Éxodo 9

Ti vaclan pa lhayyasha pava vatôclôy

1Pa lhechesh pa yit'esha pa Lhcaanvacle pa Moisês:

—Meey ca ajôchiey ja faraón, pa at'eshem: “Nôque yit'esh pa Lhcaanvacle, pa lh'Dios napi hebreos: An'ate ca nôqu'in napi tsitsôt'ajesh, ca jaspa nitsôclôj. 2Ca niavashantaja ca nôqu'in shi' ca lhetipataja ca ashiyansha'ne, 3pa Lhcaanvacle tanôclitesh jayu pa t'unaj ca nicaatjat jayu pa uj lhayyasha pava aclôy yiey lhpa acac'utsjavte. Vafsha'ne jayu pava cuvôyu, pava cuvôyutas, pava camellos, pava vôcôc shi' pava tashinshtas. 4Taj pa Lhcaanvacle yivenchat jayu pava lhclôy japi israelitas shi' pava lhclôy japi egipcios, ca jaspa ya aj ca nivaf pa ca ve'lhaa pa lhclô' japi israelitas.

5Pa jô'tajesh pa Lhcaanvacle ti yônjatshi clee côque, pa yit'esh:

—Vooy lhum'ashi jasnatesh jayu côque.

6Pa c'oya ti nalhu pa Lhcaanvacle ti yisnatesh côque. Pa lhacôm'a pava lhclôy papi egipcios ti vafsha'ne. Taj ti vooy pava lhclôy papi israelitas nive'lhaa pa ca nivaf. 7Pa vancacheney pa faraón ca chinjôchiey pava lhclôy papi israelitas, pa yijô' ti nive'lhaa pa ca nivaf pava lhclôy. Taj ti lhetipa ti ninteesh ca nivashan ca nôqu'in papi israelitas.

Ti vaclan pava vatvo'matachey

8Pa lhechesh pa yit'esha pa Dios pa Moisês shi' pa Aarón:

—Acumjelhsham nava apôcôtôyelh pa lhavclo' yich'e lhpa yucuveshiy pa nu'quisham na Moisês pa lhavclo' pa nôvesh'e t'ajuyish ja faraón. 9Pa vooy pa lhavclo' tanu'jam jayu pa lhamôqu'esh pa yamqu'een jayu lhacôm'a ja yitsaat pa vaclanesh jayu pava vatvoyshiyis napi egipcios shi' shta java lhclôy yiey ja Egipto.

10Pa Moisês shi' pa Aarón tôlheshch'e pa lhavclo' lhpa yucuveshiy pa yichey pa faraón. Pa lhech'e pa Moisês ti yu'quisham pa lhavclo', pa yie'shane tatsha papi egipcios shi' pava lhclôy pava vatvoyshiyis.*xu* 11Papi tôyjesesh sasemjop ca namey pa Moisês, lhayaash lhavaatsha ti yitsôyinesh shta pava vatvoyshiyis yiey pan lhjunash lhacôm'a papi egipcios. 12Taj pa Lhcaanvacle yifaycuta shta pa faraón ca ya aj ca nivashanem pa Moisês shi' pa Aarón ca nicu'lhesh, yiey pan t'ônasheshem pa Lhcaanvacle ti nifaclem pa Moisês.

Ti vaclan pava jaclôtuc

13Pa lhechesh pa yit'esha pa Lhcaanvacle pa Moisês:

—Aneetsham tatsha lhum'ashi ca nich'a nalhutaja pa meey ca anfacleem ja faraón: ‘Nôque yit'esh pa Lhcaanvacle, pa lh'Dios napi hebreos: An'ate ca nôqu'in napi tsitsôt'ajesh ca jaspa nitsôclôj. 14Lhayaash ti vooy nôqueesh jachen'ay jayu yivaatsha lhacôm'a java tavijatay shi' japi acavos nôquee shta japi achifas, ca jaspa natô'ya ti ampa caelhchaa ca yijunashajulh yivaatsha yiey nan tuc'a'e na cotsjaat. 15Yivaatsha isjoptajyam ca janôclit'am na uj yunaj ca c'aclôyitesh shi' napi achifas pa uj vatayyash pa p'alhataja ca ayelh'e na cotsjaat; 16taj ti c'an'ate ca amônlhaa ca jaspa asvanesh na yunaj shi' ca jaspa jatôyjatyivne lhacôm'a napi yiey na cotsjaat.*xv* 17Lhamataj côque, pa vooy avaatsha alhetipaesh ti lhatjuyjulh napi tsitsôt'ajesh, pa tanca avashanem ca nôqu'in. 18¡Tajulhey! Lhum'ashi yiey nan yie' nôqueesh janchenshicham jayu pa tsha'nu shi' pava us jaclôtuc pa nive'lhaaesh ca nicaaj côque jan t'ôplhuqu'e ti nich'a chiyisnatesh na Egipto. 19Pa nôquen lhayaash ayôjijanesh ca chinan'ôcji java vatecaschey nava aclôy shi' lhacôm'a pava caaj'am yiey pa joot. Lhayaash pava jaclôtuc, ca nancôôtajsha'ne, yivômjat jayu lhacôm'a papi mônlhafach'ee shi' shta pava yaquisetes yalhayich'ein.’

20Pa caaj papi nayie'in lhcavos pa faraón nijovaych'e pan nifac pa Lhcaanvacle pa yôn'ôcji papi lhcavos shi' pava lhclôy pava lhequeschey. 21Taj ti caaj pap'elh ninanjovaych'e côque pa yimônlhanitfach'ee pava yi'van. 22Pa lhechesh pa yit'esha pa Lhcaanvacle pa Moisês:

—Ajayeshchisham na atuuc, ca jaspa nitif'apee lhacôm'a na Egipto ca nameyshicham java jaclôtuc napi egipcios, nava yaquisetes pa shi' lhacôm'a nava vatcôjiyanchey yiey nava lhcac'ovtes.

23Pa t'ajayeshchisham pa Moisês pa t'ituuc, pa vooy pa Lhcaanvacle yichen'in pava cuuctenis, pava tachinshic pa yijaclôtun'apee pa cotsjaat. Pa lhech lhfanishesh ti nameyshicham pava jaclôtuc yiey pan tuc'a'e lhacôm'a pa Egipto. 24Pa vooy pava jaclôtuc shi' pava tachinshic*xw* lhetipa ti nicôt'esha'ne ti ninvômesh. Jan t'aplhuqu'e pa Egipto ti nich'a chiyisnatesh nive'lhaaesh ca lhech lhjunasha. 25Pava jaclôtuc yivômjatsha'ne lhacôm'a pava yie' pa Egipto, pava yaquisetes, papi nivacle shi' shta lhacôm'a pava vatcôjiyanchey yiey pava vatcac'ovtes. Pa tifsha'ne lhacôm'a pava lhsashay pava aacjicuy. 26Lhamataj côque yiey pa cotsjaat Gosên, yiey pan yie' papi israelitas, nive'lhaa lha pa ca lhech ninat'e pava jaclôtuc.

27Pa lhechesh pa vancacheney pa faraón pa Moisês shi' pa Aarón, pa yit'esha:

—Tsitô'yishyivne ti jasnatesh pa sasch'e.

Yivaatsha tôlhyi' côque shi' napi yichifas, pa nilhecha pa Lhcaanvacle. 28Caju'apee pava cuuctenis shi' nava jaclôtuc nôqueesh. Pa nôque lhjunash tan t'ôyisheey c'ashiyanelhsha'ne. A'lhelheyam avaatsheelh pa Lhcaanvacle, pa vooy yivaatsha c'an'ateelh jayu ca meelh'in.

29Pa yicuulh pa Moisês:

—Vo'ya cum yiin ca jayôntajshi na yitsaat pa tatsha jayu ca jayajayeshchisham nava yipôcôtôy ca jaya'lhey pa Lhcaanvacle. Pa lhecheesh pa nivô'mesh pava cuuctenis shi' nava jaclôtuc, ca jaspa natô'ya na cotsjaat ti yitsôt'ajesh pa Lhcaanvacle. 30Taj ti vooy yivaatsha tsitô'ya jô ti avaatsha shi' japi acavos jôjjeclay amem pa ca t'ijovayi'a'em pa Dios pa Lhcaanvacle.

31Pava vatcôjiyanchecuy pava ts'aclônitas shi' pa niclôtsichat pa vôôm, lhayaash ti p'alha ti taay. 32Taj ti vooy pa trigo shi' pa vôcjôcli ampa ca lhjunasha, lhayaash ti nijoolha ti tôôlh.

33Meelh pa Moisês ti tayshi pa yitsaat ti tôlhey ti yijop'in pa faraón, pa t'ajayeshchisham pava lhpôcôtôy ti t'a'lhey pa Lhcaanvacle. Pa tatsha ti vô'mesh pava jaclôtuc shi' ti taaj. Pa ampava shta pava cuuctenis. 34Taj ti meelh pa faraón ti yi'van ti vô'mesh ti taaj shi' pava yiclôtuc shi' shta pava cuuctenis, pa vapecleyjop shta ti yisnatesh pa sasch'e. Pa nive'lhaa pa lhech ti ninteesh pa chi' shta papi lhcavos. 35Pa vooy pa faraón ninteesh ca nôqu'in papi israelitas yiey pan t'ônashesh pa Lhcaanvacle ti nifaclem ti nich'a pa Moisês.

Currently Selected:

Éxodo 9: NIVA

Highlight

Copy