San Lucas 15

1Lhacôm'a papi yivoyanesh pava lhpesoc pa lhanvacle shi' papi sasch'e lhavos pa tayeshva'ne ts'ivee pa Jesús pa tach'ana, 2Vooy papi fariseos shi' papi vanqu'eyjatsjanesh pava lhfanishlhavach yiyôytana pa Jesús pa yit'esh:

—Nôque nivacle t'acuumjulh napi sasch'e lhavos pa tsaccunelh.#15.1-2 Lc 5.29-30.

3Pa lhech lhovalhcheyasheyjop pa Jesús pa yit'esh:

4—¿Tam'eytaja t'e lhôn avaatsheelh ca nicaajelh'am pava cien tashinshtas ca nitaastay'in lhpa ve'lha, pa tan t'e ca nôôytaj'e pa tavashay pava noventa y nueve ca nivooysha'ne lhpa t'astay'in pa jaspa nivan? 5Ca nivantaj pa natcum'e pa nan'e lhfatas pa nanshamesh.*xy* 6Ca namtajeshey pa lhajpôyich, pa nitôney papi lhc'utsfas shi' papi lhchifas pa niteesh: ‘Anshameshelh'yi, lhayaash ti ja'van na tashinshtaj t'astay'in’. 7Jayeetshelhaam ti lhech lhjunash japi yi'shi' ja vôôs ti ya'shesh'apee ti nishamesh pa ve'lha sasch'e lhavo' ti tatvaych'aclajesh pa lhfanishlhavach, papi noventa y nueve isissha'ne, nisuyeeshemshi ca nitatvaych'aclajesh pava lhfanishlhavach. #15.4-5 Is 40.11; Ez 34.11-12; Jn 10.1-16; He 13.20.

Na vatovalhjayasheyjop lhpa tinshanja ti t'astay'in

8“¿Ta lhjunash lhpa nivacche ca nivôôm lhôn lhpa ve'lha pava diez lhtinshanjay, nintseclôlheyjop jayu t'e lhpa lhavitôtaj, pa ninafc'uclôs'ôcji jayu t'e pa lhajpôyich? 9Ca nivantaj lhpa lhtinshanja pa nitôney papi lhc'utsfachey shi' papi lhchifachey pa niteesh: ‘Anshameshelh'yi, lhayaash ti ja'van lha yitinshanja t'astay'in.’ 10Jayeetshelhaam ti lhech lhjunash jayu shta japi lh'ángeles ja Dios nishamesh jayu pa ve'lha sasch'e lhavo' ca nitatvaych'aclajtajesh pava lhfanishlhavach.

Na vatovalhjayasheyjop pa vataôs ti tatc'ôjômit

11Pa yit'esh shta pa Jesús:

—Ve'lha pa nivacle napu' papi lhcles, 12pa taôvclajesh yit'esha pa lhtata: ‘Ta, anjutyiy pava ca nastsôt'ajesh vitsha’. Pa lhechesh pa yicatsônjatem pa lhtata pava yi'van. 13Na acloja pava nalhus ti nayjatva'ne pa lhech taôvclajesh pava chiyjutey pa yichey paelh yitsaat ti tojey. Lhech yam'e ti yivôm'in pava lhpesoc, lhayaash ti yisnatesh pava sasch'esha'ne. 14Taj ti meelh ti nôj'in pava lhpesoc, pa nam pava nalhus ti yiyipcunsha'ne papi lhech'e, pa yiyipcun shta pa lhech. 15Pa lhechesh pa yijop'in pa ve'lha, pa lhech yicheney pava lhclôy vojotas ca ninujumatseneshem. 16Uj ti nicutaja ca nocôj pava faay tuj pava vojotas, taj nichivashanem. 17Pa lhechesh pa yaychavalh'in pa yit'esh: ‘¡Naô ja t'ajôôj japi vatcumjat lhavos yiey ja lhajpôyich ja tata, caaj java lhech'e vatcôs yajatesh ti yaash, vooy yivaatsha t'eshey ninasvômjat na yiyipcu! 18Japecley jayu jan yie' ja tata, pa jayeesh jayu: Ta, uj na yifanishyivach jayjuyjulh pa Dios, jayjuy'ajulh shta; 19nivanajulhjatsham ca at'esh'yi yaôs. Istaa ca asjôney napi acavos.' 20Pa lhechesh pa netshaam pa yich, vapecley pa lhajpôyich pa lhtata.

“Jôjjeclay tojjulh ti yivanjulh pa lhtata, pa tcavts'aclayesh. Vacumajjulh pa yamjulh pa t'acumjulh pa yifinsham lhashi. 21Pa lhechesh pa yit'esh pa lhaôs: ‘Ta, uj na yifanishyivach jayjuyjulh pa Dios, jayjuy'ajulh shta; nivanajulhjatsham ca at'esh'yi yaôs.’ 22Taj pa lhtata ti yit'esha papi lhcavos: ‘Meelheyshi lhja is vat'uyjatshiy, ca uyjatelhch'e; ajayjatelhch'e lhja vatpascheshiy, ôsjatelhch'e shta java nacfiyis. 23Anchajeelh shta ja chiylhavuyan vacô lhaôs ca aclônelh. ¡Secl'esh ca shtatujelh ti shtavatc'usinatelh'in! 24Lhayaash nôque yaôs apis ti vaftaj, taj ti vapecleyc'oya ti mônlha; t'astay'in lhapesh, taj ti nôqueesh shtavan.' Pa uj ti nishamesh ts'ivee.

25“Vooy pa c'utsajesh lhaôs yie' pa joot; pa meelh ti vapecley pa yu'jaa pa lhajpôyich pa yipe'ya pa cuvôyu lhacôôs shi' papi tclôôyjop. 26Pa lhechesh pa tôney pa ve'lha necjôôc pa niyôsesh'in pa lhjunash. 27Pa yit'esh ti yicuulh: ‘Lhech lhfanishlhavach, lhayaash ti nam ja ach'inish; yiyôjiesha ja atata japi lhcavos ti yiclôn ja vacô lhaôs chiylhavuyan, lhayaash ti ampa ca nijumteey ti nam.’ 28Taj pa lhchecla ti tavacôya pa ninôqueyshi, jaalhpa yichfach'ee pa lhtata pa t'a'lhey ca nôc'ôcji. 29Pa yit'esha pa lhech pa lhtata: ‘Natô'yish avaatsha jant'ajôôj java yincôpes ti jaycum'am'in, nive'lhaaesh ca ninasc'ashameesh'am java lhniyôjiesh'yi, pa naanjutyiy pa ca ve'lhaa ca tashinshtaja ca yiclôn ca tujeelh japi yic'utsfas. 30Taj ti nôqueesh na aôs, ti yivômquiyinesh'in papi ojiyis ôcjeclôy java apesoc, pa lhclônem tatsha ca vacô lhaôs chiylhavuyan.' 31“Pa lhechesh pa yit'esh pa lhtata: ‘Yaôs, yajatesh ti amônlhayijop, lhacôm'a java ja'van natsôt'ajesh. 32Nôqueesh shtanvoyeshch'e ti shtasnatesh na vatc'usiyash'in jaspa shtanshamesh, lhayaash ti vaftaj lhapesh na ach'inish, taj ti nôqueesh vapecleyc'oya ti mônlha; t'astay'in lhapesh taj ti nôqueesh shtavan.’ ”

Currently Selected:

San Lucas 15: NIVA

Highlight

Copy