayaash ti shinjôyjan'in pa tônjooj'in shta.

24Pa lhechesh pa yit'esh ja Jesús:

—Tsi'sha japi tastay'in tashinshtasesh Israel lhavosesh tsicheney ja Dios.

25Taj ti nachey lhja ôcjeclô pa t'acjatsuy'e t'ajuyish ja Jesús, pa yit'esh:

—¡Lhcaanvacle, ats'efen!

26Taj ti yit'esh ja Jesús:

—Nintajulhtajey ca chinanjôclesh napi vatacles lhpa yucuve ca chinjutey nava nuus.

27Lhjô lhech pa yit'esh:

—Jech, Lhcaanvacle; taj ti tujqu'e shta java nuus java lhqu'iyas yac'oyesh'in ti nat'ôcjiin ja lhtsaccunjavat japin yitsôt'ajesh.

28Pa lhechesh pa yit'esh ja Jesús:

—¡Nivacche, uj na niacacujayasha! Chivclanjat'am java lhteesh. Pa lhechesh pa vatsjan tatsha lhpa lhôse.

Pa Jesús yilhjensha'ne papi acloj aôytes'in

29Pa yichey ja Jesús ja lhjôvcha lhey Galilea. Yich'apee lhja utiyuc pa lhech yie'. 30Acloj japi nivacle yamey'in jan yie' ja Jesús pa nicha'jey'in japi ancojoy, japi taclujuy, japi t'ucjisha'ne shi' jap'elh acloj nalhjunash'in aôvtes'in. Pa yan'e'in t'ajuyish ja Jesús, jô lhech pa yilhjensha'ne. 31Pa yiqu'imjat japi nivacle ti yi'van japi clishaclayjes ti tasinôy, ti chiyilhjensha'ne japi t'ucjisha'ne, ti vacleech japi ancojoy, ti yovalhvatsham'in shta japi taclujuy. Pa yôclôjey ts'ivee pa lh'Dios japi Israel lhcles.

Pa Jesús yicunjansha'ne papi cuatro mil

(Mr 8.1-10)

32Pa lhechesh pa tôney ja Jesús japi t'eyjatsjajas pa yit'esha:

—Jaycavts'aclayesh napi nivacle, lhayaash ti pu'jana nava nalhus ti yi'yijop pa ampa ca nituj ts'ivee. Niyit'esh ca yicheney pava lhajpôyjey ti jôjjeclay ninatsaccunch'e, lhayaash ti tanca nicont'astaj ts'ivee na ca nancôôtaj'eshisha'ne ja nôyish.

33Pa yicuulh japi t'eyjatsjanjas pa yit'esh:

—¿Ta t'e ca chinôqueshi pa vatôc ca chincunjanesh, yiey nôque ti ampapu ca nôv'e'?

34Pa niyôsesh ja Jesús japi t'eyjatsjanjas:

—¿Ta t'ajôôj pava acôselh yucuvec?

Pa yit'esh tsivee:

—Napu'yama, napu' shta nava sajech.

35Pa lhechesh pa yiyôjaa japi nivacle ca nôvqu'esha'ne. 36Pa t'acum'e java napu'yama yucuvec shi' java sajech, pa yijutey pa t'ishameesh pa Dios. Pa nôcôsshisha'ne pa yijutey japi t'eyjatsjanjas, ca nitiseshch'e japi nivacle. 37Pa tuj lhacôm'a pa yapeesha'ne. Pa chintôqu'e' cava lhqu'iyas pa chiyanshi' java napu'yama sisenlhiy. 38Japu lhech tuj cuatro mil japi nivacle, nichinatsjuulh japi ôcjeclô shi' japi taôvclas. 39C'oya ti yichen'in ja Jesús japi nivacle pa yitshaam lhja vatôvjatshi pa yichey ja cotsjaat lhey Magdala.

Papi fariseos shi' papi saduceos t'aalhtajesha pa Jesús ca nitônôcliteshlhavne pava nimatasa papu ca nitô'yish

(Mr 8.11-13; Lc 12.54-56)

Currently Selected:

San Mateo 15: NIVA

Highlight

Copy