Éxodo 3

Pa Dios tôney pa Moisês

1Pa Moisês yiclôvalhem pava lhclôy tashinshtas pa lhcact'ech Jetro, pan vatcasinô'esh'e pa Madián. Ve'lha pa nalhu ti yisaas yitsavalhesham pa ampa ca nôv'e' pa yamjey lhpa lh'utiyuc pa Dios lhpa lhey Sinaí. 2Lhech'e pa lh'angel pa Lhcaanvacle ti tanôclitem ti yi'shi'jop pa itôj t'ach'aclech t'afiyshi lhpa aactsejsham. Pa yovalhsha'ne jum pa Moisês pa yi'van lhpa aactsejsham ti yichesh pa itôj taj ti ninôjeshch'e. 3Pa lhechesh pa yaychavalh'in: ¡“Naô t'e pa lhayaash nôque! Jajôchiey cum ca jaclôvalh ti naô t'e pa lhayaash ti ninôquesh jô ca ninôj lha aactsejsham.”

4Meelh pa Lhcaanvacle ti yi'van pa Moisês ti tac'uyeytaj ti yovalhtajsha'ne, pa yiyôjijulh yiesh'e lhpa junshatayuc:

—¡Moisês! ¡Moisês!

—Nôque jôv'e' —yicuulh pa Moisês.

5Pa lhechesh pa yit'esha pa Dios:

—Ya aj ca anc'uyey. Pa anclanshi nava acfiyis, lhayaash nan lhôv'e' ti is'e'.

6Pa yit'esha shta:

—Yivaatsha ya lhech lh'Diosyish capi acchevot. Ya lhech lh'Diosyish pa Abraham, pa Isaac shi' pa Jacob.

Pa yip'oapee pa lhtaco pa Moisês, lhayaash ti nijovayem ca novalhey pa Dios. 7Taj pa Lhcaanvacle lhetipa ti yit'esha:

—Yijô' jô ti javan ja lhjunash japi yichifas ti tanclôyitsjay yiey ja Egipto. Jape'ya shta ti yiyôytanesh tôlh'ejop japi tanch'anjayesh. Pa tsitô'ya jô shta java yiclôyit. 8Pa lhe'naa ti janamjicham ca jaspa c'alhjenesh ja t'unaj japi egipcios. Jayjat'e jayu ja lhech'e yitsaat pa jacha'jey jayu ja ve'lha uj cotsjaat is, jan yie' pa vôcô lhts'oos shi' pa shnacujataj t'i' ti yich jan lhjunash pa yinôôt. Lhech ja lhavtsaat jan yie' japi cananeos, japi hititas, japi amorreos, japi ferezeos, japi hebeos shi' shta japi jebuseos. 9A'va, jaypeeycheyesh java yiyôytanesh japi israelitas, pa javanesh shta japi egipcios ti ujesh ti yic'ônsha'ne. 10Pa nôquen lhayaash meey, ti c'acheney ja Egipto lhanvacle ca jaspa ayjat'e ja Egipto japi yichifas israelitas.*xj*

11Lhechesh pa Moisês pa yit'esha pa Dios:

—¿Ya she t'e yivaatsha ca jôquey pa Egipto lhanvacle shi' ca jayjat'e ja Egipto japi israelitas?

12Pa yicuulh pa Dios:

—Yivaatsha jôv'ajop jayu, côque janôôclhanitsha jayu yivaatsha ti c'achen: Meelh ca ayjat'e ja Egipto japi yichifas, pa alhacôm'aaelh jayu avaatsheelh ca atsôclôjelh yiey anôque utiyuc.*xk*

13Pa yicuulh pa Moisês:

—Ca tavijatayem yiey na lhjunash yivaatsha ca yichey ca jayeetsha japi israelitas: Pa lh'Dios papi acchevot'elh*xl* tsichenelh'ay avaatsheelh. Vooy japi lhech tsiyôsesh jayu: ¿“Ta lhey pa lhech?” Pa lhechesh, ¿pa ta jayeesh jayu?”

14Pa yicuulh pa Dios:

—Ya'lhech Yivaatsha ti Ya Caaj.*xm* Pa at'eshem japi israelitas: Pan yit'eshlhavne: “Yivaatsha Yalhech tsichenelh'ay avaatsheelh.”

15Pa jô'tajesh pa Dios ti yit'esha pa Moisês:

—Pa anfacleem shta japi israelitas: “Pa Lhcaanvacle pa lh'Dios japi acchevot'elh avaatsheelh, pa lh'Dios pa Abraham, pa Isaac shi' pa Jacob tsichenelh'ay avaatsheelh. Côque yey ôyjôlhôyech'esh; shi' ti tanca ve'lhaaesh ca chinvaych'aclaj côque yey. 16Meey pa ac'anatvane japi nitaôvclasaesh japi israelitas pa at'esha: “Pa Lhcaanvacle pan lh'Dios japi acchevot'elh, pan lh'Dios pa Abraham, pa Isaac shi' pa Jacob, tanôclityam pa yit'eshyi ti apis ti novalhelhsha'ne avaatysheelh shi' ti yi'van pa lhfanishelh'ash japi egipcios. 17Pa yit'eshyi shta ti nalhjeneshelh jayu na anclôyitsjayashelh yiey na Egipto. Pa nachajelhey jayu pa lhavtsaat papi cananeos, papi hititas, papi amorreos, papi ferezeos, papi heveos pa nôquee papi jebuseos; jan yie' pa vôcô lhts'oos shi' pa shnacujataj t'i' ti yich jan lhjunash pa yinôôt. 18Vooy japi nitaôvclasaesh nacu'lhesh jayu; pa lhechesh pa atanôycheelh japi lhech ca meelhey ja lhcaanvacleesh ja Egipto, pa at'eshelha: “Pa Lhcaanvacle, pan lh'Dios japi hebreos tanôclitelhyam yivaatsheelh. Pa nôquen lhayaash avashanelhyam ca jôquelhey ja ampa ca nôv'e', ca jôqueshelhch'e pava pu'jana nalhus ca jayôtayelh. Pa lhech'e jayu ca jasnatshelhem pava yicufayjavteselh pa Dios. 19E'ana jô yivaatsha ti apis ti tsitô'ya ja lhcaanvacleesh ja Egipto ti tanca nivashanelh'am ca meelh. 20Pa nôquen lhayaash yivaatsha janôclitem jayu na yunaj pa jaclônsha'ne jayu papi egipcios. Jachenesh jayu pava matas yiey ja lhavtsaat; pa lhechesh pa yivashanelh'am jayu ja Egipto lhanvacle ca meelh'in. 21Pa jô'tajesh yivaatsha ti qu'efenesh jayu japi israelitas ca ya aj ca cuyeseem japi egipcios. Ca meelh ca nitaytaj'een ca ama pava ca nichaaj. 22Lhacôm'a jayu japi ôcjeclôy t'alha jayu japi tajulhshi Egipto lhavoquey shi' pap'elh pa ca naôvtaj'e ca nôvjop lhpa lhech ca nijutey pava ts'ayôjisha'ne clesanlhiy shi' pava cojiyaj clesanlhiy. Pa nôquee pava vat'uyjatshiyis pavan t'uyjatshiyanshelh jayu avaatsheelh papi acleselh. Pa nôque lhjunash jayu ti lhanjôcleshelh lhacôm'a japi egipcios java caajem.*xn*

Currently Selected:

Éxodo 3: NIVA

Highlight

Copy