Génesis 47
47
1Pa Josê yichey pa faraón ti nifaclem. Yit'eshema ti nam pa lhtata shi' papi checlavot tôlhey pa Canaán, ti yie' pa cotsjaat Gosên shi' pava lhclôy tashinshtas shi' pava vôcôc shi' lhacôm'a pava yi'van. 2Pa yôôychi papi ve'lhanôjesh lhcheclavot pa jaspa nitô'ya. 3Lhechesh pa niy'ôs pa faraón papi lhcheclavot pa Josê:
—¿Ta lhjunash pa acumjayashelh avaatsheelh?
Pa yicuulh papi lhech:
—Napi acavos avaatsha tashinshtas lhavosesh jan lhjunash capi yinavot'elh. 4Janamelh pa yamônlheelh'e jayu nôque cotsjaat, lhayaash ti uj pa yipcu' yiey ja Canaán. Ampa yitjataja ca nituj java tashinshtas. Istaa ca avashenelhyam ca yamônlhaaelh'e ca jôvelh'e ja cotsjaat Gosên.
5Lhechesh pa yit'esha pa faraón pa Josê:
—Ja atata shi' japi acheclavot nam ca jaspa mônlhaajop. 6Na cotsjaat Egipto t'ajuya shta japi lhech. Ajutem ja cotsjaat Gosên, ja yaash ti is yiey nôque cotsjaat, ca lhech mônlhaae ca nôv'e'. Ca natôôytaja papi lhech nivacle papi tcajôyshay pa ayôjeeshayam ca niclôvalh java yiclôy.
7Pa Josê yôôychi shta pa lhtata Jacob ca nivanjiyinesh pa faraón. Pa Jacob yisclaneshi ti yicju' pa faraón. 8Pa niy'ôs pa faraón:
—¿Ta t'ajôôj pava anincôpes nôqueesh?
9Pa yicuulh pa Jacob:
—Palha caaj cava ciento treinta yincôpes ti jayôtaysha'ne. Naacloja niysisa shta cava yincôpes, lhayaash ti jôjjeclay niyôfiis ca lhjunash lhapesh ti mônlha capi yinavot.
10Ti yivaclhitesh ti vaneecjuelh pa Jacob pa faraón pa tay'e pa lhech'e. 11Pa Josê yijutey pa is'e cotsjaat yiey pa cotsjaat Egipto, ca jaspa lhech mônlhaae, pan lhjunash ti yiyôjiesha pa faraón. Nôque lhjunash pa lhtata shi' papi lhcheclavot ti caajem pa cotsjaat yiey pa Ramsês. 12Pa Josê yijutey shta pa lhôc lhacôm'a pa t'ajôôjamsha'ne pan lhjunash ti suyeshi.
13Ampa trigoa lhacôm'a pa cotsjaat vooy pa yipcu' lhech lha yitshi'. Papi yie' pa Egipto shi' papi yie' pa Canaán uj ti yiclôyit pa lhayipcu'. 14Pa Josê nayjatvane lhacôm'a lhpa peso pava yishayanesh papi Egipto lhavos shi' papi Canaán lhavos ti tcashayaan pa trigo, pa yan'e' pa lhajpôyich pa faraón. 15Vooy ti anlhapa pesoa yiey pa Egipto shi' pa Canaán, pa yicheshey papi Egipto lhavos ti nifaclem pa Josê:
—¡Anjuteelhyam pa ca jatujelh! Nintajulhey ti javatvaneshelh ti tsiclôyitelh na yipcu', tôlh'ejop ti palha anlhapa pesoa.
16Pa yicuulh pa Josê:
—Ca amtaja lhpa ca apesoa pa anchajeelh pava aclôyelh, c'uyjatôcji jayu pa trigo.
17Papi Egipto lhavos pa yicha'jey'in pava lhclôy cuvôyu, pava tashinshtas, pava vôcôc shi' pava cuvôyutas pa Josê. Pa yuyjatem'ôcji papi lhech pa Josê pa trigo tifeshch'e pa yincôôp. 18Vooy ti nôj pa yincôôp, pa nich'a pa yincôôp pa yichey shta ti nifaclem pa Josê:
—Tanca jafich'elh'am avaatsha, lhcaanvacle, ti anlhapa yipesoelh; nava yiclôyelh apis ti natsôt'ajesh. Pa ampa caelhchaa ca yijutelh'ay, ve'lheey nava yicootsjatiselh shi' nava yivuuvteselh. 19Istaa ca acashayelhyi shi' nava yicootsjatiselh pa nuy'ôcji pa trigo. Pa lhcavoseelhyish jayu ja faraón pa jaycumelhem'e jayu nava yicootsjatiselh. Anjuteelhyi pa trigo ca jaspa yamônlhaaelh pa jacôjiyanelh jayu shta pa tanca cha'lhaaesh na cotsjaat. Lhayaash ti nintajulhey ca asvaneelh ca javafelh'e nava yicootsjatiselh. 20Lhechesh pa tcashaya pa Josê lhacôm'a pa cotsjaat yiey pa Egipto pa yitsôt'ajesh pa faraón. Lhacôm'a papi Egipto lhavos tcashayesh'in pava lhcootsjatis tôlh'ejop pa yipcu'. Pa nôqueesh pa cotsjaat yitsôt'ajesh jô pa faraón. 21Papi Egipto lhavos nôqueesh vatcavosesh jô lhacôm'a papi yie' pa cotsjaat Egipto. 22Ve'lheey pava lhcootsjates papi vatasinôc lhavos ninatcashaya pa Josê, lhayaash ti caaj pa yivenchatesh pa faraón ti yijutey pa trigo, pa jaspa ninatcasha'yesh pava lhcootsjatesesh, lhayaash ti tuj'in pavan yijutem pa faraón.
23Lhechesh pa yit'esha pa Josê papi nivacle:
—Nôqueesh avaatsheelh shi' pava acootsjateselh yitsôt'ajesh ja faraón, lhayaash ti jaycasha'yema. Navôque lhtôsjey t'ajuya ca acôvjiyanelh. 24Taj ti lhjutelhey jayu pa ve'lhanôjesh t'iya'esh pa acavcalhech'elh ja faraón. Vooy pav'elh yitshatjulhesh t'iyasesh t'ajuya ca jaspa lhech lha nash'e ca acôvjiyanjanelh, ca jaspa atujelh avaatsheelh shi' napi acleselh, shi' lhacôm'a napi yielh'ajop.
25Pa yicuulh papi lhech:
—Avaatsha uj ti aiseelhsha'ne yic'oya, pa lhts'ilhjeneshelh ti yamônlheelh. ¡Lhcavoselhyish jayu ja faraón!
26Nôque lhjunash pa Josê pa yisnatesh pa lhayôjijat yiey pa cotsjaat Egipto ca chinjutey pa faraón pa ve'lhanôjesh t'iya'esh pa vatcavcalhech. Côque vatyôjijat jôjjeclay caaj. Vooy papi vatasinôc lhavos tanca nishayan pa, lhayaash ti pava yitsôt'ajesh lhcootsjatis nintsôt'ajesh pa faraón.
27Papi israelitas mônlhee ti yie' pa Egipto. Pa vatsôôtjatesh pa cotsjaat Gosên, lhech yie' pa yameyshi ti acloj papi lhtachifas. 28Pa Jacob diecisiete pava lhnincôpes ti yie' pa Egipto, pa ciento cuarenta y siete pava lhnincôpes.
29Ve'lha pa nalhu pa Israel nicha'vayey ti yu'jeey ca nivaf. Lhechesh pa tayôjijanesh ti chitôney pa lhaôs Josê ca niteetsha:
—Ca yijôtaja ca asnateshyam cava jen. Pa ajay'e lha yaco pa yijôa ca anueshyi na jaya'lhesh'a jayu. ¡Istaa ca ya aj ca atishelh'eyic'oya na Egipto! 30Ca javaftaj nan lhjunash capi yinavot, atsayjat'e na Egipto pa astishelh'ec'oya java lhnivalhjey capi lhech.
—Jasnatesh'am jayu —yit'esh pa Josê.*xh*
31—¡Yijô'a! —pa nachanesh pa lhtata.
Pa Josê yuesha jô, pa lhechesh pa Israel pa t'avuy'apee pa lhmôjavat.
Currently Selected:
Génesis 47: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
