San Lucas 17

1Pa yit'esha pa Jesús japi t'eyjatsjanjas:

—Tanca ve'lhaaesh jayu ca ama papi tô'lha pa sasch'e papi nivacle; taj ti ¡shiya'lhavach jayu papi lhech tôlhshaam pa sasch'e! 2Pa lhech tajulhtajey ca chinôcfeesh lha'vo' lhpa uj utej, ca chinuesham pa lhjôvcha, lhayaash ti nintajulhey ca nifaycutaan papi tiqu'icsha'ne. 3¡Anujumatsenelh'avach!

“Ca nicaajtaj pa avelh ti tamen'ash, pa meey ca asinô'yelh; ca niteetajesh lhavaatsha ca nitatvaych'aclajesh pa lhjunash, pa avômjatemch'e.*xe* 4Lhech lhjunash jayu shta pa ve'lha nalhu ca napu'namtajesha ca natmentaj'ash'in, ca niteetajesh: ‘Jatatvaych'aclajesh jayu shta na yifanishyivach’, pa lhet'ajô'jeesh ca avômjatemch'een vitsha. #17.3 Mt 18.15.

Pa t'unaj pa nivatcacujayasha

5Japi t'eyjatsjanjas yit'esha pa Lhcaanvacle:

—Ashjatelhyam pa niycacujayasheelh.

6Pa lhechesh pa yit'esh pa Lhcaanvacle:

—Ca nicaajtajelh'am pa niacacujayasheelh, ca tc'atajajulh ja mostaza lhtôsej, pa iseelhjop'am jayu lha sints'itsuuc ca at'eshelha: ‘Ataatsoji pa avaantsemajshi ja lhjôvcha’, pa nanc'ashamelh'am jayu lha lhech aacjiyuc.

Pa tanyôjijayesh pa vatcavo

7“Ca nicaajtaj pa vatcavo ti tô'lhey pa joot ti tclôtsjan ja't'ajesha ca ninujumatsenesh pava acloy, ¿lhteetshelha jayu ajalh: ‘Ata'lhun ca vi'sha'ne ca atsaccun?’ 8Am, lhteetshelha jayu: ‘Asnatesh pa nuutey vatôc, pa acum'eyam ca jaytsaccuntaj pa c'ayô' shta. Pa anjooylheesh ca atsaccun pa ayô' vitsha.” 9¿Lhteetshelha jayu ajalh pa acavo can vaclhitajesh lhacôm'a pava lhyôjiesha, ts'ishamesh'a? Jalheclôjesh ti am. 10Lhech ajunashelh jayu avaatsheelh, meelh ca avaclhitajeshelh nava matas ti nayôjieshelh'a ja Dios, istaa ca at'eshelh: ‘Yivaatsheelh ya vatcavoselh yav'ojeyiselh, tsi'sha java jayinyôjijayeshelh ti jasnatshelh tanca yashjatelh'in.’

Pa Jesús yivatsjanchatsha'ne papi diez tashtôtaysha'ne

11Meelh ti t'ajuyey pa Jesús ja Jerusalén pa yuyshi lhcaavju java yitsates jiey ja Samaria shi' ja Galilea. 12Pa yamey ja yitsaat, pa lhech vatcutelh'evach papi diez tashtôtaysha'ne, pa jôjjeclay tojjulh 13ti tônjulh pa yit'esh ts'ivee:

—¡Jesús, Vanqu'eyjatsjan, acavts'aclayelhyish!

14Meelh ti yi'van pa Jesús papu lhech pa yit'esha:

—Meelhey ca atanôclitelhem japi vatcasinôc.

Meelh ti yich'in, pa vatsjansha'ne papu lhech.*xf* 15Meelh ti vatvan pa ve'lha ti vatsjan, pa tatsha ti vapecleylhach'e pa Jesús pa yôclôj pa Dios pa yisitsenesh. 16Pa yu'jane t'acjatsuy pa vanc'umaja cotsjaat, pa yijutem pa t'alhjayash pa Jesús. Pa lhech nivacle tô'lha ja Samaria. 17Pa lhechesh pa yit'esh pa Jesús, ti niyôs: #17.14 Lv 14.1-32.

—¿Ninvatsjansha'ne japi napu'nôjesh? ¿Ta yie' jap'elh yitshatjylhyama? 18¿Pa ve'lha nôque niyichifaa ti tapec'yiy pa yôclôj ja Dios pa yijutem pa t'alhjayash?

19Pa lhechesh pa chiyit'esha pa nivacle:

—Aneetsham ca mô', lhavatsjan lhayaash ti naascacu.

Pan lhjunash ti nam jayu pa Dios lhanvacleyash

(Mt 24.23-28, 38-41)

20Vooy papi fariseos niyôsesh pa Jesús pa t'aplhu' ti nam jayu pa Dios lhanvacleyash pa yicuulh pa yit'esh:

—Tanca isa'jop ca avanelh pa ca lhjunasha ti nam ja Dios lhanvacleyash. 21Tan ca niteesh jayu papu: ‘Yiey nôque’, tan ca niteesh jayu shta ‘Na'um ana’; lhayaash na Dios lhanvacleyash apis ti yi'shi' acachi'vat'elh.

22Lhechesh pa yit'esha japi t'eyajtsjanjas:

—Vooy ca shtamtajey pan t'ôplhu' pan lhteetajeshelh ca avanelh ve'lha pa lhnalhu na Nivacle Lhô'sesh, taj ti tanca avanelh. 23chiyit'eshelh'a jayu: ‘A'va yiey nôquee’, ‘A'va yiey na'um.’ Ya aj ca meelhey, ya aj na shta ca avoelhch'e. 24Lhayaash ti lhjunashjulh jayu ja tachinshi ti yitsemajshicham ti lhayaash clapop pa yameylhac'o' nava vôsey, lhech jayu lhjunash na Nivacle Lhô'sesh ca namtajey pa lhnalhu. 25Taj ti vatjutsaesh jayu ti uj ti tsitsiclôyit, tsicônitshi jayu shta napi lhech navôque nalhus. 26Lhjunashjulh jayu lhapesh pava nalhus ti jôjjeclay mônlha pa Noé, pa lhech lhjunash jayu shta pava nalhus ca natpectaj jayu na Nivacle Lhô'sesh.*xg* 27Tsaccunch'e pa yiyô'janeen shta, caaj papi vanijayachi lhavaatsha shi' papi chiyjayayansha'ne, lhech lhfanishlhavach pa jaalhpa yamjey pa nalhu ti yich'ôcji lhpa lhôvjatshi pa Noé, pa nam pa tsha'nu pa yivômjatsha'ne lhacôm'a.*xh* 28Lhech lhjunash lhapesh shta ti jôjjeclay mônlha pa Lot: tsaccunch'een pa yiyô'janeen shta, tcashayaan pava matas pa tcashayeshvaneen, pa tcôvjiyanjan pa yisnatesh'in pava jpôyjey;*xi* 29taj ti meelh ti t'onshi' pa Lot pa yitsaat Sodoma, pa lhechesh pa namjicham pa itôj, lhjunashjulh ti taj'in, pa yivutunsha'ne lhacôm'a. 30Pa lhech lhjunash jayu pa nalhu ca chinvantaj na Nivacle Lhô'sesh. #17.26 Gn 6.5-8.,#17.27 Gn 7.6-24.,#17.17.28-29 Gn 18.20-19.25.

31“Pa lhech nalhu, ca nicaajtaj papi yiapee pa lhajpôyich, vooy pava lhcôqueclitôy mônlha'ôcji pa lhajpôyich, pa ya aj ca napecleyshi ca nichaaj. Ca nicaajtaj papi yiey pa joot, pa ya aj ca napecleylhach'e pa lhajpôyich.*xj* 32Aychavalhelhch'e lhpa lhch'acfa pa Lot.*xk* 33Papu ca niteetajesh ca ninôôytajesh pa lhamônlhajayash, pa lhech papu lhech yac'oyesh jayu; vooy papu ca ninnôôytajalhavach pa lhecha ca nivan pa lhamônlhajayash.#17.31 Mt 24.17-18;Mr 13.15-16.,#17.32 Gn 19.26.,#17.33 Mt 10.39; 16.25; Mr 8.35; Lc 9.24; Jn 12.25.

34“Jayeetshelhaam pa lhech tulh papi napu'apee pa vatmôjôvat; ve'lha pa chiychaaj jayu, vooy paelh mônlhee. 35Napu' papi ôcjeclôy napu'jop lhpa yimcôyanesh pa trigo, ve'lha lhpa chiychaaj jayu, vooy lhap'elh mônlhee. 36Napu' papi nivacle yiey pa joot, ve'lha pa chiychaaj jayu, vooy paelh mônlhee.

37Meelh ti yipe'yeesh pa niyôsesh ts'ivee:

—¿Ta yie' t'e pa vaclan'e jayu cavôque, Lhcaanvacle?

Pa lhechesh pa yicuulh pa yit'esh:

—Pan yie' pa vaf, pa lhech tayesh'eva'ne pava c'afoquis.

Currently Selected:

San Lucas 17: NIVA

Highlight

Copy